Luke 7
7
Lhuganne whumoodih yuba neꞌútꞌen-un, Jesus soo náꞌyinla
1ꞋEt dune Jesus yoozilhtsꞌaine ndet huwun ubúlhni-un, tsꞌiyawh lhaoodinla. ꞋInkꞌez keyoh Capernaum tsꞌe oozya. 2ꞋInkꞌez ꞌet keyoh whutꞌen-un ꞌet ꞌilhoghun lhuganne whumoodih yuba neꞌútꞌen-un. Tube yúkꞌentsiꞌ-un, ꞌen tube unduda ꞌinkꞌez ꞌawet datitsah. 3ꞋEt lhugan whumoodih Jesus yulh ꞌúdantsꞌo ꞌinkꞌez Lizwif tso whudilhdzulhne, whuz whe balhꞌaꞌ. Jesus huyoodutalhkut ha lhugan whumoodih yuba neꞌutꞌen-un soo naꞌyooleh ha. 4ꞋEt Jesus highu nindil whe tube cho hitsꞌu tedudli ꞌinkꞌez ꞌuhuyulhni lhuganne whumoodih-un, ꞌen soo ꞌuldzooꞌ whe ꞌuntꞌoh yuba neꞌutꞌen-un, ꞌen soo naꞌyooleh ha. 5“Neduneꞌne bukꞌensiꞌ ꞌinkꞌez nelugliz nebaꞌ hóonla,” huyulhni. 6ꞋInka bubulh tizya. ꞋEt Jesus yoh whenghoh uyalh whe lhugan whumoodih ꞌen ookꞌekene Jesus hitsꞌú whe balhꞌaꞌ. Hidudizdil ꞌinkꞌez Jesus ꞌuhuyúlhni, “Lhugan whumoodih njan dunyúlhni, ‘SMoodihti dzoh neꞌdudoldzut junih. Syoh datányalh huba ꞌaw soo lheꞌuzdzooꞌ ꞌet huwa.’
7ꞋEt huwa ndunuszun ꞌaw soo lheꞌuzdzooꞌ ndudutásyalh huba. ꞋEt hoontsꞌi nghuni be dini de, ꞌet la sba neꞌútꞌen-un soo naꞌóotneh. 8ꞋEt si cha whuz unꞌa za lhuganne buba ando ꞌustꞌoh. ꞋEt ꞌilhoghun, ‘Inyalh!’ dúsni de, ꞌaho ꞌawet tiyalh. ꞋEt ꞌuyoon, ‘ꞋAnih!’ dúsni de, ꞌet ꞌaho stsꞌu tuyaih. ꞋEt sba neꞌútꞌen-un, ‘Njan ndineh!’ dúsni de, ꞌet ꞌaho ꞌet ndútꞌih.”
9Jesus ndun dune daja ni la yudantsꞌo whe tube ooba hooncha. ꞋEt yunidulhne butsꞌú nalhꞌa ꞌinkꞌez ubúlhni, “Israel ndulcho whe keyoh ndun dune ꞌen kꞌunꞌa ꞌaw ꞌilhoghun ndulcho-i be ooba ꞌalha ꞌuhoontꞌoh-un nalhizústi.” 10Mbene la yutsꞌun whelꞌaꞌne lhugan whumoodih hiyoh tsꞌu naóosdil whe yuba neꞌútꞌen-un ndidaꞌ ꞌaw dálhitꞌoh whe highu danándil.
Dune dazsai-un, Jesus dunaidilhti
11ꞋEt ꞌom bun dzin Jesus keyoh Nain huwhutni-un, yugha hodulꞌehne bulh, ꞌinkꞌez lhanne yunidulhne cha huyulh whindil. 12ꞋEt keyoh nanistlꞌoo ghu ti-un whenghoh nehúnindil whe dazsai-un hiduhidizkai. ꞋEt ooloo tsandilh, ꞌaw ꞌilhoghun za ooyeꞌ ꞌuntꞌoh. ꞋEt keyoh whutꞌenne lhane yulh údulh. 13ꞋEt neMoodihti yanꞌen ꞌinkꞌez yugha teꞌninzin whe uyúlhni, “Intso iloh!”
