San Marcos 5
5
Mbɨa Gerasa ɨguar vɨreco vahe caruguar oyese
1Jesús güemimbohe reseve oyepota ɨpa rovai Gerasa ɨvɨ rese yuvɨraso. 2Yuvɨnose pare carite pɨpe sui, ahese mbɨa caruguar rerecosar tuvɨpa pãhu rupi secoi vahe oso Jesús upe. 3Co mbɨa tuvɨpa pãhu rupi secoi vahe yepi. Ndipoi eté ava secopɨsar, carena avei eté opa-opaño omondoso. 4Setá yupagüer rupi tẽi ñapɨchisa carena pɨpe ipɨ, ipo rupi avei yepi. Ahe rumo opa-opaño ité omondoso carena yepi. Ndipoi eté ava osecoreroyɨ vahe. 5Arɨ, pɨ̃tu rupi oguata, osapucai oico ɨvɨtrɨ mahugüer rupi, tuvɨpa mahugüer rupi avei; ocua-ocua ita pɨpe oyese yepi. 6Amombrɨ Jesús repia ramoseve, oña senonde oñenopɨha voi sovai, 7oñehe pĩrata chupe:
—¡Eyepepɨ che sui Jesús, Tũpa seco ɨvate catu vahe Rahɨr! ¡Aporandu Tũpa rer pɨpe che mombaraɨsuẽhɨ ãgua eve! —ehi.
8Aipo ehi, esepia, yɨpɨndar Jesús aipo ehi chupe:
—¡Caruguar mbahe tẽi vahe, esẽ co mbɨa sui! —ehi chupe.
9Aheve oporandu chupe:
—¿Mara vo nde rer? —ehi.
Ahe omboyevɨ chupe:
—Che rer Legión. Esepia, ore rehɨi eté —ehi.
10Oporanduño chupe omondopaẽhɨ ãgua co ɨvɨ sui. 11Ichui namombrɨimi setá cuchi ocaru vahe ɨvɨtrɨ rese yuvɨreco. 12Sese caruguar oporandu yuvɨreco chupe:
—Ore mondopaño cuchi avɨterve eve —ehi yuvɨreco.
13Evocoiyase Jesús omondo caruguar sẽ ãgua ahe mbɨa sui. Ahe opa yuvɨroique cuchi avɨterve. Ahe cuchi retacuer dos mil tuprɨ vahe, ahe yuvɨnoña yuvɨraso ɨvɨvate sui ɨpa pɨpe ocañɨpa.
14Evocoiyase cuchi rãrosar yuvɨnoña osɨquɨyepave yuvɨraso imombehu ãgua tecuave, caha pɨpe rupi yuvɨrecoi vahe upe avei. Sese ava opa yugüeru sepia ‘¿mbahe pĩha?’ oya yuvɨreco. 15Oyepotase Jesús recosave, aheve osepia mbɨa caruguar vɨreco vahecuer yuvɨreco oyemonde tuprɨse oĩ, yaracua tuprɨse avei. Ahese oyembosɨquɨye tẽi yuvɨreco. 16Mbahe oime vahe caruguar vɨreco vahe rese, cuchi rese avei, ahe sepiasar omombehupa ambuae ava upe yuvɨreco. 17Evocoiyase ava Jesús upe: “Esẽ cohave sui” ehi yuvɨreco.
18Oha irise Jesús carite pɨpe, co mbɨa caruguar rerecosarer oporandu chupe supi oso ãgua. 19Ahe rumo,
—Esoño nde rẽtave, nde mu pɨri. Aheve emombehupa Yar oporoaɨsusa pɨpe mbahe oyapo vahecuer nde rese —ehiño chupe.
20Ahe mbɨa oso, omombehu opacatu tecua Decápolis rupi Jesús oyapo vahecuer mbahe sese. Evocoiyase ava opacatu, “¡Mara ehi rutei!” ehi tẽi yuvɨreco.
