Loekaas 20

Jiesoe aur Johaanas ke hoekoem

(Mateas 21:23-27; Markas 11:27-33)

1Ek rodj Jiesoe Parmeswar ke mahal ke angana me siekhaawat raha aur khoes khabar partjaar karat raha. Tab barka agwan, dharam ke parhal waalan aur Israel ke barkwan aaike okare paas thara bhail 2aur ose poetjhies: „Hamlogse bataaw kie toke ke hoekoem deis hai ie sab kaam kare khaatien.” 3,4Tab oe bolies: „Ham maangiela toelogse bhie koetjh poetjhe. Hamse bataaw kie Johaanas ke Parmeswar hoekoem deis raha dopoe kare khaatien, kie manai logan?” 5Tab oesab apane me batiaai lagal kie: „Djab hamlog bolab: ‘Oke Parmeswar hoekoem deis raha,’ tab oe boliega: ‘Tab toelog kaahe ke okar baat na bieswaas karle?’ 6Aur djab hamlog bolab: ‘Oke manai log hoekoem deis raha,’ tab djhoend mielke hamlogke ieta bahaaike maar dhaariega. Oesabhan to sattje ke bieswaas kare hai kie Johaanas Parmeswar ke ek sanesia raha.” 7Ohie se oelog Jiesoe se bolies: „Hamlog na djaaniela.” 8Tab oe bolies: „Tab ham toelogse bhie na bataabe kie hamme ke hoekoem deis hai.”

Kharaab sardaar logan ke kaahaanie

(Mateas 21:33-46; Markas 12:1-12)

9Jiesoe djanta se ek matlab ke kaahaanie kahe lagal kie: „Ekgo aadmie djangal kaatke aur oe khet me agoer ke per bois. Tab oe khet ke bhaara karies aur koetjh tem khaatien par-des tjal gail. 10Tab djab tem aail, tab oe ek goelaam ke pathaais sauda me se aapan hiessa lewe khaatien. Bakie khetiar log oke maarke aur djhoere haathe lautaar deis. 11Tab djamiendaar ek doesar goelaam ke pathaais, bakie oesab ohoeke maarke bedjatie karies aur bhie djhoere haathe lautaar deis. 12Tab aadmie ek tiesara waala ke pathaais. Bakie khetiar logan oke bhie tjotwaaike khet me se bahaai deis.

13Tab djamiendaar sotjies: ‘Ab ham ka karie? Laaw ham aapan pjaara beta ke pathaai. Oesab okar ieddjat karke tjhor deiga.’ 14Bakie djab khetiar log beta ke dekhies, tab apane me batiaai lagal kie: ‘Ie to ie khet ke hakdaar hai. Laaw hamlog eke maar dhaarie dja, tab ekar hak hamlogke hoi djaai.’ 15Bas oesab oke khet se baahar ledjaaike maar dhaaries.”

Jiesoe manai log se poetjhies kie: „Toelog ka sotj hai kie khet ke djamiendaar khetiar log se ka karie? 16Oe aaike oesabke naas kariega aur khet doesar koi ke oeppar saup deiga.” Tab oesab bolies: „Ie to kabhie na hoi sake hai!” 17Tab oe oesabke taakke bolies: „Parmeswar liekhwaais hai:

‘Djaun ieta ghar banaawe waalan be-kaamiel maanat raha, ohie sab se kaamiel waala hoi gail hai.’

Toelog ka sotje hai kie ie baat me kaun matlab hai?” 18Oe bolies: „Dje oe ieta par gieriega, oke bahoet tjot lagiega. Aur djekar oeppar oe ieta gier djaaiga, oe ekdam se pietjla hoi djaaiga.”

19Dharam ke parhal waalan aur barka agwan samadjh gail raha kie Jiesoe ie kaahaanie oesabke biese me bataawat raha. Ohie se oesab maangat raha toerant oke pakare, bakie oelog manai log ke deraat raha.

