1 Tim. 1

1Wi Papru Jesukrístu akatrámurintjiai. Iin uwemtikkiartin Yussha tura ii Uuntri̱ Jesukrístusha winia akuptúku áiniawai. Jesukrístuja̱i̱ métek ti shiir ajastai tusar nákaji. 2Timiutéu, ju̱ papin áateajme. Wi ujakam Yus shuar ajasu asam nekas winia uchirua áinkiaitme. Tuma asakmin Yus Apasha tura ii Uuntri̱ Jesukrístusha ti anenma ásar waitnentramainiak imiatkinchanum ti shiir aṉkant pujustinian yaintmakarti.

Wait chichamja̱i̱ anearta

3Masetúnianam wéakun “Ipisiunam pujuuta” timiaj núnisnak tájame. Shuar nui̱ wait chichaman jintin ainia nu suritkiarta. 4Nisha Israer shuara we̱a̱trí̱n áujmatsamunak tura ni we̱a̱tri̱ naari̱ ti untsurí irurtinniak Yus Chichamja̱i̱ naṉkaamas enentáimtuiniawai. Nunak áujmatsar tuke ántar tuíniawai. Nu túramuka Yus enentáimtusar Nin shiir umirkatniun yáintmatsji. Tuma asamtai nusha suritkiata.

5Yus shuar tuke enentái̱ji̱a̱i̱ Yusan shiir enentáimtusar tura tunáa túrutsuk aya péṉkera nuna wakerukar anenkartin ajastin áiniawai. Núnisaṉ péṉker ajasat tusar Yus Chicham étsereaji. 6Chíkich shuar ju̱na iniaisar ántar chichaman áujmatainiawai. 7Yúsnan nékachiat “jintinniuitjiai” tuíniawai. Tura unuiniainia nuna nékainiatsui.

8Yus wakeramun nekaatin tura tunaan suritkiatin akupkámuka nekas péṉkeraiti. Nu paant nékaji. 9Kame akupniúka péṉker shuaran itit awajsatniun akupénatsui. Antsu yajauch shuar ju̱na túrin ainia nuna itit awajsatniun akupénawai, Tunáa shuarnasha, umichuncha, Yúsnasha tura ashí Yúsnancha nakitiáinia nunasha, aparí̱n máinniasha, nukurí̱n máinniasha, kame maṉkartinniasha, 10nuwa̱ncha tura áishmaṉnasha tsanirma ainia nunasha, shuaran kasamak juu ainia nunasha, wáitrinniasha, tsanumniuncha, ashí nuna itit awajsatniun akupénawai. Kame ashí péṉkercha nuna iwiaratniun akupénawai. 11Núnisaṉ tawai ti shiir uwempratin chicham Yus suramsamajnia nu. Nu chichamnaka etserkatniun Yus péṉker asa tsaṉkatrukuiti.

Papru Yus waitnentruruiti tama

12Ii Uuntri̱ Jesukrístu shiir enentáimturu asa Níniun etserturkat tusa kakarman surusuiti. Túruta asamtai yúmiṉkiajai. 13Wi Yusan imiá yajauch chicharniuyajai. Yus shuarnasha áintrarmiajai. Yusnasha katsekniuyajai. Túrin ai̱ṉ Yus winia waitnentrurmiayi. Kame Jesuska Yus Anaikiamun nékachu asan wi túramu yajauchiti tu enentáimchauyajai. 14Tura ii Uuntri̱ Jesukrístu ti nekas waitnentrurmiayi. Tura Jesukrístuja̱i̱ tsaniṉkia pujakui Yus nekas enentáimtustinniasha tura anenkartin ajastinniasha surusuiti.

15Ju̱ chicham ti nekasaiti. Yajauch shuaran uwemtikrataj tusa Jesukrístu ju̱ nuṉkanam taramiayi. Nunasha ashí shuar nekaatin áiniawai. Tura wikia ashí shuarja̱i̱ naṉkaamas tunaan túriniaitjiai. 16Ti tunáa ai̱ṉ Jesukrístu ti anenkartin ana nu paant nekanati tusa Yus winia waitnentrurmiayi. Tuma asamtai chíkich shuar wiji̱a̱i̱ métek Yusan nekas enentáimtusar Niji̱a̱i̱ tuke iwiaaku pujusártatui. 17Tuma asamtai uwir uwir tuke pujú Úunt Akupin tura jachaa núnisaṉ wáinchatai chikichik Yusa nuke iniaṉnatsuk tuke shiir awajsamu tura naṉkamantu páantin awajsamu atí. Nuke atí.

18Uchiru, Timiutéu, yáunchuya̱ Yus shuar ámin “Ju̱ shuar péṉkeran túrattawai” turamarmia nútiksam yamaikia kakaram ajasta. Ni timia enentáimsam suntara áintsam Yusna kakaram takastin asumprurta. Nuna tájame. 19Tura Yus tuke nekas enentáimtusam tura úmamkesam íimiasam tuke péṉker enentáiji̱a̱i̱ wekasata. Chíkich shuar péṉker enentáimtai̱nmaya̱ kanakiar Yusan enentáimtustinian nakitrar emesmampraru áiniawai. 20Kame Iminíusha tura Arejántrusha núnisaṉ Yusan ikiukiarmatai iwianchi úuntri̱n surukarmajai. Nuja̱i̱ Yusan ti yajauch chicharsacharat tusan túraitjiai.

Currently Selected:

1 Tim. 1: jiv

Highlight

Copy