Jiin. 15

Uwemtikraram Uunt Yusan kantampruiniamu

1Nuya̱ṉka Muisais tura Israer shuarsha Uunt Yusan shiir awajainiak jú̱nis kantampruáwarmai.

“Wikia Uunt Yusan kantampruáttajai.

Nisha imiá kakaram asa aentsun kawairi̱ntiuk nayantsanam amukuiti.

2Úunt Yusrun tuke kantampruáttajai.

Nisha ayamkartin asa winia uwemtikruruiti.

Ju̱i̱ti winia Yúsruka tura tuke shiir wararsattajai.

Winia aparu Yusri̱ asamtai wisha núnisnak ni náari̱n tí naṉkamantu awajtústatjai.

3Uunt Yuska Niṉki meseta úuntri̱nti,

ni náari̱ṉkia Úunt Yusaiti.

4Uunt Yus, Parauṉka suntari̱n kárurtiuk nayantsanam utsawar ajekkarmai.

Núnisaṉ suntara peṉkeri̱ mesetan unuimiátka armia nunasha Kapantin Nayantsanam ajekkarmai.

5Tura nayants ataksha apaaniakui

kaya núnisaṉ init waya̱warmai.

6Uunt Yusru, Ámeka ti kakaram asam nemasrumka nupetkaitme.

7Ame naṉkaamas kakarmarmiji̱a̱i̱ ti kajekam ame nemasrum kajertamarma nuka chirunak keana núnis mash amukmame.

8Ame umpuim entsasha jímiapetek nakaak tampasha arenak kúnak ajasmai.

9Tura ii nemasri̱sha chichainiak ‘Pataatuka amayá̱ṉkan ni takarmari̱n ashí atantran shiir enentáimprattajai.

Winia puya̱run jusan amukártatjai’ timiai.

10Ame mayaimiji̱a̱i̱ umpuiniakmin nayants ataksha ímiatrusaṉ ajak amurarmai

túram jiru kijin entsá waya̱na núnis waya̱warmai.

11Uunt Yusru, Ámeka najanamu yus ainia núja̱i̱ṉkia naṉkaamas Amek arantumaintme.

¿Yaki peṉké tunaarinchasha Ámiji̱a̱i̱ méteksha áminiait?

Aentsti túrachmin ashamkamnia túrin asam ti shiir awajmáinme.

12Ame kakarmarmiji̱a̱i̱ nuṉkasha nakaak yutuawarmai.

13Tura amé shuarum uwemtikrarmamna nu waitnenkartutairmiji̱a̱i̱ yarumename.

Tura ame kakarmarmiji̱a̱i̱ péṉker nuṉkanam juíniame.

14Nuna antukar untsurí nuṉkanmaya̱ aents sapijmiakartatui

tura Jiristíu nuṉkanmaya̱ aentska nuna naṉkaamas ti kuraṉkartatui.

15Etumnumia̱ uuntcha itiurchat enentáimprartatui

tura Muápnumia̱ kakaram áiniayataṉ sapijmiainiak kuraṉkartatui.

Núnisaṉ Kanaannumia̱ aentska ashí kakarmachu ajasártatui.

16Uunt Yusru, amé shuar uwemtikrarmam nu iniaṉkamam ame naṉkamantu kakarmarmiji̱a̱i̱ nú aents sapijmiainiak kuraṉkar kaya núnis muchitkiachu ajasártatui.

17Uunt Yusá, ame pujuwitmena nú nainnium ame uwejmiji̱a̱i̱ iin amastin iwiaraitmena nui̱ jukartukim apujkartustatme.

18Uunt Yusa akupeamuri̱nkia peṉké amuichaiti tura amukashtatui.” Tu kantamáwarmiayi.

19Kame Israer shuarka nayants kukach ajasmanum katiṉkiaru ai̱ Parauṉka shuari̱ kárurtiuk tura kawainium eketkainiasha nayantsanam ajapén ajasármiayi. Túrunawarmatai Uunt Yus nayants ataksha apaak amukarat tusa akupkámiayi. 20Nuna túramtai Arauna umái̱ Yúsnan etserniuya nu Marí shakapan achikmatai núnisaṉ ashí nuwa̱ shakapan achikiar Marí wajamunam káunkar warainiak jantsemiármiayi. 21Marisha kantamuk

“Uunt Yus kantampruátai.

Aentsun kawairi̱ntiuk nayantsanam amukuiti.

Warí Nisha imiá naṉkamantu asamtai shiir awajsamu atí”

tímiayi.

Yapá entsa umarmin awajsamu

22Muisaissha Israer shuaran Kapantin Nayantsanmaya̱ yaruaki̱ kampuntin atsunum Shur nuṉkanmaani̱ wéarmiayi. Tura nui̱sha menaintiú tsawant entsan peṉké wáintsuk wekasarmiayi. 23Nuyá̱ Mara antumiaṉnum jeawar nú antumiaṉka yapá asamtai umarcharmiayi. Tuma asamtai “Mara” anaikiarmiayi.

24Nui̱ṉkia Israer shuar Muisaisan kajertan naṉkamawarmiayi. Tura chicharainiak “¿Ju̱i̱sha wariṉ umartajⁱ?” tiármiayi. 25Nuiṉkia Muisais Uunt Yusan “yáintkiata” tusa seamiayi. Túram Uunt Yus numin iniaktusmiayi. Tura nú numin entsá aju̱ṉmatai entsasha umarmin ajasmiayi. Nui̱ Uunt Yus Israer shuaran akupkámu chicham umiktinniasha súsarmiayi. Tura nuja̱i̱ nekapes iisar 26chicharainiak “Uunt Yus atumí Yusri̱ chichame̱n esetra antukrum Ni íimmianum péṉker túrakrumni̱ṉkia núnisaṉ Ni akupkámu chicham ashí péṉker umíakrumni̱ṉkia Ejiptunmaya̱ aentsun suṉkurja̱i̱ wáitkiasarmajna nútiksan atumniaka suṉkurnaka akuptúkchattajrume. Warí aya Wíkitjiai Uunt Yus atumín tsuártinniaka” tímiayi.

27Nuya̱ṉka Irim nuṉkanam jeawarmiayi. Nui̱ tuse entsa púkuni ámanum tura sataintia tintiuk írunmanum nui̱ entsá ayamach matsamsarmiayi.

Currently Selected:

Jiin. 15: jiv

Highlight

Copy