Mark 12

Mai ha níyeh kꞌet whulhꞌaíne bugha whútsꞌodulꞌeh

1ꞋEt Jesus khuni be nawhutnuk-i be whutsꞌodulꞌeh-i, bubulh yálhduk, “ꞋIlhoghun dune, ꞌen la mai ha níyeh-un, mai tsꞌekoo tooꞌ lhih-i, ꞌananla. Duchun ha niyeh be whunaꞌniztlꞌoo. Tsa kꞌet ha hónkaih mai taha whúndunutnih-un huba, ꞌinkꞌez yutístꞌen-un cha ꞌuhóonla. ꞋEt dune ghu whulhꞌai ꞌinkꞌez la nilhdzaꞌ keyoh tsꞌe whenádija. 2ꞋEt mai oontajin néwhuninzut whe de ꞌulhná-un ꞌilhoghun ꞌen la mai ha níyeh kꞌet butlꞌa hónlane butsꞌú whe yalhꞌaꞌ, oonajin-i ooloh ootsꞌitookat hubaꞌ hoontꞌoh-i ha. 3ꞋEt mai kꞌet butlꞌa hónlane ꞌulhna huyílhchoot yahúyalhtꞌo ꞌinkꞌez hoonli highálhilel whe whenáhinanyoot. 4Doo cha ꞌuyoon ꞌulhna whuz whelhꞌaꞌ. Tse be nahínilhꞌuz hitsi tsꞌe nalhꞌuz whe ka húyulhtsi, hukwayá hoonli kꞌunꞌa ꞌuhuyínla whe whenáhinanyoot. 5Doo cha ꞌuyoon ꞌulhna whuz whelhꞌaꞌ. ꞋEn hizilhghi. Lhane ꞌuyoonne cha ꞌet ndúbuhinla whulohne ubuhoolhtꞌah ꞌinkꞌez whulohne cha ubuhanghan.

6ꞋEt hoontsꞌi ꞋIlhoghun duyeꞌ yukꞌensíꞌ-un ꞌet usda. ꞋEn cha ꞌudekꞌez whuz butsꞌun whe yálhꞌaꞌ, ‘Syeꞌ, ꞌen la hidólhtiꞌ,’ ni ꞌinka.#12:6 Njan mai kꞌet ha níyeh-un humoodih ꞌen Yakꞌusda ꞌuntꞌoh, ꞌinkꞌez ooYeꞌ ꞌen Jesus Christ ꞌuntꞌoh. ꞋEt mbe la bugha hólhꞌaꞌne, ꞌenne Lizwif bumoodihne ꞌuhintꞌoh ni whe ꞌutni.

7Nyoonne mai kꞌet butlꞌa hónlane ꞌet ꞌulhodútni, ‘Ndun njan mai kꞌet oochꞌeꞌ-un, ꞌen ooyeꞌ ꞌúntꞌoh. ꞋAnih, tsꞌuzoolhghelh. ꞋEt ooyeꞌ ootsꞌí tikulh-i tsꞌiyawh nechꞌeꞌ ooleꞌ.’ 8ꞋInka huyílhchoot, hizílhghi ꞌinkꞌez hizi ꞌi la ha níyeh kꞌet tenáhinino.”

9ꞋEt Jesus uboodulhkut, “Daóoneh suba mai kꞌet whulhꞌaí-un? Whusanája, ꞌinkꞌez la ndunne tsꞌiyawh hubooghan, ꞌinkꞌez mai kꞌet ꞌuyoonne ghu hólhꞌaꞌ. 10ꞋAw Yakꞌusda ooghuni ꞌukꞌu nusgúz-i ookꞌu yálhuzulhduk? ꞋEt ndutni,

‘Ndi tse yoh ꞌuwhulhꞌénne ꞌún hidutilhꞌuz-i,

ꞌukꞌenus ooka dáhotni-i suliꞌ.

11ꞋEt Moodihti whuz unꞌa ꞌuhóonla.