14ꞋInkꞌez nezi chunkelh yughu ninya ꞌinkꞌez yutꞌaiznai. Yilhtelhne cha ꞌilhiz nehunindil. ꞋInkꞌez ꞌutni, “Chilh dune dudinyaih nyudúsni!” 15ꞋInkꞌez dune dazsai-un doneh tlꞌa dindaꞌ ꞌinkꞌez yawhénilhduk. ꞋInkꞌez Jesus ooloo tlꞌa nayalhti.
16Tsꞌiyanne hunílhjoot, ꞌinkꞌez Yakꞌusda hidílhtiꞌ whe njan nduhutni, “Netoh nus hooꞌen-un ncha-un whusainya.” ꞋInkꞌez nduhútni, “Yakꞌusda duduneꞌne buzih nususya.” 17ꞋEt Judea yun kꞌut ndulcho whe ꞌinkꞌez whunat keyoh ndulcho whe cha, tsꞌiyanne huyulh ꞌúdantsꞌo.
John dune too be ꞌulhꞌen-un yugha hodulꞌehne, Jesus tsꞌun whe balhꞌaꞌ huyoodutalhkut ha
18John yugha hodulꞌehne tsꞌiyawh hidániꞌ dahooja la. 19ꞋInkꞌez nane ꞌanih ꞌubulhni ꞌinkꞌez Jesus tsꞌun whe balhꞌaꞌ huyoodutalhkut ha, “Nyun eh whusatíyalh-un inli, kꞌus ꞌuyoon tilah ka tsꞌitóꞌen?”
20ꞋInka Jesus highu ninꞌaz ꞌinkꞌez ꞌuhuyúlhni, “John dune too be ꞌulhꞌen-un, ntsꞌu nétilhꞌaꞌ ntsꞌu yoodutalhkut ha, nyun eh whusatíyalh-un inli, kꞌus ꞌuyoon tilah ka tsꞌitóꞌen?”
21ꞋEt ꞌaho mbene la ndudane ꞌinkꞌez ooka hooline cha, ꞌinkꞌez ntsiꞌ-i nududeh-i ooyudindane cha lhane soo naꞌbalhꞌen. Hoos̱ꞌenne cha huhooꞌen-un ꞌubulhtsi. 22ꞋEt Jesus John yugha hodulꞌehne ꞌubulhni, “John tsꞌu nahtꞌus. Ndet whunilhꞌen-un ꞌinkꞌez whudáhtsꞌo-un dóhniꞌ, hoos̱ꞌenne huhooꞌen huzdliꞌ. Nulhúsdilne húdilhne nahuzdliꞌ. Buka nódutsiꞌ, leprosy be butsun hooloh huzdliꞌ. Lheꞌdustsꞌone cha ꞌahuditsꞌo huszdliꞌ. Yaidlane cha dunahudidil. Telꞌenne cha khuni unzoo-i be bubulh yaínduk. 23ꞋInkꞌez si sgha ooba dzoh lhúhoolohne, ꞌenne ꞌukꞌenus hoonzoo-un bughá whutaltsꞌulh.”
24ꞋEt John khuni yuba naꞌáne whenáhitꞌaz whe Jesus John ghu yatilhduk whe ꞌilhunaoosdilne njan ndúbulhni, “Dune lhuhootꞌih tsꞌe ndet hukwa tse hoohli whutihꞌelh-un? Tlꞌoghazilh nónulhtsꞌi, ꞌi tilah tihꞌelh nahzun eh? 25Ndet suba hukwa tse hoohli whutihꞌelh-un? Dune naih duchut-i be soo naduja, ꞌen tilah tihꞌelh nahzun eh? ꞋAlhaꞌ whuz unꞌa soo nadutꞌihne lhai sooniya tsꞌiya hulhtsih ꞌinkꞌez lerwe ooyoh huwhutꞌi. 26ꞋEt ndet suba hukwa tse hoohli whutihꞌelh-un? Nus hooꞌen-un tilah? A! ꞌalhaꞌ nohdusni nus hooꞌen-un ba nus ꞌuntꞌoh-un nulhꞌen! 27ꞋEn ghun ꞌukꞌuneꞌ ꞌusguz inleꞌ whe ndutni,
‘Soo zilhtsꞌai, khuni sba naꞌa-un, ꞌen ntso tisꞌalh.
