Lamentações de Jeremias 1
1
Zeruzarez pe har wazemumikahy haw
1Azeharomoete naheta kwaw teko Zeruzarez pe wà.
Kwehe mehe heta tetea'u teko a'e pe wà.
Teko ywy nànànar uzeruze'eg a'e tawhu rehe wà.
Ko 'ar rehe nuzawy kwaw kuzà imen umàno ma'e kwer.
Kwehe mehe nuzawy kwaw tuwihawete kuzà.
Ko 'ar rehe nuzawy kwaw amo pe uma'ereko e ma'e.
2Umumaw pytun gatu uzai'o pà.
Hehaykwer uwyryk huwa rehe.
Kwehe mehe heta imyrypar tetea'u wà.
Ni pitài nupyta kwaw imurywete kar har romo kutàri wà. Paw rupi weityk wà.
Wiko iàmàtyry'ymar romo wà kury.
3Zauxiapekwer weraha teko Zuta ywy rehe har muite waiwy wi wà.
Upuraraw kar ma'erahy wanupe amo pe uma'ereko e ma'e ài wà. Nupuner kwaw uma'erekoahy haw wi uhemaw rehe wà.
Wiko amo ywy rehe wà.
Nupytu'u kwaw wà.
Wanehe ipuruzuka wer ma'e umàmàn waiwyr wà.
Nupuner kwaw wanuwi uhemaw rehe wà.
4Xiàw piarer uzemumikahy wà.
Ta'e naheta kwaw wanupi mynykaw Tupàn imuwete haw pe wata ma'e wà xe.
Kuzàwaza Tupàn Hàpuzuhu pupe uzegar ma'e uzemumikahy wà.
Xaxeto ikuhem tuweharupi wà.
Tawhu upuraraw ma'erahy tuweharupi.
Naheta kwaw teko ipupe nahu rupi katu pe uzemono'og ma'e ràm wà.
5Waàmàtyry'ymar wiko wazar romo wà.
Waàmàtyry'ymar waneko haw ikatuahy.
Ta'e Tupàn Tuweharupi Wiko Ma'e upuraraw kar ma'erahy Zeruzarez pe a'e xe.
Ta'e ipupe har uzapo ikatu 'ym ma'e tetea'u henataromo a'e wà xe.
Waàmàtyry'ymar upyhyk wana'yr wà.
Weraha muite waiwy wi wà.
6Zeruzarez ipuràg eteahy haw upaw.
Ipupe har wanuwihaw nuzawy kwaw miar wà.
Nuzawy kwaw miar ima'uhez ma'e ikàg 'ym ma'e wà.
Uzàwehem uzuka àràm wanuwi wà.
7Ko 'ar rehe uzemumikahy ma'e rehe, 'ar ma'erahy ipuraraw paw rehe,
Zeruzarez ima'enukwaw wemetarer paw rehe,
wemetarer kwehe arer rehe.
— Ni amo nur kwaw hepytywà pà a'e wà, i'i u'ar awer rehe ima'enukwaw pà.
U'ar wàmàtyry'ymar wapuner haw pe.
Iàmàtyry'ymar upuka hehe i'ar mehe wà.
8Ikàgaw uhem izuwi.
Wiko kamir 'ym ma'e romo. Teko paw uze'eg zemueteahy hehe wà.
Ikuhem iko tuweharupi.
Upyk uwa umaranugar pà.
Zeruzarez uzeapo ikatu 'ym ma'e Tupàn henataromo kury.
Ta'e uzapo ikatu 'ym ma'e tetea'u Tupàn henataromo xe.
9Hemiapo kwer ikatu 'ym ma'e nuzawy kwaw ipihunaw ikamir rehe har. Nazawaiw kwaw hexakaw.
Zeruzarez na'ima'enukwaw kwaw uzeapo ma'e ràm rehe.
U'araiwete tuwe.
Naheta kwaw imurywete kar àràm.
Iàmàtyry'ymar weityk wà.
— Hepuhareko pe nehe, i'i Tupàn Tuweharupi Wiko Ma'e pe.
10Iàmàtyry'ymar weraha hemetarer paw izuwi wà.
Teko wexak uzeruzar 'ym ma'e tàpuzuhu pupe waneixe mehe wà.
— Pemuixe kar zo uzeruzar 'ym ma'e heràpuzuhu pupe pe wà nehe, i'i Tupàn wanupe kwehe mehe.
11Teko Zeruzarez pupe har ukuhem waiko wà.
Wekar wemi'u ràm oho waiko wà.
Omono wemetarer paw temi'u hekuzaromo wà.
