Mar. 3

Uweje̱ jakaan Jesus tsuarma

(Mat. 12:9-14; Ruk. 6:6-11)

1Ataksha chíkich tsawantai̱ Israer shuar iruntai̱niam Jesus waya̱miayi. Nui̱ aents ámiayi, ni uweje̱ jaka. 2Tura tunaan túrayi titiai tusar wakeruiniak “ayampratin tsawantai̱ tsuártimpiash” tusar Pariséu shuarsha Jesusan ii pujuriarmiayi. 3Nuiṉkia Jesus uweje̱ jaka shuaran chicharuk “Ajapén wajasta” tímiayi. 4Nuiṉkia mamikmaun chicharuk “¿Ayampratin tsawantai̱ péṉker túratin yajauch túratniuja̱i̱ túa imiá péṉkerait. Shuar uwemtikratin mátniuja̱i̱ túa imiá péṉkerait?” tímiayi. Nuna takui̱ nisha pachischarmiayi. 5Tura Jesus kajek nin iyarmiayi tura ni enentái̱n kátsuram ásarmatai kúntuts enentáimsamiayi. Tura shuaran chicharuk “Uwejé̱m iniakmasta” tímiayi. Iniakmasmatai ni uweje̱ jákauya nu ataksha péṉker ajatsamiayi. 6Nuyá̱ Pariséu shuar jíinkiar Jesus maami tusar Irutis shuarja̱i̱ áujmatsarmiayi.

Untsurí shuar Jesusan káutkarma

7Nuyá̱ Jesus ni unuiniamuri̱ji̱a̱i̱ antumiaṉnum wémiayi. Kariréanmaya̱ tura Jutanmaya̱sha untsurí shuarsha Jesusan nemariarmiayi. 8Untsurí nuṉkanmaya̱sha káunkarmiayi. Jutanmaya̱sha Jerusaréṉnumia̱sha Itiumíanmaya̱sha Jurtan amainia̱sha Tiru tura Setun pepru pujuinia nú nuṉkanmaya̱sha untsurí shuar ni túramuri̱n nekaawar Jesusan káutkarmiayi. 9Untsurí káunkar chanuntawara̱i̱ṉ tusa Jesus ni unuiniamuri̱n kanuram inianástarum tusa seamiayi. 10Kame untsurí shuaran Jesus nuik tsuaru asamtai jaa shuar nui̱ káunkarmia nu Jesusan antiṉtaj tusar shitianainiakui nuna seamiayi. 11Tura iwianchrukusha Jesusan wáinkiar tikishmátrarmiayi. Untsumainiak “Ame nekas Yusa Uchirí̱nme” tiármiayi. 12Tura nuna etserkairap tusa Jesuska kakantramiayi.

Jesus tuse shuaran anaikiarma

(Mat. 10:1-4; Ruk. 6:12-16)

13Nuyá̱ Jesus nainnium wakamiayi. Tura anaikiatniun wakerimia nú shuaran untsukmiayi. Tura nisha Jesusan weriarmiayi. 14Tura Niji̱a̱i̱ wekasar Yus Chichaman unuiniartinian tuse shuaran anaikiarmiayi. 15Nuyá̱ suṉkur tsuártinian tura íwianch ji̱i̱ki̱ akupkatniun nu shuaran ni kakarmari̱n súsarmiayi. 16Ju̱ shuar anaikiarma ármiayi, Semuṉ, Jesus chíkich náarin Pítiur apujtusmiania nu 17tura Sepetéu uchirí̱ Jakupu, ni patái̱ Juaṉsha, ipiamtaja̱i̱ métek kakaram ásarmatai nuna mai̱ “Puanérjis” naari̱ susamiayi. Nusha shuar chichamja̱i̱ṉkia “ipiamat” tawai. 18Nuyá̱ Antressha, Jirip, Parturumí, Matéu, Tumas, Arpeu uchirí̱ Jakupu, Tateu, Ásump Semuṉ, 19Jútas Iskariúti. Jesusan ukunam surukmia nú Jútasauyayi. Anaik amukmatai je̱á̱ waketrarmiayi.

Yusa Wakaní̱n yajauch chicharma

(Mat. 12:22-32; Ruk. 11:14-23; 12:10)

20Waketkiarmatai ti untsurí shuar táarmatai takatri̱ ti akui yurumátniun jeacharmiayi. 21Jesusa shuari̱sha nuna nekaawar Jesus ti itiurchat pujus wáurtsuash tu enentáimsar jukitiai tusar nu je̱a̱nam jeariármiayi.

22Nuyá̱ Israer shuara jintinniuri̱ Jerusaréṉnumia̱ taarmia nu Jesusan áujmatainiak “Pirsepú eṉkea asa iwianchrukuiti. Tuma asa iwianchi uuntri̱ kakarmari̱ji̱a̱i̱ iwianchin ji̱i̱ki̱ akupeawai” tiármiayi. 23Tutai Jesus winitiárum tusa nin untsukmiayi. Tura enentáimtikrataj tusa ju̱na tímiayi “¿Íwianch Satanáskesha itiur ajapmamatiṉᵏⁱ? 24Chikichik nú nuṉkanmaya̱ shuar nuamtak kajernaiyakuiṉkia, nu nuṉka wari meserchattawak. 25Nuamtak shuar ni shuari̱ji̱a̱i̱ kajernaiyakuiṉkia nu shuarsha amunaikchartatuak. 26Núnisaṉ ¿Satanáskesha ni suntari̱ji̱a̱i̱ mániakka itiurak tuke pujusárat? Amunaikiartatui. 27Kakaram shuara nuna je̱e̱n náṉkamas aents wayá̱ nérenniun jiṉkiatsuk ni kuítri̱n kasarkachminiaiti. Antsu emka nérenniun jiṉkiá ni kuítri̱nkia kasarkamniaiti. 28Nekas tájarme, shuar tunáa ashí túruinia nuka tsaṉkuramniaiti. Winiasha winia Aparnasha yajauch áujmatusha tsaṉkuramniaiti. 29Antsu Yusa Wakaní̱n yajauch áujmatna nuka tsaṉkurachminiaiti antsu nu shuar niṉki tuke sumamattawai” tímiayi. 30“Jesuska iwianchrukuiti” tuíniakui Jesus nuní̱ tímiayi.

Jesusa yachi̱ tura nukurí̱

(Mat. 12:46-50; Ruk. 8:19-21)

31Nuyá̱ ni yachi̱ ni nukurí̱ji̱a̱i̱ taar a̱a̱ wajasar Jesusan untsukat tusa akupkarmiayi. 32Shuar Jesusan téntak pujuarmia nu chicharainiak “Iis, nukusha, yatsumsha a̱a̱ wajasar untsurmainiawai.” 33Tutai Jesus chichaak “Winia nukursha yatsursha ya ainia” tímiayi. 34Nin téntakar pujuarmia nuna iis “Ju̱i̱ti winia nukurka tura yatsurka. 35Shuar Yusa wakeramuri̱n umirainia nu winia yatsuruiti, winia umaruiti, winia nukuruiti” tímiayi.

Currently Selected:

Mar. 3: jiv

Highlight

Copy