ꞋEn ntso tiyalh-un,
mba lhaoodutileh ꞌet wheni.’
28Nohdusni, nus hooꞌenne whuzdline butoh John dune too be ꞌulhꞌen-un, ꞌukꞌenus ncha-un ꞌuntꞌoh. ꞋEt hoontsꞌi Yakꞌusda whulerwe unli-un, ꞌukꞌenus ꞌudeyo ꞌuntꞌoh-un yanus uncha whe ꞌuntꞌoh.”
29Tsꞌiyanne dune ꞌinkꞌez sooniya nalhdzoohne, Jesus daja ni hidantsꞌo whe Yakꞌusda buba ꞌalhaꞌ yija, John too beꞌ balhꞌen ꞌet huwa. 30ꞋEt hoontsꞌi Phariseene ꞌinkꞌez Moses be ꞌudustlꞌus kꞌut daja ni whe ꞌuyoo unli be yalhdukne, tsꞌiyawh Yakꞌusda ntsꞌe la butsꞌu hukwaꞌ ninzun-un, ꞌantsꞌi ꞌun huhutilhdil. ꞋAw John too be lhéꞌbilel ꞌet huwa.
31ꞋEt neMoodihti ubúlhni, “Dunene ꞌandit yukꞌedúdehne di suba nohba lhzih nebosdlelh, kꞌus di dahultꞌoh? 32Tsꞌoodunneyaz duhúltꞌoh whe huyaꞌalh-i be ꞌóoket-un ꞌet hudilhtsꞌi. ꞋInkꞌez lhtsꞌu há hadih whe njan ndulhódutni,
‘Be tsꞌujun-i be nohba tsꞌujun,
ꞌinkꞌez ꞌaw lhnahdih.
ꞋInkꞌez nohba tsꞌodi tsinli,
ꞌinkꞌez ꞌaw lhahtsoh!’
33Whunulhꞌen, John dune too be ꞌulhꞌen-un whusainya whe ꞌaw lhes lhusꞌal ꞌinkꞌez tsꞌekoo tooꞌ cha lhusnaiꞌ. ꞋEn ꞌudáhni ‘Ntsiꞌ-i nududeh-i ooyudinda,’ dahni. 34ꞋEt Yinka Dune Yeꞌ whusainya, ꞌaꞌalh ꞌinkꞌez ꞌutnai. ꞋEt ꞌudáhni, ‘Ndun dune oocha hooncha ꞌinkꞌez tanutnai. Sooneya ꞌilhunaoosꞌaihne ꞌinkꞌez lubeshi ꞌulhꞌenne bukꞌeke,’ dáhni. 35ꞋEt hoontsꞌi ndunne hiye whunih-i naꞌdudilꞌine bugha ndi be whútnih-i, ꞌi tsꞌihꞌun unꞌa ꞌuhóoja.”
