Naṉ. 14

Ráutan Apram ata̱i̱miu

1Yaunchu Amprajuír Senar nuṉká akupniúri̱yayi. Núnisaṉ Ariuk Irasár nuṉká akupniúri̱yayi tura Kitiuraumír Iram nuṉká akupniúri̱yayi. Titiarsha Kuim nuṉká akupniúri̱yayi. Nu akupin pujuarmia nui̱ 2Sutuma pepru akupniúri̱ Páiraja̱i̱ tura Kumura pepru akupniúri̱ Pírsaja̱i̱ núnisaṉ Atma pepru akupniúri̱ Senapja̱i̱ tura Sepuim pepru akupniúri̱ Semipírja̱i̱ nuyá̱ Piria pepru akupniúri̱ji̱a̱i̱ mesetan najanawarmiayi. Kame Piria pepru chíkich náari̱ṉkia Suáraiti. 3Ashí nu akupin armia nu mesetan najanatai tusar Setimia pakarí̱i̱n Jeákú Nayantsa nui̱ iruntrarmiayi. 4Warí tuse uwí Kitiuraumíran umiriarmiayi. Nuyá̱ traise uwí jeamtaiṉkia umirkacharmiayi. 5Tura katurse uwí jeamtai Kitiuraumírsha tura chíkich akupin armia nuja̱i̱ Astarútkarnaim nuṉkanam táarmiayi. Túrawar Repa aentsnasha nupetkarmiayi. Nuyá̱ Kaam nuṉkanam Susem aentsnasha nupetkarmiayi. Nuya̱sha Sawikiriataim nuṉkanam Imiit aentsnasha nupetkarmiayi. 6Nuyá̱ Jur shuarnasha Sair nainnium tura Parana pakarí̱n pujuarmia tímianaisha nupetkarmiayi. Kame Paranka kampuntin atsú nuṉkanam ayamchiti. 7Tura Kitiuraumírsha nuyá̱ niji̱a̱i̱ pujuarmia nusha waketainiak Inmispátnum chíkich naari̱ Káatish nuṉkanam jeawarmiayi. Túrawar Amarík aentsnasha nuyá̱ Amur aentsnasha Asesúntamar nuṉkanam pujuarmia nunasha ashí amukármiayi.

8Tuma asamtai Sutumanmaya̱ tura Kumuranmaya̱ nuyá̱ Átmanmaya̱sha Sepuimnumia̱sha ántsaṉ Píriaitiat Suárauya̱ nuya̱sha úunt akupniusha mesetan juárkitiai tusar Setimia pakarí̱n iruntrarmiayi. 9Kame Iramnumia̱ úunt akupin Kitiuraumírja̱i̱ tura Kuimnumia̱ úunt akupin Titiarja̱i̱ nuyá̱ Senarnumia̱ úunt akupin Amprajuírja̱i̱ núnisaṉ Irasárnumia̱ úunt akupin Ariukja̱i̱ mesetnum mániatai tusa nisha iruntrarmiayi. Túmainiak seṉku úunt akupin kuatru úunt akupniuja̱i̱ mániatai tusar mesetan jurunáisarmiayi. 10Kame Setimia pakarí̱ tépakmanumka tí nukap wa̱a̱ irunmiayi. Nui̱ sekata ánin kuta pajampra ármiayi. Tura Sutuma nuyá̱ Kumura akupniúri̱sha mániamunmaya̱ pisainiajⁱ tukamá nú wa̱a̱nam iniawarmiayi. Tura chíkich uunt armia nuka muraani̱ pisararmiayi.

11Nui̱ mesetnum awakmakaruka Sutumanmaya̱ tura Kumuranmaya̱ aentsu yurumkari̱n ántsaṉ wariri̱ iruniarmia nuna yarurkar wéarmiayi. 12Nui̱ Aprama kaná uchirí̱ Raut Sutumanam pujumiayi. Nunasha achikiar ashí wariri̱ntiuk júkiarmiayi. 13Túrasha mesetnumia̱ uwemprarmia nuyá̱ chikichik áishmaṉ Ipríu áishmaṉkan Apraman werí mash ujakmiayi. Kame Apramka Mampri kampunniuri̱i̱n pujumiayi. Mámprisha tura ni yachi̱ Iskursha nuyá̱ Anirsha Amur aents ármiayi. Nisha Apramja̱i̱ métek chichasar matsamin ármiayi.

14Tura Apramka ni kaná uchirí̱n achikiar júkiarai táman antuk traisiantu tiasiúchu suntar takarniúri̱n nin pujusár akiiniawaru armia nuja̱i̱ Tan nuṉka tímianai pataatukarmiayi. 15Túrawar Apramka ni suntari̱ji̱a̱i̱ nuyá̱ iniatairi̱ji̱a̱i̱ aya aneachma kashi jeariar mesetja̱i̱ nupetkam pisainiakui apapékar Tamaskunam arakaani̱ Upa nuṉkanam ejeniarmiayi. 16Tura mesetnum awakmakar mash yarurkamuya̱ nunasha atantrarmiayi. Nuní̱ tura Apram ni kaná uchirí̱n Ráutan ata̱i̱miayi. Tura ashí niniu meṉkararmia nunasha Ráutan awaṉturmiayi. Nuwa̱ncha tura chíkich aents misatak júkiarmancha Apramka ata̱i̱miayi.

Mirkiseték Apraman péṉkerja̱i̱ yumiṉkramu

(Isr. 7:1-28; 8:1-2)

17Tura Apram Kitiuraumíran nuyá̱ uunt niji̱a̱i̱ pujuarmia nuna nupetak waketmiayi. Tumai̱ Sutuma akupniúri̱ Sawi paka, akupin mánitiai paka tamanum Apraman áujsataj tusa jiintiukmiayi. 18Tura Sarema akupniúri̱ nuyá̱ naṉkamantu Yúsnan pujurin Mirkiseték páṉkan wíniuja̱i̱ ajamas 19Apraman shiir awajás chicharuk

“Naṉkamantu Yus nayaimpincha nuṉkancha najanamia nu péṉker iirmasti.

20Núnisaṉ Naṉkamantu Yus ame nemasrum nupetkatniun amasmia nuna naari̱ uunt awajnásti” tímiayi.

Takui̱ Apramka ata̱rmia nuna ashí tiásnumia̱n chikichkiniak jusa Mirkisetékan susamiayi.

Sutuma úuntri̱ji̱a̱i̱ Apram chichaamu

21Nuyá̱ Sutuma uuntri̱ Apraman chichareak “Wikia aya aentsnak yaruaktájai tura ámeka kuítiak yaruakta” tímiayi. 22Tutai Apram áimiuk “Atsá, Uunt Naṉkamantu Yus nayaimpincha nuṉkancha najanamia nuna náari̱n pachisan ju̱na tájame. 23Ame ukunam chichaakum ‘Apramka wí susamuja̱i̱ kuítrintin ajasuíti’ tú turutiim tusan wikia ame wariram ainia nuyá̱ jiurmiṉkisha tura sapat jiṉkiatairmiṉkisha peṉké jurukchattajme. 24Nútiksanak winia suntar takartin jintiá yurumáwarmancha tíchattajai. Antsu Anirsha Iskursha Mámprisha nemartusarmia nu ní wakeramun jurumkiarti” tímiayi Apram.

Currently Selected:

Naṉ. 14: jiv

Highlight

Copy