Titus 2
2
Yakꞌusda ba ꞌilhunaoodulhne bube ꞌutꞌen kꞌoh
1ꞋEt hoontsꞌi Titus ndi tsꞌihꞌun unꞌa be whutsꞌodulꞌeh-i, ꞌet za bududóniꞌ. 2Ndunne yoo ꞌun uzulhne dune, talhonoosnaiꞌ hubaꞌ hoontꞌoh, teꞌhunoolhdzin, ꞌinkꞌez tsꞌihꞌun ni hunidoh. Whudutsꞌo whe buba ꞌalhaꞌ hotꞌeꞌ. Be lhkꞌetsꞌusiꞌ-i ꞌinkꞌez ꞌaw hoonli talhohodinine, ꞌet whuz unꞌa ꞌúhootꞌeꞌ.
3Tsꞌekoo yoo ꞌun uzulhne, ꞌenne cha whuz unꞌa ꞌuhootꞌeꞌ. ꞋEnne teniꞌ nilhdzunne hooleꞌ. ꞋUyoonne hoontsiꞌ kꞌunꞌa bughu yalhuhoolhduk. Tsꞌekoo tooꞌ ghu dalháhatni. ꞋInkꞌez hoonzoo-un za ꞌuyoonne huhodoolhꞌeh. 4ꞋEt cha tꞌedukoo dukike ꞌinkꞌez duduzkehke cha bukꞌehoonsiꞌ, whuz unꞌa bugha hudooniꞌ. 5Tsꞌihꞌun ni hunidoh, Yakꞌusda ba ꞌudun nebuninlane hutileh. Duyoh cha tsꞌihꞌun unꞌa howu hinli, hoozooꞌ, ꞌinkꞌez dukike bukꞌuneꞌ hootꞌen. ꞋEt de la ꞌuyoonne ꞌaw Yakꞌusda ooghuni chꞌaz yahoolhduk ꞌaitꞌoh.
6ꞋEt chilke unline, ꞌenne cha tsꞌihꞌun ninidohne hooleꞌ. 7ꞋInkꞌez Titus nyun cha tsꞌiyantsuk whe ngha ꞌutꞌen unzoo-i ꞌuhoolhꞌen, whuz unꞌa ꞌontꞌeꞌ. ꞋEt ndi be whutsꞌodulꞌeh-i, ꞌi tsꞌiyawh ꞌaw lhdoosun, dólhtiꞌ, ꞌinkꞌez ꞌaw hoonliyaz whe ꞌatsꞌun unꞌa ootꞌeꞌ junih. 8Khuni dutsꞌo-i ooba nahoodeh ꞌaitꞌoh-i, ꞌet nchꞌaz ditni-un yooya ooleꞌ. ꞋAw khuni ntsiꞌ-i be nghu yaooduk ꞌaitꞌoh.
9ꞋUlhnane ꞌenne cha dumoodihne bukꞌuneꞌ hootꞌen budini. Budzi hóolhdzooꞌ ꞌoh te za neꞌhootꞌen. ꞋInkꞌez ꞌaw budulhyoh cha lheꞌhudoosnih. 10ꞋInkꞌez ꞌaw bughu lheꞌhundunoostꞌi. Kꞌus dumoodihne tsꞌun tsꞌihꞌun unꞌa ꞌuhootꞌeꞌ, hoonzoo kꞌunꞌa whúbunilhtun-un ꞌet la whutꞌaz ꞌuhootꞌeꞌ. ꞋEt de la Yakꞌusda neulhyis-un, ooghuni be whutsꞌodulꞌeh-i tsꞌiyantsuk whe ꞌon nus unzoo ooleꞌ.
Yakꞌusda ye unzoo-i, ꞌi tsꞌiyanne nalhtsꞌet ha hooltsꞌut
11ꞋEt Yakꞌusda ye unzoo-i be uzdujih-i, ꞌi tsꞌiyanne nalhtsꞌet ha hooltsꞌut. 12ꞋEt whuneoodulhꞌeh, ndet Yakꞌusda be ꞌutꞌen lhuhooloh-un, ꞌinkꞌez whenichꞌoh ndi yun kꞌut hukwaꞌ ꞌuzninzun-un, ꞌet tsꞌiyawh dah ꞌuzdooniꞌ. ꞋEt kꞌus tsꞌihꞌun ni uznizulh-un, tsꞌihꞌun dune tsinli-i, ꞌi cha, ꞌinkꞌez Yakꞌusda tsꞌun teniꞌ uznilhdzun kꞌoh tsꞌe za tsꞌootꞌeꞌ, ꞌandit whuz unꞌa za ꞌutsꞌootꞌeꞌ, 13ꞌet neYakꞌusda ꞌukꞌenus diztiꞌ-un, ꞌinkꞌez Jesus Christ neulhyis-un, ootsꞌu ha yánduz-i, ꞌet nenalhtsꞌet ha óotiltsꞌulh whutsꞌun, ndi ꞌukꞌenus hoonzoo-un huba tsꞌilhꞌi. 14Jesus Christ neba huwaꞌ dudulti nelubeshi chꞌa nenaootakulh ha. ꞋInkꞌez wheni dichꞌoh ooduneꞌne dune ꞌutꞌen unzoo-i za ꞌutsꞌoolhꞌen.
15Titus ndúhoontꞌoh-un huwun bubulh yailhduk, buba nus whunilhtꞌi, ꞌinkꞌez mbaꞌ hoontꞌoh, ꞌet huwa whe níntaꞌ hutꞌih-un hukwaꞌ budini. Dune ꞌantsꞌi buba ꞌonleꞌ junih.
Currently Selected:
Titus 2: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