Tsꞌeke lubeshi ꞌulhꞌen-un oolubeshi lhai, Jesus yuba ꞌun yutilhdil
36ꞋEt Pharisee ꞌilhoghun yughu nusíya dudulh náꞌootꞌalh yulhni. ꞋInka whuz ooyoh tsꞌe yughu danínya. ꞋEt lutab yoo yo ꞌuntꞌoh-i yuzih nelget ꞌutiꞌulh wheni. 37ꞋEt ꞌilhoghun keyoh whutꞌen-un, lubeshi ꞌulhꞌen-un tsꞌeke. Pharisee ooyoh tsꞌe ꞌet Jesus ꞌaꞌalh yulh ꞌúdantsꞌo whe whuz whinya. Sooltsun-i diztiꞌ-i, ꞌi alabaster luboodai bé yulhdzo, ꞌi whuz yoozꞌai. 38ꞋEt yutꞌa syin, ꞌutso ꞌinkꞌez dunatsultooꞌ be yuke tunawhiningus ꞌinkꞌez dutsighaꞌ be yunaꞌulhdeh, ꞌinkꞌez yuke naditsꞌooz. ꞋInkꞌez ndi sooltsun-i be yuke yulhlo.
39ꞋEt Pharisee ꞌanih yudaniꞌ-un, dichꞌoh naꞌdudutni, “ꞋEt ndun nus hooꞌen-un unli de, tꞌeoonózin daꞌ dantꞌoh-un tsꞌeke ꞌuntꞌoh yutꞌainaih. ꞋEn lubeshi ꞌulhꞌen-un ꞌuntꞌoh.”
40ꞋEt Jesus uyúlhni, “Simon, hoonliyaz nyudutásnelh.” “Nehodulhꞌeh-un dini,” ni.
41ꞋEt Jesus ꞌuyulhni, “ꞋIlhoghun sooniya ꞌughu sulhꞌai-un nane dune ghe ꞌulhꞌai. ꞋIlhoghun ꞌen 500 ꞌilho unli sooniya, ꞌinkꞌez ꞌilhoghun 50 ꞌilho unli sooniya. 42ꞋAw hiba ꞌukꞌelha hitilhtselh lhihítꞌih. ꞋInka nahúltꞌoh buba whula ditni. ꞋEt sudini, kꞌus mbe ꞌukꞌenus yukꞌensiꞌ?”
43ꞋEt Simon ꞌutni, “Mbe ꞌukꞌenus lhai yuba laditni-un, ꞌen ꞌukꞌenus yukꞌentsiꞌ.” ꞋEt Jesus uyúlhni, “Tsꞌihꞌun unꞌa ꞌudinja.”
44ꞋEt ndun tsꞌeke tsꞌu nalhꞌa ꞌinkꞌez Simon ꞌulhni, “Ndun tsꞌeke nilhꞌen eh? Nyoh danusya whe ꞌaw too sba ꞌet nélhinkal ske be tunatisgus huba. ꞋEt hoontsꞌi ndun tsꞌeke dunatsúltooꞌ be ske tunayuzguz ꞌinkꞌez dutsighaꞌ be yunaꞌalhde. 45Nyun ꞌaw naꞌdutsꞌoos be hadih sulhdínel. ꞋEt hoontsꞌi ndun tsꞌeke ꞌudechoo danínya whutsꞌun ꞌaw ske nadutsꞌoos-un ꞌetsul lheꞌínel. 46ꞋAw stsi khe be lhilhlhoh ꞌet hoontsꞌi ndun tsꞌeke khe be ske sooltsun-i yulhlo. 47ꞋEt huwa nyudusni, oolubeshi lhai tsꞌiyawh ooba whunaoodízno. Lhetube skꞌensiꞌ whe ꞌuntꞌoh. ꞋEt hoontsꞌi ntsool-iyaz lubeshi buba hooloh unline, dzoh tsꞌulyaz skꞌehinsiꞌ.”
48ꞋInkꞌez Jesus tsꞌeke ndúyulhni, “Nlubeshi mba hooloh suliꞌ.”
49ꞋEt ꞌonghohne ludab kꞌut naꞌutꞌalhne dichꞌoh ꞌulhodutni, “Ndun mbe whe ꞌuntꞌoh? Lubeshi ꞌi hoontsꞌi yunaꞌulhdeh?”
50ꞋInkꞌez tsꞌeke ꞌúyulhni, “Mba ꞌalha ꞌuhoontꞌoh-i, ꞌi be dinjih. Ndzi dizghel whe naindalh!”
Currently Selected:
Luke 7: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
