Hebreos 1
1
Tumpa uyemɨngueta ma Taɨ rupi
1Aracae yave Tumpa uyemɨngueta aveiño yandetenondegua reta pe iñee umɨmbeu vae reta rupi. Jeta quirãirãi rupi uyemɨngueta chupe reta. 2Ẽrei añave cua ara reta pe Tumpa uyemɨngueta ma yandeve Taɨ rupi. Tumpa uyapo opaete uyeyapo vae Taɨ rupi, jare Taɨ rupi vi jei mbae uasata opaete uyeyapo vae pe vae. Tumpa jei vae co Taɨ güɨnoi vaerã opaete uyeyapo vae. 3Tumpa Taɨ oyovaque Tumpa ndive, jare cua ɨvɨ pe ico rambueve uicuaaca quirãi Tumpa imbaepuere tuicha ete co. Echa'ã jae uiporu Tumpa imbaepuere etei. Opaete uyeyapo vae jecuaeño ico Tumpa Taɨ jei vae rupi jare imbaepuere rupi. Jae etei uñemee umano vaerã, ipuere vaerã umbai yanembaeyoa reta, jare cua jaɨcue rupi uguapɨ Tumpa iyɨpɨ pe iyacata cotɨ ara pe.
Tumpa Taɨ jare ángel reta
4Jucuarãi Tumpa Taɨ uicuaaca quirãi jae imbaepuere tuicha ete ángel reta imbaepuere güi. Jae ramiño vi tee uñemee chupe vae uyembutuichaca ete ángel reta jee güi. 5Echa'ã Tumpa jei Taɨ pe cuarãi:
“Nde co jae cheRaɨ.
Cua ara aicuaaca nde co jae cheRaɨ.”
Jucuarãi jei. Jucuarãi'ã jei Tumpa ángel pe. Jare Tumpa jei Taɨ re cuarãi:
“Che co jae Tu,
jare jae co cheRaɨ.”
Jucuarãi jei. Jucuarãi'ã jei Tumpa ángel regua. 6Tumpa Taɨ co jae opaete mbaembae uyeyapo vae iYa. Jare Tumpa ombou ye yave Taɨ cua ɨvɨ pe Tumpa jeita cuarãi:
“Jare opaete ángel reta tumbɨadora.
Echa'ã jae reta uyeyocui cheve.”
Jucuarãi jeita. 7Ángel reta re imiari yave, Tumpa jei cuarãi:
“Ayocui ángel reta uyapo vaerã che jae vae.
Jatangãtu ete uyeyocui vaerã cheve.”
Jucuarãi jei. 8Ẽrei Tumpa jei Taɨ pe cuarãi:
“Nde co jae Tumpa etei.
Ndeporoyocuita jaeño mai pegua.
Nde ndeporoyocuita jupi vae rupi.
9Nde jecuaeño ndiyapo jupi vae.
Ndiyapota'ã etei mbaeyoa.
Jáeramo che noñono opaete ĩru vae reta itenondeguarã, ndiyerovia ete vaerã.
Che co jae neTumpa.”
Jucuarãi jei. 10Jare Tumpa jei vi Taɨ pe cuarãi:
“Nde co jae opaete mbae iYa.
Aracae ete nde ndiyapo ɨvɨ.
Jae ramiño vi ndiyapo opaete ara re oĩ vae.
11Jae reta opata, ẽrei nde jaeño mai ndicota.
Jae reta opaete indechita penti temimonde indechi vae rami.
12Echa'ã indechi ete ma yave, uyemombo, jare uyeporu ĩru temimonde jocua indechi vae ipepɨca pe.
Ẽrei nde jaeño mai ndicota.
Nde ndarau etei nendechi.”
Jucuarãi jei. 13Jare Tumpa jei vi Taɨ pe cuarãi:
“Eguapɨ cheyɨpɨ pe cheacata cotɨ, nderovaicho reta opa amɨamɨri regua.”
Jucuarãi jei. Jucuarãi'ã jei Tumpa ángel pe.
14Echa'ã ángel reta uyeyocui Tumpa pe, jare Tumpa ombou ángel reta omborɨ vaerã uyembɨasacata vae reta.
Currently Selected:
Hebreos 1: gwn
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
