Naṉ. 37

1Jakupsha Kanaannum yaunchu ni aparí̱ pujuuya nui̱ we pujusmiayi.

Jusé ni yachi̱ji̱a̱i̱

2Ju̱ka Jakupa shuari̱ túramun áujmatui. Jusesha tiasisiáti uwí takakuya nui̱ ni yachi̱ji̱a̱i̱ métek murikiun wáinniuyayi. Nisha ni aparí̱ nuwé̱ Pira uchirí̱ tura Serpa uchirí̱ji̱a̱i̱ irunar pujumiayi. Tura ni yachi̱ yajauch túruiniamun Jusé ni aparí̱n ujamiayi.

3Kame Jakupsha, Israer tutai, tí uuntach ai̱ Jusé akiinia asamtai chíkich uchirí̱ armia nuja̱i̱ naṉkaamas ti aneemiayi. Tuma asa pushí nuntuarun tí peṉkeran najatamiayi. 4Tura ni aparí̱ ashí ni uchirí̱ armia nuja̱i̱ naṉkaamas aya Jusenak aneak ti shiir awajeakui ni yachi̱sha wainiainiak kajerainia ásar ishichkisha shiir enentái̱ji̱a̱i̱ṉkia áujcharmiayi.

5Tura chíkich tsawant Jusé mesekrampramia nuna yachi̱n ujakármiayi. Túram nisha nú naṉkaamas nakitiarmiayi. 6Kame nincha Jusé chicharainiak 7“Anturtukkua, iisha mesekranam mash ajanam pujuarmajⁱ tura nui̱ trikiu numirtiuk tsupirar jiṉkiakarmajⁱ. Tura wí jiṉkiamuka paṉkái̱ naka wajasma. Tura átum jiṉkiamuka wí jiṉkiamun téntakar tsuntsumpruáwarma” tímiayi. 8Tutai yachi̱sha áiniak “¿Tú takumka nuikia ámeka iin akupniuk átatam tura iinkia nupettamkaak átatam?” tiármiayi. Kame Jusé mesekrampramuri̱n ujam nuna naṉkaamas kajerkarmiayi. 9Tura Jusé ataksháa mesekramar yachi̱n ujainiak “Nekaatarum, ataksha mesekramkun etsa̱sha tura kashi nantuncha aunse yaancha wainiainiaj. Tura nusha mash winia tikishmátruinia” tímiayi. 10Tura Jusé ni mesekrampramuri̱n aparí̱ncha núnisaṉ yachi̱ncha ujakármiayi. Túrasha aparí̱ kakanteak “¿Nusha warí, tuusha mesekrampram? ¿Nui̱kia ame nukusha yatsumsha tura wisha ámin tikishmáttiatjik?” tímiayi. 11Yachi̱sha nuna anturkar suir iyarmiayi. Túrasha ni aparí̱ṉkia nú mesekran ti enentáimtimiayi.

Jusen ni yachi̱ surukarma

12Tura chíkich tsawantai̱ ii aparí̱ murikrí̱ ayuratin sa̱a̱k e̱a̱ktai tusar Jusé yachi̱sha Sekim nuṉkanam wéarmiayi. 13Tura ishichik tsawant naṉkaamasmatai Israer Jusen chichareak “Anturtukia, Sekimnum yátsum murikiun wáiniuk pujuiniatsuk. Nui̱ werim iyuwarta” tutai Jusesha “Ayu” tímiayi. 14Takui̱ Israersha “Weme yatsumsha tura muriksha péṉkerash pujuinia iisam tame ujatkata” tímiayi. Tura akupeak Epruna pakarí̱ya̱ akupkámiayi. Túram Jusé Sekimnum jeamiayi. 15Nui̱ jeá e̱a̱kní̱ wekaan aents wainiak “¿Warí wekatam?” tímiayi. 16Tutai “Winia yatsurun e̱a̱iniakun wekaajai. ¿Tura ame nékatsmek tui̱ṉ murikiun wáiniuk pujuinia?” tímiayi. 17Tutai nú aents aya̱k “Tutan nuṉkanam wéartai tuinian anturkajai, ju̱ya̱ṉka wéaruiti” tímiayi. Tutai yachi̱n e̱á̱a̱ wekas Tutannum pujuinian wáinkiarmiayi.