Jesús ombogüera Jairo rayrɨ, iyavei cuña opoco vahe iturucuar rese ombogüera
21Oyevɨse Jesús carite pɨpe ɨpa rovai oso, aheve oñemonuha atɨ ava yuvɨreco chupe. Ahe evocoiyase opɨtaño ɨpa popɨve. 22Evocoiyase oyepota mbɨa mborerecuar tũparo pendar, ahe serer Jairo. Jesús repiase, oñenopɨha sovai, 23aipo ehi chupe:
—Che rayrɨ omano pota. Yaso, teremondomi tẽi nde po iharɨve imbogüera ãgua —ehi.
24Evocoiyase oso supi. Ava rehɨi avei yuvɨraso supi. 25Ipãhuve avei oime cuña doce aravɨter rupi suvɨ yepɨyere-yere vahe. 26Iparaɨsú iteanga, setá oporoposano vahe ndoicatui imbogüera yuvɨreco omomandaivete catu iposanosa pɨpe yuvɨreco. Opa tuprɨ tẽi omondo mbahe vɨreco vahe, ɨvate catuño rumo imbaherasɨsa chupe. 27Co cuña osenduse Jesús rese ñehesa, oguata saquɨcuei oso ava rehɨi pãhuve, iturucuar rese opoco. 28Aipo ehi oyeupe oico: “Iturucuar rese apocose rumo, acuerara” ehi. 29Ahe ramoseve voi ndasuvɨ yepɨyere iri. Ipare oyandu güetecuer yemoingatu tuprɨsa, ocuerase ombaherasɨsa sui. 30Jesús rumo oyandu osẽse opĩratasa oyesui. Sese omahe guaquɨcuei cotɨ ava rese, ahese oporandu:
—¿Ava vo opoco che turucuar rese? —ehi.
31Semimbohe omboyevɨ yuvɨreco chupe:
—¿Nderemahei vo ava oyere tuprɨ yuvɨreco nde rese? ¿Mahera ru, ‘¿Ava vo opoco che rese?’ ere iri? —ehi yuvɨreco chupe.
32Ahe rumo omaheño vɨte ité ava oɨvɨindar rese ‘¿uma ité pĩha opoco che turucuar rese?’ oya. 33Evocoiyase co cuña oicuase mbahe oyesendar, oyembosɨquɨye. Ipare oso sovai, oñenopɨha, ahese opacatu mbahe supi vahe omombehu chupe. 34Evocoiyase Jesús aipo ehi chupe:
—Che rayrɨ, erecuera cũritei nde yeroyasa pɨpe. Eso tuprɨ. Esepia niha, erecuera nde mbaherasɨsa sui —ehi chupe.
35Iñehe vɨteseve, oyepota movɨro Jairo rẽta pendar tayrɨ mano mombehu yuvɨreco:
—Omano ité nde rayrɨ. Aní eremañeco tẽi vɨte Porombohesar —ehi yuvɨreco chupe.
36Ahe rumo Jairo upe aipo ehi:
—Aní eresɨquɨye. Eyeroya catuño —ehi.
37Ndoipotai rumo ambuae ava oyeupi icho ãgua; Pedro, Santiago, Juan güeraño oipota. 38Oyepotase Jairo rẽtave, osepia ava yemondɨi oyaseho vahe. 39Ichui oiquese oɨ pɨpe, aipo ehi:
—¿Mahera vo perãse guasu tẽi peyaseho peyu? Co cuñatai nomanoi, oque tẽi ou —ehi ava upe.
40Ava rumo opucaete-eteño seroyaẽhɨsave yuvɨreco. Evocoiyase omose opacatu ava. Ipare omoingue iyesupa, ichɨ, oyeupindar reseve cuñatai rehõgüersave. 41Ipare oipopɨsɨ aipo ehi:
—Talita, cum —ehi chupe (‘cuñatai, eñarapuha, ahe ndeu’ ohesave aipo ehi).
42Ahe ramoseve voi cuñatai doce aravɨter vahe oñarapuha, ipare oguata. Sepiase ava, oyembosɨquɨye guasu yuvɨreco. 43Jesús rumo oyocuai imombehuẽhɨ ãgua ambuae ava upe. Ipare,
—Pembocaru co cuñatai —ehi.
Currently Selected:
San Marcos 5: gyr
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.