Ruk. 6

Ayampratin tsawantai̱ trikiu neren achikma

(Mat. 12:1-8; Mar. 2:23-28)

1Ayampratin tsawantai̱ Jesussha unuiniamuri̱ji̱a̱i̱ araamunam wekasar unuiniamuri̱sha trikiu maju̱r júkiar tishirar neren yúarmiayi. 2Nuna túruiniakui Pariséusha chichainiak “Maa atumsha ayampratin tsawant takaschatniua nui̱ ¿urukamtai takaarum?” 3Takui̱ Jesus aya̱k “Yaunchu úunt akupin Tawitcha tura nemarniusha tsukamainiak túrawarmia nu ántichukaitrum. 4Tawit Yusa Je̱e̱n wayá̱ Yus Iiji̱a̱i̱ Pujawai tama páṉkan yuámiayi tura nemarainiancha ajamsamiayi. Tura náṉkamas aents nú páṉkan yúashtiniuyi antsu aya Yúsnan pujurniuk yúatin ármiayi. 5Núnisnak Wisha Aents Ajasuitjiana ju̱ka ayampratin tsawantan Nérenniuri̱ntjiai” tímiayi Jesus.

Shuar uwejé̱ jakaan Jesus tsuarma

(Mat. 12:9-14; Mar. 3:1-6)

6Chíkich ayampratin tsawant Israer shuar iruntai̱ je̱a̱nam Jesus wayá̱ unuiniartajtsa naṉkamamiayi. Nui̱ shuar untsuur uwejé̱ jaka pujumiayi. 7Tura Israer shuara jintinniuri̱sha Pariséusha Jesusan “yajauch túrayi” titiai tusar wakeruiniak ju̱ ayampratin tsawantai̱ nu shuaran tsuártimpiash tusar ii pujuarmiayi. 8Túrasha Jesuska ni enentáimmiari̱n nekariarmiayi. Túmayat uweje̱ jakaan chicharuk “Ju̱i̱ ajapén wajasta” tutai áishmaṉ ajapén wajasmiayi. 9Nuiṉkia matsamiarmia nuna Jesus chicharainiak “Enentáimpratarum. Ayampratin tsawantai̱ yajauch túratin, péṉker túratniuja̱i̱ ¿túa péṉkerait? ¿Uwemtikratin, mátniuja̱i̱sha túa péṉkerait?” tímiayi. 10Nuyá̱ téntakarmia nuna iis áishmaṉkan chicharuk “Uwejé̱m takuitia” tutai áishmaṉsha uwejé̱n takuí nú chichamaik péṉker ajasmiayi. 11Tura chíkichkia ti kajerkarmiayi. Túrawar “Jesus warí itiurkamniakit” tusar aniniaisarmiayi.

Tuse unuiniamuri̱n Jesus anaikiamu

(Mat. 10:1-4; Mar. 3:13-19)

12Nuyá̱ Jesus Yusan áujsataj tusa nainnium wakamiayi. Tura nu kashi Yusan au áujkua tsawa̱rmiayi. 13Tsawa̱rmatai unuiniamuri̱n ikiankar tuse anaikiamiayi. “Winia akatrámuruitrume” tímiayi. 14Ju̱ ármiayi. Emka, Semuṉ chíkich naari̱ Pítiur apujtusmia nu; tura nuyá̱ ni yachi̱ Antres, Jakupusha, Juaṉsha, Jiripsha, Parturumísha, 15Mateusha, Tumassha, Arpeu uchirí̱ Jakupusha, Ásump Semuṉsha, 16Jakupu yachi̱ Jútassha, tura Jútas Iskariúti Jesusan ukunam surukmia nu. Nu tuse achikma ármiayi.

Jesus untsurí shuaran yáiṉkiarma

(Mat. 4:23-25)

17Jesus niji̱a̱i̱ náinniumia̱ pakanam táawarmiayi. Nui̱ pujusármiayi. Nui̱sha untsurí unuiniamuri̱sha núnisaṉ Jutanmaya̱ tura Jerusaréṉnumia̱ nuyá̱ nayantsanam ayamach Tiru tura Setun péprunmaya̱ tí untsurí aents antuktaitsar káunkar Jesus tsuárati tusar pujuarmiayi. 18Íwianch wáitkiainiamusha tsuámararmiayi. 19Jesusan antiṉkian tsuákrattai kakarmari̱ jíiniun tsuámartaj tusar ashí shuar wakeriarmiayi. Túrawar ashí tsuámarmiayi.

Nainnium Jesus etserkamu

(Mat. 5:1-12)

20Ni unuiniamuri̱n Jesus paṉkái̱ iis chicharuk “Átum atsumarum nu, Yus akupeamunam páchitkia asarum shiir enentáimpratarum. 21Tura yamái tsukamarmena nu ukunam ejemartatrume. Tuma asamtai shiir enentáimpratarum. Yamái útrumna nusha ukunmaṉka wishirtatrume. Tuma asamtai shiir enentáimpratarum. 22Núnisaṉ atumín aents nakitrámprarmataisha ajapramawarmataisha tura Wi Aents Ajasu tutaiya nú shuar ajasuíti tusar tsanumprutmak katsekramkarmataisha shiir enentáimpratarum. 23Nuna túramtai nayaimpiniam ti shiir ana nu núkap sunastin átatui tu enentáimsarum ti warastarum. Warí ju̱ shuara uuntri̱ yaunchu Yúsnan etserniun nútiksaraṉ yajauch awajsacharmakia. 24Antsu kuítrinniutiram atumsha atumí waratairi̱ aya yamaik wáintrume. Tura ukunmaṉka waraschattarme. 25Atsumatsjai tu enentáimprumna nu, ukunmaṉka atsumattarme. Nuiṉkia waraschattarme. Yamái wishíarmena nu ukunmaṉka wáitiakrum úttiatrume. Nuiṉkia waraschattarme. 26Ashí aents atumín shiir awajtámkurmin aneartarum. Nuja̱i̱ waraschatniuitrume. Warí ni uuntri̱ ántar yúsnan etserin armia nuna nútiksaraṉ yaunchu shiir awajsarmiayi.