18Nui̱sha Jusé jeachat winianak wáinkiar mátniun chichaman jurusármiayi. 19Nisha nuamtak chichainiak “Nuá iiskua mesekramin winiana. 20Wats auka tatí. Támatai maatai. Maar wá̱a̱nam aju̱a̱tai. Túrar yajasma yuayi titiái. Wátskea mesekrari̱ urukatpi” tiármiayi.

21Tura Ruwin nuna antuk yachi̱n uwemtikrataj tusa wakera asa chichaak “Antsu mashtai. 22Numpe̱sha puámtikrairap antsu íwiaakuk atsamunam jú̱ wa̱a̱ ana ju̱i̱ aju̱a̱tarum. Kame maatá tímiauka máwairap” tímiayi. Kame Jusen uwemtikiar aparí̱n iwiaakun awaiṉkitiaj tusa wakerak tímiayi. 23Tura Jusesha yachi̱ pujuarmia nui̱ támiayi. Támatai nuntuaru pushiri̱n áitiak jurukiarmiayi. 24Tura achikiar júkiar wa̱a̱ ju̱ju̱ptinnium aju̱a̱warmiayi. 25Nuna túrawar yurumátai tusar pujusármiayi. Nui̱ pujusár kamiyusha tura untsurí Ismaer aentssha Karaat nuṉkanmaya̱ wininian wáinkiarmiayi. Tura kuṉkuinian pársamun nuyá̱ míran Ejiptunam suruktinian kamiyunam juármiayi. 26Nui̱ṉkia Jutá ni yachi̱n chicharainiak “Ju̱ ii yachi̱ maarsha tura u̱kri̱sha ukunam ¿warí péṉkera wainkiattajⁱ? 27Mashtai antsu Ismaer shuarai̱ suruktai. Warí ii yachi̱nchukait” tímiayi. Nuna takui̱ ni yachi̱sha métek chichasar Jusen surukarmiayi. 28Ismaer shuar Matianmaya̱ naṉkaamainiakui ni yachi̱n wá̱a̱nmaya̱ júsar painti kuitji̱a̱i̱ surukarmiayi. Nisha Jusen sumakar Ejiptunam júkiarmiayi.

29Nuyá̱ árusaṉ Ruwin ataksha waketki̱ wá̱a̱nam iyaj tukamá Jusé atsakui tí kuntuts enentáimiar ni pushiri̱n já̱a̱kmiayi. 30Nuya̱ṉka chíkich yachi̱ pujuarmia nui̱ waketki̱ jeá chicharainiak “Uchisha yamaikia meṉkakayi tura yamaisha wisha ¿Tui̱ṉ wétaj?” tímiayi.

31Nui̱ṉkia Jusé yachi̱ armia nu Jusé pushiri̱n jukiar chipiu uchichin numpe̱ja̱i̱ imiarar númpak awajsarmiayi. 32Túrawar aparí̱n akupénak “Ju̱ wainkiamji. Nekaata, nekas ame uchirmi pushiri̱nchukait” tiármiayi. 33Tura Jakup nuna wainiak nekáa “Nekas winia uchiru pushiri̱nti. Náṉkamas yajasmaksha yúachuashit” tímiayi. 34Tinia Jakupsha pushiri̱n ja̱a̱k útkur entsatáin entsarmiayi tura ni uchirí̱ meṉkaka asamtai núkap tsawant útmiayi. 35Ni uchirí̱sha tura ni nawantrí̱sha nea̱ nútsumtikratniun wakeriarmiayi. Túrasha ni uchirí̱ jaka asamtai nisha nea̱ nútsumtikrurara̱i̱ṉ tusa nakitmiayi. Tura chichaak “Wikia uchir jakamun pachisan uu útkuan jákatniuitjiai” tímiayi.

36Túrasha Matiannumia̱ aents, Jusen Ejiptunam ejeniar Putipiárai̱ surukarmiayi. Putipiársha Ejiptunam akupin Parauṉkan yáintri̱yayi. Núnisaṉ Parauṉka wáinin suntara úuntri̱yayi.

Currently Selected:

Naṉ. 37: jiv

Highlight

Copy