Rum. 16

Amikmamu akuprámu

1Ii umái̱ Jépeka Seṉkrea péprunmaya̱ Yus shuaran yáiniaiti. Tí peṉker Yus shuaraiti. 2Kristu náari̱i̱n shiir wáinkiatarum. Nuamtak yachi wáinkiatniua núnisrum wáinkiatarum. Nisha chikichnasha tura winiasha tí peṉker wáitin asamtai atumsha ni atsumamusha yaiṉtarum.

3Prisirancha Akirancha wiji̱a̱i̱ métek Jesukrístunun takasáru ásarmatai amikmainiajai. 4Nisha winia uwemtikrurtai tusar jániṉkiarmiayi. Tuma asamtai yumiṉkiniajai. Tura aya wíkichu antsu ashí Israer shuarchanumia̱ Yus shuar ainia nusha yumiṉkiniawai. 5Núnisaṉ ashí Yus shuar Prisiran tura Akira je̱e̱n irunainia nusha amikmátarum. Tura winia aneamu amikiur Epenétu amikmatruatarum. Nisha Akaya nuṉkanam emka Krístun nekas enentáimtusmiayi. 6Marisha, atumji̱a̱i̱ ti takasua nu amikmatruatarum. 7Tura wí shuarsha Antrunikiusha Júniassha amikmatruatarum. Nisha wiji̱a̱i̱ sepunam pujusármai. Wiji̱a̱i̱ emka Krístun shiir enentáimtusar chíkich akatrámuja̱i̱ naṉkaamas takasáru áiniawai.

8Ampriassha Krístunam winia aneamu amikiur asamtai amikmatruatarum. 9Urpanuja̱i̱sha Jesukrístu takatrí̱ tsanintniuitji. Nisha tura aneamu Estakissha amikmatruatarum. 10Apirissha amikmatruatarum. Nisha Krístun ti shiir enentáimtamu tí paantaiti. Núnisaṉ Aristúpuru aentssha amikmatruatarum. 11Wí shuar Irutiúncha tura Narsisu shuarsha Kristu shuari̱ ásarmatai amikmatruawarta. 12Tripiniasha tura Tripiusasha Yúsnan takainia ásarmatai amikmatruatarum. Núnisaṉ ii umái̱ Pírsitia Yúsnan ti takasu asamtai amikmatruatarum. 13Rúpusha, nusha tí peṉker Yus shuar tura nukurí̱sha amikmatruatarum. Nisha wiji̱a̱i̱ nekas winia nukurua núnisaiti. 14Asiṉkritiusha, Pirikiuntisha, Ermassha, Patrupassha, Ermessha tura ashí niji̱a̱i̱ Yus shuar ainia nu amikmatruatarum. 15Núnisaṉ Jirurukusha, Júriasha, Néreusha, ni umai̱ji̱a̱i̱sha, Urimpiassha tura ashí Yus shuar niji̱a̱i̱ pujuinia nu amikmatruatarum.

16Nuamtaksha shiir áujnaisatarum. Ashí ju̱yá̱ Kristu shuari̱ amikmátmainiawai. 17Yatsuru, shuar nusháa enentáimtuiniak Yus shuaran akanainiak itiurchat awajénawai. Nu shuar wainkiarum kanaktiarum. Ni yajauch túramu átum péṉker takastin unuimiármena núnischaiti. 18Nu shuar ii Uuntri̱ Jesukrístunun takainiatsui. Antsu ni wakeramun uminiawai. Tura ti shiir chichasar nékachun anaṉkenawai. 19Átum umirman ashí shuar nékainiakui ti waraaji. Yajauch túrutsuk aya péṉker túratin enentáimsarum pujustarum. 20Yus tuke shiir pujustinian amawa nu ti wárik iwianchi úuntri̱n Satanásan nupetturmaktatui. Tura ii Uuntri̱ Jesukrístu shiir yaintmakarti.

21Timiutéusha, wiji̱a̱i̱ takáa amikmátmarme. Núnisaṉ Rúsiusha, Jasuncha, Susipatresha, mash wí shuar ainia nu amikmátmarme. 22Wi, Tersiu asan Papru chichame̱n ju̱ papinium áateakun Kristu náari̱i̱n amikmajrume.

23Káyusha amikmátmarme. Ni je̱e̱n pujaji tura ju̱i̱sha ashí Yus shuar irunainiawai. Erastusha ju̱ pepru kuítri̱n wáinniuiti. Nisha ii yachi̱ Kuártuja̱i̱ amikmátmarme.

24Ii Uuntri̱ Jesukrístu ti shiir yaintmakarti. Núnisaṉ atí.

Yus shiir awajsatai

25Wátsek, Yus shiir awajsatai. Niṉki nekas kakaram awajtámsamniaiti. Wi uwempratin chichamnum Jesukrístunun étsereaj nuja̱i̱ ikiantamprattawai. Nu chicham yámankamtaikniumia̱ nekaachmanak Yus yamaikia paant awajsaiti. 26Yaunchu Yúsnan etserin ni áarmanum nu chichaman etserkarmiayi. Tura yamaikia Yus wakerak ashí nuṉkanmaya̱ shuar Ni enentáimtusar umirkarat tusa nu Chichaman yamaikia paant awajsaiti. Yus amuutsuk tuke pujuwiti.

27Yusak Niṉki ti neka asa tura Jesukrístu tí peṉker tura asamtai Niṉki tuke shiir awajnásti.

Nuke atí.

Currently Selected:

Rum. 16: jiv

Highlight

Copy