Naṉ. 44

Jusé umutairi̱

1Nu naṉkaamasmatai Jusé ni takarniúri̱ úuntri̱n akupeak chicharuk “Jú̱ aishmaṉkan kustari̱i̱n yurumak júkitniun jeainia nuja̱i̱ métek áimprurarta. Tura nui̱ aṉkant aṉkant pátatek kuit eṉketáwarta. 2Nútiksamek winia umutai̱r kuitji̱a̱i̱ najanamu ékechi kustari̱i̱n tura ni kuítri̱ji̱a̱i̱ apattukam pátatek eṉketáta.” Tutai takarniu úuntri̱sha Jusé timia núnisaṉ túramiayi.

3Nuyá̱ Jusesha káshik ni yachi̱ncha umpururi̱ntiuk wéarti tusa tsaṉkatkamiayi. 4Túrasha péprun ikiukí̱ yajá ajainiatsa̱i̱ṉ Jusé ni takarniúri̱ úuntri̱n akateak “Jú̱ aishmaṉ wéarainia nu apapékarta. Túram amayá̱ṉkam ‘Waitnentamaitiatrum yumiṉkiartichuitrume. ¿Urukamtai kuitji̱a̱i̱ najanamu umutai̱sha kasamkarum? 5Nu umutai̱ji̱a̱i̱ winia úuntur ¿úmichukait tura nisha nekamchakait? Kame nu kasamka asarum ti yajauch túrarme’ tú titiá” tímiayi.

6Tura ni takarniúri̱ úuntri̱sha apapék amayá̱ṉkar Jusé akatrámia nútiksaṉ tiármiayi. 7Takui̱ “¿Urukamtai amesha nunisha iincha tukartam? Nuka iikia peṉké túrachaintji. 8Warí nuiksha iikia Kanaannum jear kustar atíar iikmar kuit wáinkiar ataksha awaiṉkir ikiuimji. Túriniaitiatrisha kuitcha tura kurisha ame úuntrumi je̱e̱nia̱sha itiurak kasamkaintiajⁱ. 9Nui̱ṉkia yana kustari̱ya̱ akupniu umutairi̱ kuitji̱a̱i̱ najanamu eṉketu wainniaktata nuka mantamnati. Túrunamtai nui̱ṉkia iisha ni takarniúri̱ ártái” tiármiayi.

10Nuya̱ṉka takarniu úuntri̱sha chicharainiak “Wátskea, átum tárumna núnisaṉ atí. Antsu kuitji̱a̱i̱ najanamu umutai̱n takakna nuke winia iniatai̱r átatui. Antsu chikichtirmeka aṉkant wétatrume” tímiayi. 11Nuya̱ṉka tí warik umpururi̱nia̱n kustaran akakiar atirármiayi. 12Tura takarniu úuntri̱sha kustaran atirármatai iwia̱i̱ri̱ kustari̱ya̱n e̱a̱tan juarki̱ wesa iniaṉnamu yachi̱ Piṉjiamínia̱ kustari̱n ejekamiayi. Tura ni kustari̱n kuitji̱a̱i̱ najanamu umutai̱ eṉketun wainkiamiayi.

13Nuya̱ṉka mash tí kuntuts enentáimprar ni pushiri̱n ja̱a̱karmiayi. Túrawar aṉkant aṉkant yurumkan umpurun áentskar péprunam ataksha waketrarmiayi. 14Tura Jutá ni yachi̱miak Juseka ni je̱e̱ni̱ṉ pujanak jeariármiayi. Jeariar nuṉká antiastatuk tsuntsumpruáwarmiayi. 15Túmainian Jusé wainiak chicharainiak “¿Warí itiurkarum. Chíkich áishmaṉ nekaachminian nékaitjiana nuka átumka nékatsrumek?” tímiayi.