ꞋInkꞌez neba hooncha wheꞌ hoontꞌoh.’”

12ꞋEt Jesus huyólhchoot hukwaꞌ hutꞌen tꞌehonínzun didut buchꞌaz yálhduk whe dune hodalhꞌeꞌ, ꞌet hoontsꞌi dune ꞌilhozdílne ehunuljut ꞌinka Jesus dalhúhuyilel whe whenáhidil.

Yun kꞌelha huhoolhꞌi-un hukwaꞌ hoodulhkut

13ꞋEt whulohne Phariseene ꞌinkꞌez Herod ooduneꞌne cha Jesus khuni be huyoolhgooh ha hitsꞌú whe bahalhꞌaꞌ. 14Jesus highu nindil whe ꞌuhutni, “Dune hodulhꞌéh-un tꞌetsꞌonínzun tsꞌihꞌun zaꞌ danelh. ꞋAw ꞌuyoonne daja huntizilh-un huwu ni lhínlo. Dune dantꞌóhne hoontsꞌi lhubunílhꞌen ꞌet hoontsꞌi Yakꞌusda beni kꞌoh tsꞌe huwun khuni ꞌalhaꞌ ꞌuntꞌoh-i be whúbodilhꞌeh. ꞋEt nedíni, Roman keyoh whumoodih ootsꞌun yun kꞌelha tsꞌuhoolhꞌi ꞌukꞌelha tsꞌuholhꞌeh kꞌus ꞌawundooh?” 15ꞋEt hoontsꞌi Jesus huyoolhgooh hukwaꞌ huyulhꞌen tꞌeoonanzin, ꞌinka ꞌubulhni, “ꞋEt di ha sóolhdzih? Sooneya stlꞌahꞌaih noosꞌen si.”

16ꞋIlhoghun sooniya yutlꞌa ínꞌaih. ꞋEt Jesus uboodulhkut, “Mbe oonin ꞌinkꞌez booziꞌ cha ookꞌusguz?” ꞋEt ꞌuhuyúlhni, “Keyoh whumoodih Caesar huyúlhni-un ꞌuntꞌoh.”

17ꞋEt Jesus ubúlhni, “Caesar oochꞌeꞌ-i ootsꞌun ꞌukꞌelha whulhꞌi, ꞌinkꞌez Yakꞌusda oochꞌeꞌ-i, Yakꞌusda tsꞌun ꞌukꞌelha whulhꞌi.” ꞋEt tube buba hooncha.

Nat tsꞌukhítnaih huwun ꞌoodulkut

18ꞋAwet Sadduceene, Jesus highu nindil. ꞋEnne la ꞌuhutni, “Datsꞌúzsai ꞌinkꞌez ꞌaw natsꞌukhótnah ꞌaítꞌoh.” 19ꞋEnne huyoodulhkut, “Nehodulhꞌeh-un Moses netsꞌo kꞌeyanguz, ‘Dune ooꞌat hoonli-un dazsai de, ꞌinkꞌez buzkeh hooloh de, dazsaí-un bulhutsin tsandilh yughu noodaꞌ dazsaí-un, ba buzkeh holeꞌ ha.’ 20ꞋEt lhtakꞌantꞌine lhulhutsinke hónleꞌ, ꞌudetso whudilhdzulh-un, ꞌat ꞌutꞌi ꞌawhuz buzkeh hooloh whe dazsai. 21ꞋEt yukꞌoh whúdilhdzulh-un, tsandilh yughu nasda. ꞋEn cha buzkeh hooloh whe dazsai. ꞋEt whulh tat-un cha whuz unꞌa za ꞌuja. 22Lhtakꞌantꞌine lhodunildzulhne whe highu dáltsꞌiꞌ, tsꞌiyawh bubuzkeh hooloh whe yahádla. ꞋUdekꞌez tsꞌeke cha dazsai. 23ꞋEt huwa yaidláne dunazdutádulh dzin, kꞌus mbe suba ooꞌat tileh, tsꞌiyawh highu dáltsꞌiꞌ?”

