Lamentações de Jeremias 3
3
Tupàn purehe zepykaw, teko wazemumikahy haw, hàro haw no
1Tupàn upetek amo teko wekwahy haw pupe a'e wà. Amo teko ukwaw upetekaw ipuraraw mehe wà. Aiko amo a'e teko romo ihe.
2Hereraha ipytunahy haw pupe a'e.
Hemuata kar pe rupi tatainy heta 'ymaw pe.
3Ukwaukwar tetea'u herehe opo pupe.
Umumaw 'ar katu nezewe iapo pà.
4Tupàn umuzemàner hero'o hepir rehe we a'e.
Uhaw hekàgwer no.
5Uma'ema'e ma'erahy a'e, iro haw a'e no, pàrirogawtàtà zàwenugar romo heywyr a'e.
6Hemuigo kar ipytunahy haw pupe no.
Herereko kwehe umàno ma'e kwer ài.
7Tupàn heàpixipixi kyhàhàmtàtà ipuhuz ma'e pupe.
Aiko zemunehew paw pupe. Napuner kwaw hehemaw rehe.
8Ahapukaz hepytywà àwàm henoz pà.
Na'ipurenu wer kwaw heze'eg rehe.
9Napuner kwaw herenataromo heho haw rehe.
Ta'e uwàpytym herape ràm itahu pupe a'e xe.
10Tupàn nuzawy kwaw zàwàruhu iriàw miar hàro har a'e, ihewe a'e.
Nuzawy kwaw zàwàruhu uruxu her ma'e herehe ipuruzuka wer ma'e no.
11Hemunyryk kar pe wi.
Hepei'ài'àg no. A'e re hereityk.
12Omono ihàm uwyrapar rehe imuàgà'ym pà.
Na'e hezywà kury.
13Tupàn hu'yw imomor pyrer
ukutuk katu hero'o.
14Teko umumaw 'ar katu herehe upuka pà wà.
Uzegar mehe uze'eg urywahyahy herehe wà.
15Tupàn hemynehem temi'u iro ma'e pupe.
Hemui'u kar iroahy ma'e pupe no.
Napuner kwaw amo iro ma'e i'u wi haw rehe kury.
16Ukytykytyk heruwa ywy rehe.
Uzukazuka heràz ita rehe no.
17Nakwaw kwaw zeàmàtyry'ymaw heta 'ymaw ihe kury.
Hereharaz turywete haw wi no.
18Àmàno etea'i kury.
Tupàn Tuweharupi Wiko Ma'e hàro haw upaw ihewi kury.
19Hema'enukwaw hezemumikahy haw rehe, ihe zutyka'i hereko haw rehe no.
Hema'enukwaw iro haw rehe, ma'erahy rehe no.
20Tuweharupi hema'enukwaw hehe.
Na'e azemumikahy.
21Nezewe rehe we ikatu ma'e hàro haw uzewyr ihewe,
ko ma'e rehe hema'enukwaw mehe:
22Tupàn puruamutar katu haw nupaw kwaw a'e.
Ikatu haw nupaw pixik kwaw.
23Ipuruamutar katu haw a'e, ikatu haw a'e no, ipyahu tuweharupi ku'em mehe a'e wà.
Uzapo tuwe wemimume'u. Uzapo tuwe a'e.
24Areko tuwe Tupàn ihe. Naheta kwaw amo ma'e ihewe.
A'e rupi azeruzar hehe ihe.
25Aze amo uzeruzar Tupàn Tuweharupi Wiko Ma'e rehe wà, ikatu wanupe a'e.
26Tuwe xiàro Tupàn Tuweharupi Wiko Ma'e hemiapo ràm ikatu ma'e nehe.
Tuwe xiàro zanepytywà àwàm zaneze'eg 'ym pà nehe.
27Tuwe teko uzemu'e ma'erahy ipuraraw paw rehe wà nehe,
ukwarer mehe arer we wà nehe.
28Tupàn ma'erahy zanewe ipuraraw kar mehe,
tuwe zaiko zane zutyka'i hàro pà
zaneze'eg 'ym pà nehe.
29Zazemumew ikàg 'ym ma'e ài nehe,
ta'e Tupàn upuner zanepyro haw rehe a'e nehe xe.
30Aze amo uze'eg zemueteahy zanerehe wà nehe, zaze'eg zo wanupe nehe. Tuwe uze'eg zemueteahy zanerehe nehe.
Nazaze'eg kwaw wanupe nehe.
31Tupàn Tuweharupi Wiko Ma'e nuweityk kwaw amo wamuzewyr pixik 'ym pà a'e wà.
32Upuner ma'erahy zanewe ipuraraw kar pà a'e.
Nezewe rehe we zanepuhareko katu a'e no.
Ta'e upuruamutar katu tuwe a'e xe.
33Aze upuraraw kar ma'erahy zanewe a'e, aze zanemuahy kar a'e, nahurywete kwaw a'e.