16Nuyá̱ Jutasha chichaak “Uuntru, amincha ¿warí tíintjik. Itiura iiksha péṉker túriniaitji túmamtiajⁱ? Kame yajauchin túrin asakrin Yuska nekáa jú̱tikramaji. Yamaikia uuntru amincha ¿warintiajik? Umutai̱n takakna nuja̱i̱ métekrak mash ame iniatai̱ram ártatji” tímiayi. 17Takui̱ Jusesha aya̱k “Núnaka peṉké túrashtatjai. Antsu aya umutai̱n takakna nuke winia iniatai̱r átatui tura chikichtirmeka apái̱ péṉker waketkittiarum” tímiayi.

18Nuya̱ṉka Jutá Jusen weantuk chicharuk “Parauṉka núniniaitme uunta, túrasha wi ju̱na seajme, waitneasam kajertukaip. 19Amesha anintrakum ¿apasha áwak tura chíkich yatsumsha áwak? tíchamkum. 20Tura iisha ayakur ‘Ee, takakji ii aparí̱sha túrasha tí uuntchiti tura ii yachi̱sha iiya ju̱ uchich awai’ tímiaji. Nisha ii aparí̱ úuntach ámanum akiiniaiti. Maa, nincha aparí̱ ti aneawai. Kame nú nuwa̱nmaya̱ṉ chíkich ni yachi̱nkia jákaiti. 21Tura amesha ‘Yátsum itiartitiarum, nekaattsan wakerajai’ tíchamkum. 22‘Nisha, aparí̱n ikiukchamniaiti. Warí aparí̱ya̱ kanaakuiṉkia apa jakamniaiti’ tíchamkajⁱ. 23Túrasha iin tukartimiame ‘Ni winiachkuiṉkia táirap’ tíchamkum. 24Tura ii aparí̱i̱n waketkir ame tímiam nu ashí ujakmaji. 25Chíkich tsawantai̱ ii aparí̱ chichartamuk ‘Ataksha waketkirum yurumak ishichik sumakrum utitiarum’ turammaji. 26Tura iisha nuna túramkurin chicharkur ‘Ii yachi̱ ékechia nu iiji̱a̱i̱ wéachkuiṉkia peṉké wéchamniaitji. Warí ni iiji̱a̱i̱ wéachkuiṉkia nú akupniui̱ jeachminiaitji’ tímiaji. 27Tutai ii aparí̱sha ataksha chichartamuk ‘Winia nua̱r Riwikiaka uchinkia jímiarchiniak takusmia nuka atumsha nékarme 28nuyá̱ chíkichkia yaunchu meṉkakamiayi. Wikia yajasma yúachuashit tu enentáimniuitjiai. Yamaiya̱ ju̱i̱sha peṉké wainkiachuitjiai. 29Tura ju̱sha nékachma jintiá meṉkaakuiṉkia wi uu útkuan wárik weamsan jákaintjiai.’ Tú turammaji. 30Warí ii aparí̱ nú uchinkia ti anen asamtai ataksha awaiṉkir ejeyachkurni̱ṉkia 31nú uchin ataksha wáinchakka ii aparí̱ṉkia jákainti. Nu túrakrikia ii aparí̱ úuntach asa nú kúntutsja̱i̱ pujus jáakuiṉkia iik túrawaintji. 32Kame wiki aparun chicharkun ‘Uchiram aneam nuna awaiṉkin itiachmataiṉkia wiki tuke makurma juaktajai’ tímiajai. 33Tuma asamtai wi ámin seajme, úchikia waketkiti. Antsu wi ju̱i̱ ame iniatai̱ram juaktajai. Niṉkia ni yachi̱ji̱a̱i̱ waketkitin tsaṉkatrukta. 34Nú uchi wiji̱a̱i̱ waketchakuiṉkia ¿itiurak wisha aparuí̱ waketkincha jeataj? Uchi jeachmatai apar wáitian íistinian nakitiajai” tímiayi Jutá.

Currently Selected:

Naṉ. 44: jiv

Highlight

Copy