24ꞋEt Jesus budaniꞌ, “Tube ꞌutsꞌun unꞌa ꞌuduhni. Tꞌeoonuzáhzun huwa ꞌudahni. Yakꞌusda ye ulhtus-i ꞌinkꞌez ooghuni ꞌukꞌeguz-i tꞌénuzuhzun, ꞌet huwa ꞌuduhni. 25Yaidláne dunahudidil te, ndo yakꞌuz lizas leꞌ hintꞌoh. Dune ꞌinkꞌez tsꞌekoo ꞌaw lhgho diltsꞌiꞌ wheꞌ hoontꞌoh. 26ꞋEt hoontsꞌi yaidláne dunáhudutádulh huwun, Moses ꞌukꞌu néyuzguz-i ꞌaw eh ookꞌu yalhúlhdih whus dilhtán-i toh whudizkꞌun whe Yakꞌusda yulh yalhduk inleꞌ? Moses Yakꞌusda ndéyulhni, ‘Si ꞌustꞌoh Abraham ooMoodihti ꞌustꞌoh, Isaac cha ooMoodihti ꞌustꞌoh, ꞌinkꞌez Jacob cha ooMoodihti ꞌustꞌoh.’ 27Khunane buYakꞌusda ꞌuntꞌoh, ꞌaw yaidláne buYakꞌusda iloh ꞌuntꞌoh. ꞋEt huwa tube nanihtaꞌ whe ꞌahtꞌoh.”

Khuni neba yútulhuhizyeꞌ-i ꞌukꞌenus díztiꞌ

28Moses be ꞌudustlꞌus ꞌukꞌu nunáguz-un, whusainya ꞌinkꞌez ubudántsꞌo ꞌinkꞌez tꞌéoonínzun Jesus Sadduceene soo ubudániꞌ. ꞋInka Jesus yoodulhkut, “Kꞌus ndai khuni neba yutulhúhizyeꞌ-i kꞌus díztiꞌ?”

29ꞋEt Jesus uyúlhni, “Ndi ꞌukꞌenus díztiꞌ-i, ‘Israel ooduneꞌne, oozúlhtsꞌai, neMoodihti Yakꞌusda unli, ꞌilhoghun Moodihti ꞌuntꞌoh. 30Yakꞌusda nyuMoodihti ndzi ndulcho-i be, nzul ndulcho-i be cha, nyeni tsꞌiyawh ꞌinkꞌez nyunutꞌi be cha ookꞌeonsiꞌ.’ 31Bulh nanki khuni higha néꞌulhꞌa-i ‘Nyunchꞌoh kꞌenainsiꞌ, whuz unꞌa nyulh dune cha bukꞌeoonsiꞌ.’ ꞋAw ꞌuyoo khuni higha néꞌulhꞌai-i ndi nanki ba nus díztiꞌ-i hooloh.”

32ꞋEt Moses ooghuni ꞌukꞌu néyuzguz-un, Jesus ꞌulhni, “Nehodulhꞌeh-un sooꞌ dinja! Khuni ꞌalhaꞌ ꞌuntꞌoh-i be yailhduk! ꞋUdédoh Moodihti ꞌen za Yakꞌusda unli, ꞌaw ꞌuyoonne Yakꞌusda lhíloh. 33ꞋInkꞌez dune dudzi ndulcho ꞌi be Yakꞌusda kꞌeoosiꞌ, dudeni tsꞌiyawh be cha, duzul be cha, oonutꞌi tsꞌiyawh whe cha ꞌinkꞌez dichꞌoh kꞌenatsiꞌ whuz unꞌa dulh dunene bukꞌeoosiꞌ. ꞋEt ꞌukꞌenus neba hooncha nanki khuni higha néꞌulhꞌa-i ookꞌúneꞌ tsꞌootꞌen. Khuna-i ꞌinkꞌez ꞌuyoo hoonliyaz loodel kꞌut Yakꞌusda gha dizkꞌun, ꞌi ba nus whudíztiꞌ.”