34Aze amo uzuka zemunehew paw pupe har wapuhareko 'ym pà ko ywy rehe a'e wà,
Tupàn ukwaw a'e.
35Tupàn uzapo kar ma'e teko wanupe a'e.
Aze amo umupytu'u kar teko a'e ma'e iapo re, Tupàn ukwaw a'e.
36Aze amo imunar amo rehe tuwihaw wanehe we, ukwaw a'e no.
37Ni amo nupuner kwaw ma'e iapo kar haw rehe a'e wà,
aze Tupàn nuputar kwaw a'e ma'e iapo kar haw nehe.
38Tupàn Ywate Wera'u Ma'e uzapo kar ikatu ma'e a'e. Uzapo kar ikatu 'ym ma'e a'e no.
39Aze Tupàn uzepyk zanerehe zaneremiapo kwer hekuzaromo a'e,
màràzàwe tuwe zaze'eg zemueteahy zanereko haw rehe.
40Xixak tuwe zaneremiapo kwer nehe.
Zazewyr Tupàn Tuweharupi Wiko Ma'e pe nehe no.
41Xiwàpytymawok zanepy'a Tupàn ywak rehe har pe no.
Zaze'eg izupe nehe.
42— O Tupàn, uruzapo ikatu 'ym ma'e ure. Urupytu'u nereruzar ire.
A'e rupi nanereharaz kwaw ureremiapo kwer wi.
43Erekwahy urerehe.
Erezur ureraikweromo.
Urezuka pe urepuhareko 'ym pà.
44Eremàmàn nezeywyr ywàkun pupe.
Nezewe mehe ureze'egaw nuhem kwaw neruwake.
45Eremume'e kar teko amo ywy rehe har urerehe ne wà.
Uruiko ywytyr ma'e heityk pyrer iapo pyrer zàwenugar romo.
46Ureàmàtyry'ymar paw uze'eg zemueteahy urerehe wà.
47Uruiko urekyze haw myter pe, ikatu 'ymaw inuromo, iaiw haw ipupe, uremumaw paw inuromo.
48Herehay kwer uwyryk hereha wi yrykawhu ài.
Ta'e teko heremiaihu upaw wà xe.
49Hereha uzakook putar herehay kwer upaw 'ym pà nehe.
50Te Tupàn Tuweharupi Wiko Ma'e ume'e putar ywak wi
urerexak pà a'e nehe.
51Hepy'a upuraraw ma'erahy tetea'u a'e,
kuzà hereko haw pe har wanupe uzeapo ma'e kwer rehe hema'enukwaw mehe ihe.
52Màràzàwe tuwe heàmàtyry'ymar na'iakatuwawahy kwaw herehe wà.
Heruwà.
Ipuruzuka wer herehe wiràmiri izuka haw ài wà.
53Hereityk hemàno 'ym mehe yzygwar pupe wà.
Uwàpytym itahu pupe wà.
54'Y uhem heàkàg pe.
— Amàno putar kury, a'e hezeupe.
55'Yzygwar wi ahapukaz Tupàn Tuweharupi Wiko Ma'e pe.
— Hepytywà pe nehe, a'e izupe.
56— Herenu pe nehe, a'e newe.
Herenu pe herehapukaz mehe.
57Nerenoz haw 'ar mehe,
erehem heruwake ihewe neze'eg pà.
— Ekyze zo nehe, ere ihewe.
58O Tupàn Tuweharupi Wiko Ma'e erezur hepytywà pà.
Hepyro pe ne.
59Emume'u hekatu haw nehe, o Tupàn Tuweharupi Wiko Ma'e.
Ta'e erekwaw ikatu 'ymaw heremipuraraw kwer ne xe.
60Heàmàtyry'ymar izepyk wer herehe wà. Erekwaw waneko haw.
Umume'u ikatu 'ym ma'e ihewe wemiapo ràm wà.
Erekwaw wanemimume'u kwer no.
61O Tupàn Tuweharupi Wiko Ma'e, erenu herehe waze'eg zemueteahy mehe ne wà.
Erekwaw wanemiapo ràm paw no.
62Tuweharupi umumaw 'ar katu hekutyr uze'eg pà wà.
— Xiapo ikatu 'ym ma'e izupe nehe, i'i uzeupeupe herehe wà.
63'Ar nànàn uze'eg urywahyahy herehe wà.
Erexak waze'eg mehe ne wà.
64O Tupàn Tuweharupi Wiko Ma'e, ezapo ikatu 'ym ma'e wanupe nehe, wanemiapo kwer hekuzaromo nehe.
Ezepyk wanehe wanemiapo kwer rehe nehe.
65Emono neze'egaiw wanehe nehe.
Emu'ar kar iaiw haw rehe ne wà nehe no.
66Nekwahy haw rupi eho wanaikweromo nehe, o Tupàn Tuweharupi Wiko Ma'e.
Emumaw ko ywy rehe ne wà nehe no.
Currently Selected:
Lamentações de Jeremias 3: gub
Highlight
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.