1 Samuelu 4
4
O le Tau‘a a Isaraelu ma Filisitia
1‘Ua alu atu Isaraelu e tau ma Filisitia; ‘ua latou tolauapi i Epenesa, a o Filisitia ‘ua tolauapi i latou i Afeka.#Iosu 12.18; 1 Samu 5.1; 7.12; 29.1 2‘Ua tofi le tau‘a e Filisitia, ‘ua fa‘asaga mai ‘iā Isaraelu; ‘ua tau solo le tau‘a, ‘ona fasia lea o Isaraelu e Filisitia; ‘ua latou fafasi ‘au o le tau‘a i le tafā, pe ‘atoa le fa o afe o tagata. 3‘Ua fo‘i atu le nu‘u i le togālauapi, ‘ona fai ane lea o toeaina o Isaraelu, “O le a le mea ‘ua fasia ai tatou e le ALI‘I i le asō i luma o Filisitia? ‘Inā tatou ‘aumai ia le ‘atola‘au o le feagaiga a le ALI‘I mai Sailo ‘iā te i latou, a o‘o mai ‘iā te i tatou, ‘ona fa‘aolaina ai lea o i tatou a‘i lima o le itūtau‘a.”#Iosu 18.1; 1 Samu 3.3; 4.10; 2 Samu 11.11 4‘Ua alu le fe‘au a le nu‘u i Sailo e ‘aumai ai le ‘atola‘au o le feagaiga a le ALI‘I o ‘au o lo‘o afio i le vā o kerupi. Sa i ai fo‘i ma le ‘atola‘au o le feagaiga a le Atua o atali‘i e to‘alua o Eli, o Hofeni ma, Fineaso.#Eso 25.22
5‘Ua o‘o atu le ‘atola‘au o le feagaiga a le ALI‘I i le togālauapi, ‘ona ‘alalaga ai lea o Isaraelu uma ma le ‘alaga tele, ‘ua u ai le ‘ele‘ele. 6‘Ua lagona e Filisitia le ta‘alili o le ‘alaga, ‘ona fai ane lea, “Se a lenā ‘alaga tele ‘ua ta‘alili mai i le togālauapi a Eperu?” ‘Ona latou iloa lea o le ‘atola‘au a le ALI‘I ‘ua ‘aumai i le togālauapi. 7‘Ua fefefe fo‘i Filisitia, auā ‘ua fa‘apea i latou, “‘Ua o‘o ane le Atua i le togālauapi;” ‘ua latou fai ane fo‘i, “O i talofa ‘iā te i tatou, auā e le‘i fa‘apea anamua. 8O i talofa ‘iā te i tatou, o ai sē lavea‘i ‘iā te i tatou a‘i lima o ia atua mamana? O atua ia na latou fasia Aikupito i fasiga uma i le vao.#Iosu 24.5; Fa‘aa 11.6 9Filisitia e, ‘inā fa‘amalolosi ia, ‘ia ‘outou fa‘atamatane, ne‘i fai i tatou ma pologa ‘iā Eperu, fa‘apei ‘ona fai i latou ma pologa ‘iā te ‘outou; ‘ia ‘outou fa‘atamatane, ma ‘ia ‘outou tau ma i latou.”
10‘Ua tau Filisitia ma i latou; ‘ua fasia Isaraelu, ‘ua ta‘itasi ma sola i lona fale ‘ie, sa tele lava le fasi; o Isaraelu na fasia e tolugafulu o afe o i latou o ‘au e sāvavali.#Levi 26.17; Teu 28.25; 1 Samu 4.2; 2 Samu 18.17; 19.8; 2 Tu 14.12; 2 No 25.22; Sala 78.62 11‘Ua ‘avea fo‘i le ‘atola‘au le Atua; e atali‘i e to‘alua o Eli Hofeni ma Fineaso, ‘ua oti i lā‘ua.