Nezewe mehe wikuwe wiwi wà.
Tawhu pe har uze'eg nezewe a'e wà.
— O Tupàn Tuweharupi Wiko Ma'e eme'e urerehe
ureaiw haw hexak pà nehe, i'i wà.
12Uze'eg nezewe uzeiwyr wata ma'e wanupe wà.
— Peme'e urerehe nehe.
Aipo heta amo tahy haw urerahy haw zàwenugar.
Wikwahy mehe
Tupàn Tuweharupi Wiko Ma'e uzepyk urerehe ko ma'erahy ipuraraw kar pà a'e.
13'A ywate wi Tupàn umur kar amo tata urerehe.
Ukaz urepupe.
Uzapo puruzuka haw urepyhyk pà.
Urereityk ywy rehe no.
A'e re upuir urewi ma'erahy pupe urerezar pà.
A'e ma'erahy nupaw kwaw.
14Wexak ureremiapo kwer ikatu 'ym ma'e.
Uzàpixipixi wamono'ono'og pà.
Umuzaiko ureazuromo iàpixi pà.
Wapuhuz haw umumaw urekàgaw.
Urezar uremono ureàmàtyry'ymar wanupe.
Nurupuner kwaw wanuwi urehemaw rehe.
15Urezar umumaw zauxiapekwer ureremiruze'eg na'arewahy a'e wà.
Umur kar zauxiapekwer tetea'u kwàkwàmo ureremiruze'eg wazuka kar pà a'e.
Ukamikamik teko tawhu pupe har ikatu ma'e wà. Teko ukamikamik ma'ywa uwà itykwer iapo pà wà.
Nezewegatete zauxiapekwer umumaw teko paw rupi wà.
16A'e ma'e paw uremuzai'o kar.
Umynehem urereha urerehay kwer pupe.
Naheta kwaw uremurywete kar har wà.
Naheta kwaw uremukàg kar har wà.
Ureàmàtyry'ymar urereityk wà.
Teko tawhu pe har upyta heityk pyrer inuinuromo wà.
17Urupyho urepo.
Nezewe rehe we ni amo na'urepytywà kwaw wà.
Tupàn Tuweharupi Wiko Ma'e umur kar ureàmàtyry'ymar urekutyr ma'ema'e wi a'e wà.
Urerereko ma'e purumuzewaru kar haw ài wà.
18Tupàn Tuweharupi Wiko Ma'e ikatu a'e. Uzepyk urerehe.
Ta'e nureruzar kwaw ize'eg ure xe.
Pezeapyaka katu nehe, teko paw wà.
Pexak urerahy haw nehe.
Zauxiapekwer weraha Tupàn hemiaihu muitea'u xe wi wà: kwàkwàmo wà, kuzàwaza wà no.
19— Urepytywà pe nehe, uru'e uremyrypar wanupe.
Wiko ureàmàtyry'ymar wamyrypar romo wà.
Xaxeto a'e wà, tuwihaw a'e wà no, umàno nahu rupi wà wemi'u ràm hekar mehe wà.
Na'imàno wer kwaw wà.
Hekar mehe zauxiapekwer uzuka wà.
20O Tupàn Tuweharupi Wiko Ma'e exak ma'erahy ureremipuraraw nehe.
Uruzemumikahy tuwe.
Urezemumikahy haw hahy urepy'a pe.
Ta'e urema'enukwaw neze'eg heruzar 'ym awer rehe ure xe.
Teko uzuka amo teko nahu rupi wà.
Te tàpuz pupe uzuka wà, i'i Zeruzarez pe har wà.
21O Tupàn, urereinu pe urekuhem mehe nehe.
Ta'e naheta kwaw uremurywete kar har wà xe.
Ureàmàtyry'ymar paw ukwaw iaiw haw urewe uhem ma'e kwer wà.
Hurywete wà, ta'e erepuraraw kar ma'erahy urewe ne xe.
Emur kar 'ar neremimume'u kwer nehe.
A'e 'ar mehe ureàmàtyry'ymar upuraraw putar ma'erahy urezàwegatete a'e wà nehe no.
22Emume'u wanehe nezepyk àwàm nehe. Ta'e uzapo ikatu 'ym ma'e tetea'u wà xe.
Erezepyk urerehe ureremiapo kwer ikatu 'ym ma'e hekuzaromo. Ezepyk wanehe nezewegatete nehe no.
Nurupytu'u kwaw urekuhem ire.
Urepy'a ima'eahy, i'i wà.
Currently Selected:
Lamentações de Jeremias 1: gub
Highlight
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