Némas aneatniun Jesus unuiniamiayi

(Mat. 5:38-48; 7:12)

27 Winia anturtatirmin ju̱na tájarme. Ame nemasrum aneata, nakitramainia nusha shiir awajsata, 28yajauch chichartamainia nusha shiir enentáimtusarta, katsekramainia nusha Yus áujtusarta. 29Ame yapimin ijiutmamtai aatú yapirui̱sha ijiuti tusam iniaktusta. Ame pushirmin jurutrámkitiaj tuíniakuisha sakurmin jukit tusam iniaisata. 30Seatmana nu susata tura áminiun jurutrámainiakuisha ataksha awaṉturkitia tiip. 31Chíkich winia túrutat tusam wakeramna nútiksamek chikicha túrata.

32 Iistá, aya atumniak anenmainia nuke aneakmesha ¿nusha warí péṉkera túrarum? Yajauch shuarsha nuna túrin áiniawai. 33Tura atumín péṉker awajtámainia nuke péṉker awajkurmesha ¿nusha warí péṉkera túrarum? Yajauch shuarsha nuna túrin áiniawai. 34Awaṉturkimnium tu enentáimsarum íkiakrumsha ¿nusha warí péṉkera túrarum? Yajauch shuar nuamtak yajauch shuarja̱i̱ awaṉturkimniaiti tu enentáimsar ikianainiawai. 35Tura atumsha nemasrum aneatniuitrume tura péṉker túratniuitrume tura awaṉturkimnium tútsuk ikiastiniaitrume. Túrakrumni̱ṉkia Uunt Yus péṉker akirmáktatrume tura ni uchirí̱ntji̱a̱i̱ tu iniakmastatrume. Yuska ‘yumiṉsajme’ ticha nunasha tura yajauch shuarnasha waitnenniuiti. 36Atumí Aparí̱ waitnenkartin asamtai waitnenkartin atarum.

Chikicha túramuri̱ ti enentáimtusairap

(Mat. 7:1-5)

37 Yajauchiti tiip amincha turamai. Nisha jú̱niniaiti tiip amincha túmaiti turamai. Antsu tsaṉkurnáiratarum. Núnisaṉ Yus tsaṉkurtámprattawai. 38Chikicha susata. Núnisaṉ Yus atumín suramsattarme. Nisha péṉker nekapma tura núkap ati tusa teeka awajás tura patas núkap eṉkea emetsai̱ amastatui. Átum chíkich túrarmena nútiksaṉ atumniasha túrutmattarme.”

39Tura nuya̱sha ju̱na métektaku chichaman ujakármiayi “Ji̱ kusurúsha ¿itiurak chíkich kusurúncha jukimniait. Mái̱ metek wa̱a̱nam iniaashtatuak? 40Unuiniamua nu unuiniana nuna naṉkaamas áchatniuiti. Túrasha nisha tí unuimiátar unuiniana nuja̱i̱ métek nekaamniaiti.

41 ¿Itiurtsuk atumí ji̱n numi eṉketna auk íitskesha atumí yachí̱ ji̱n tsuat eṉketusha iyarum? 42Ame jí̱mi̱i̱n numi tuke eṉketai̱sha ¿itiurtsuk ame yatsumi ji̱ya̱ tsuátan jurustájme tame? ¡Ántraitrume! Emka ame jí̱mi̱i̱n numi eṉketna nu jusata. Nuiṉkia paant wainkiattame yatsumi ji̱n tsuat eṉketna nu jurustin.

Nere̱ja̱i̱ numi nekaatainti

(Mat. 7:17-20; 12:34-35)

43 Péṉker numi yajauchin nereatsui tura yajauch numi péṉkeran nereatsui. 44Numisha ni nere̱ja̱i̱ nékanui. Tsachikniumia̱sha kushiṉkiap júukchamniaiti. Tura naranmaya̱ shuinia júukchamniaiti. 45Núnisaṉ péṉker shuar ni enentái̱ péṉker asamtai péṉkeran chichaawai tura yajauch shuar, enentái̱ yajauch asamtai yajauchin chichaawai. Páantchakait. Enentáin pimiutkamu ana nuya̱ṉ ni wene̱ja̱i̱ chichaawai.

Jimiará je̱a̱ ukurtin

(Mat. 7:24-27)

46 Wi tájana nu túrachiatrumsha ¿urukamtai Winia, Uuntá, túrutrum? 47Shuar Winia chichamprun ántuinia nu je̱a̱ je̱a̱mmaja̱i̱ métekete. Winia anturtuk umíana nu ju̱ja̱i̱ métekete. 48Shuar je̱a̱n je̱a̱muk emka init taur kayanam ukurmai. Tura yumi ti yutuk, entsa nujaṉkrua tukummaitiat kayanam ukuamu asa pukukachmai. 49Antsu Winia anturtukiat umíatsna nuka ju̱ja̱i̱ métekete. Shuar je̱a̱n je̱a̱muk náikminiam je̱a̱mmai. Tura entsa nujaṉkrua tukumpram nu je̱a̱ka pukukamai. Tura mash sáantramai.” Tu unuiniamiayi Jesus.

Currently Selected:

Ruk. 6: jiv

Highlight

Copy