34Jesus tꞌéoonanzin dalcho ꞌi be whunih kꞌunꞌa ꞌudíja ꞌet uyúlhni, “ꞋAwet Yakꞌusda whuLerwe unli whenghoh ꞌintꞌoh.” ꞋEt hukwꞌelhꞌaz ꞌaw ꞌudun hukwa lhúhuyoodílhkulh huyéntsaz ꞌet huwa.

Christ ntsꞌenꞌa ꞌen David ootsꞌu haínzut-un, ꞌet huwun hika huyoodulkut

35ꞋEt Jesus Lizwif bulugliz whucho dune hodulhꞌeh whe ꞌubulhni, “Ntsꞌenꞌa Moses be ꞌudustlꞌus ꞌukꞌu nunáguzne, ‘Christ ꞌen David ootsꞌuhainzut-un ꞌuntꞌoh,’ hutni? 36ꞋEt David Ndoni ꞌi gha la ꞌet ndutni,

‘Moodihti ꞌen sMoodihti ꞌúyulhni nailhni tsꞌunkꞌus sinda.

Nchꞌaz ditnine bukꞌut nke

naóolhyis mba ubooselh ꞌet whutsꞌun.’

37David dichꞌoh, ‘Smoodihti,’ yúlhni, ꞌet ntsꞌenꞌa Christ David tsꞌu haínzut-un ooleꞌ?” ꞋOh dunene huhoontꞌiꞌ whe hidantsꞌo.

Jesus dune ubúlhni, “Moses be ꞌudustlꞌus ꞌukꞌu nunáguzne, buchꞌa kháhdli”

38ꞋEt Jesus hubodulhꞌeh whe ubúlhni, “Moses be ꞌudustlꞌus ꞌukꞌu nunáguzne, ꞌenne buchꞌa kháhdli. ꞋEꞌóoket-un dune toh nahúchun tlꞌasus yiz be húdilhtsꞌi, ꞌinkꞌez dune ubudólhtiꞌ-un hukwa húdúdúlꞌen. 39Lugliz huntilꞌelh-un, ꞌet ꞌutahaooditꞌaih, ꞌinkꞌez dune dadulh te, ꞌet cha kꞌus whúdiztiꞌ-un, ꞌet didut nátlꞌa hududaih. 40Tsandilh cha khábonitꞌoh, ꞌinkꞌez buyoh bugha ha whúhutꞌaih. ꞋInkꞌez ncha náꞌhadudilꞌi whe saꞌ cho tenahududli. ꞋEt hukwꞌelha ꞌon nus buba nahutideh wheꞌ hintꞌoh.”

Tsandilh sooniya huwa nínꞌai-un

41Lizwif bulugliz whucho sooniya dekat-un, ꞌet la Jesus usda, ꞌinkꞌez ꞌubunilhꞌen sooniya dehúle. Lhane hoonzooꞌ ꞌuntꞌohne, sooniya lhai whe dehúyaꞌaih. 42ꞋEt ꞌilhoghun tsandilh telꞌen-un, ꞌóh whuya uyalh, ꞌinkꞌez nanki sooniyayaz dénalhdil.#12:42 Ndi sooniya ꞌukꞌenus tsudítiꞌ ꞌi ꞌuntꞌoh.

43ꞋEt Jesus yugha hodulꞌehne tsꞌun béꞌ buntilhni ꞌinkꞌez ubúlhni, “Nohdúsni ndun tsandilh telꞌen-un, ndunne tsꞌiyawh buba nus lhai deyánꞌai whe ꞌuntꞌoh. 44Ndunne ꞌuyoonne huye hóonzooꞌ ꞌuntꞌoh-i, chꞌutukat-i, ꞌi ꞌuhuyulhꞌen dehúyule. ꞋEt hoontsꞌi ndun ꞌaw ꞌi yutꞌi-i yukꞌotinalh, ꞌi tsꞌiyawh deyánꞌai.”

Currently Selected:

Mark 12: crx

Highlight

Copy