O le Oti o Eli
12‘Ua momo‘e mai le tagata Peniamina nai le tau‘a, ‘ua o‘o i Sailo i lea lava aso; ‘ua saeia ona ‘ofu ma le ‘ele‘ele ‘ua i luga o lona ulu. 13‘Ua alu ane ia, fa‘auta fo‘i, ‘ua ti‘eti‘e Eli i le nofoa i le itū ala, o lo‘o fa‘atalitali ai, auā ‘ua gatete lona loto i le ‘atola‘au a le Atua; ‘ua sau le tagata, ‘ua ta‘u mai i le nu‘u, ‘ona ‘alalaga ai lea o le nu‘u uma. 14‘Ua fa‘alogo Eli i le leo o le ‘alaga, ‘ona fai ane lea o ia, “O le a lenā ta‘alili?” ‘Ona fa‘ata‘alise lea le tagata, ‘ua sau ma fa‘ailoa mai ai ‘iā Eli. 15A o Eli ‘ua ivagafulu ma le valu ona tausaga, ‘ua tōmātūina ona mata, ‘ua lē mava‘ai.#1 Samu 3.2; 1 Tu 14.4 16‘Ua fai mai le tagata ‘iā Eli, “O a‘u nei na ‘ou sau mai le tau‘a; na ‘ou sola mai le tau‘a i le aso nei.”
‘Ua fai atu o ia, “Sole se a ‘ea lau tala?”
17‘Ua tali mai lē na ‘aumai le tala, ‘ua fa‘apea mai, “‘Ua sōsōla Isaraelu i luma o Filisitia, ma ‘ua tele le fasi o le nu‘u; ‘ua maliliu fo‘i ou atali‘i e to‘alua, o Hofeni ma Fineaso; ‘ua ‘avea fo‘i le ‘atola‘au a le Atua.”
18‘Ua o‘o ‘ina ta‘ua mai e ia o le ‘atola‘au a le Atua, ‘ona pa‘ū ai lea o ia i tua nai luga o le nofoa i tafatafa o le faitoto‘a, ‘ua gau lona ua, ‘ua oti ai, auā o le toeaina, ‘ua mamafa fo‘i ia. Na ia fa‘amasino ‘iā Isaraelu i tausaga e fagafulu.#1 Samu 4.13; 7.15
O le Oti o le Avā a Fineaso
19O le avā a lona atali‘i o Fineaso, ‘ua latalata ‘ona fānau; ‘ua fa‘alogo o ia i le tala, ‘ua ‘avea le ‘atola‘au a le Atua, ‘ua oti fo‘i le tamā o lana tane ‘atoa ma lana tane, ‘ona to‘otuli ai lea o ia ‘ua fānau, auā ‘ua fa‘afuase‘i ‘ona fa‘atigā o ia. 20‘Ua o‘o ‘ina a oti o ia, ‘ua fai mai fafine ē na tutū ai ‘iā te ia, “‘Aua le fefe, ‘ua e fānau mai sau tama tane;” a ‘ua lē tali atu o ia, ‘ua lē tu‘u i ai fo‘i i lona loto.#Kene 35.17; 1 Samu 4.11; 14; Sala 26.8; 78.61; Iere 7.12; Eseki 10.18; 11.23 21‘Ua ia fa‘aigoa i le tama, o Ikapoti,#4.21 Ikapoti: mai le gagana Eperu “E leai se mamalu.” o lo‘o fa‘apea ‘ia, “‘Ua ‘avea le mamalu nai ‘iā Isaraelu;” ‘ina ‘ua ‘avea le ‘atola‘au a le Atua, ‘ona o le tamā fo‘i o lana tane, ‘atoa ma lana tane. 22‘Ua fai ane o ia, “‘Ua ‘avea le mamalu nai ‘iā Isaraelu, auā ‘ua ‘avea le ‘atola‘au a le Atua.”
Currently Selected:
1 Samuelu 4: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