Maahaaraadja ke aur Parmeswar ke hak

(Mateas 22:15-22; Markas 12:13-17)

20Oe same oesab mauka khodjat raha Jiesoe ke pakare khaatien. Tab oesab ekaat dhokhaabaadj log ke okar paas bhedjaais oke koetjh baat par phasaaike Roma ke laat ke haath me saupe khaatien. 21Oelog ose bolies: „Maastar djie, hamlog dekhiela kie toe sattjaai se siekhaawe hai aur koi ke moeh na taake hai. Toe sab koi ke Parmeswar ke siedha rasta dekhaawe hai. 22Ohie se hamlogse bataaw kie Mosas ke kaanoen me liekhal hai kie mienaahie hai Roma ke maahaaraadja ke djoetie bhare ke kie na.”

23Bakie oe oesabke kharaab tjalaakie samadjh gail aur bolies: 24„Hamme ek tjaanie ke paisa dekhaaw. Epar kekar naam aur moerat hai?” Tab oelog bolies: „Maahaaraadja ke.” 25Tab oe bolies: „Ohie se maahaaraadja ke de djaun okar hak hai, aur Parmeswar ke bhie okar de.” 26Tab ie baat soenke oesab atjambho bhail aur moeh band karke rahie gail. Aur djhoend dekhies kie oesab oke ekko baat par na pakar paais.

Aane waala djoeg

(Mateas 22:23-33; Markas 12:18-27)

27Tab ekaatgo Sadoesie log bhie Jiesoe ke paas aail. Oesab na bieswaas kare hai kie iensaan djie oethiega. 28Tab oelog bolies: „Maastar djie, Mosas ke kaanoen me liekhal hai kie djab ek aadmie mar djaai aur oke larkan na hai, tab okar bhaai ke tjaahie okar aurat se biaah kare ke. Aur djab aurat ke larkan paida hoi, tab sab se barka betwa pahiela aadmie ke naam aur hak paaiga. 29Maan le kie saatgo bhaai raha. Ek dien pahiela waala begar larkan ke mar gail. 30Tab doesara aapan barka bhaai ke aurat se biaah karke bhie begar larkan ke mar gail. 31Aur tiesara se bhie ehie haal bhail. Aisane saato se hoi gail. 32Tab ant me aurat bhie mar gail. 33Djab manai logan djie oethiega, tab saato bhaai me se ie kekar aurat rahiega? Oe to saato ke aurat raha.”

34Tab oe bolies: „Ie tem ke manai log biaah kare hai. 35Bakie dje djie oethiega aur aane waala djoeg me rahe laaik rahie, oe biaah na kariega. 36Oesab djaise parie logan phier se na mar sakiega bakie Parmeswar ke djie oethal betwan aur bietian rahiega.

37Soen, djab Prabhoe djarat djhalaasie me Mosas ke dekhaail, tab oe bolies kie: ‘Ham Aabraaham, Iesaak aur Jaakob ke Parmeswar baatie.’ 38Oe tieno mar gail raha, bakie Prabhoe ke lieje oesab djieje hai. Oe maral logan ke Parmeswar thoro hai, bakie djienda waalan ke. Aisane Mosas dekhaais kie maral waalan djie oethiega.” 39Tab ekaat dharam ke parhal waalan bolies: „Maastar djie, ie to bahoet barhia baat hai.” 40Oelogke hiemmat na raha koetjh auro poetjhe ke.

Kriest Daawied ke aulaad aur okar Prabhoe hai

(Mateas 22:41-46; Markas 12:35-37)

41Tab Jiesoe poetjhies kie: „Kaahe ke soena hai kie Kriest raadja Daawied ke aulaad hai? 42,43Daawied to Parmeswar ke poestak ke ek gaana me liekhies hai kie:

Prabhoe hamaar Prabhoe se bolies:

‘Aaw hamaar dahiena bagal baith djab talak ham tor doesman ke tor gor ke tare na dharab.’

44Daawied Kriest ke aapan Prabhoe bolaawe hai. Toelog thiek se sotj oe kaise okar aulaad bhie hoi sake hai.”

Jiesoe ke baat dharam ke parhal waalan ke biese me

(Mateas 23:1-36; Markas 12:38-40)

45Tab djab sab manai soente raha, tab Jiesoe aapan tjela log se bolies: 46,47„Dharam ke parhal waalan se batjaaike rahiehe. Oesab lamba lamba kapra pahienke rasta par tjale hai aur oesabke attjha lage hai dher manai ke aage aadar paawe ke. Partjaar ke ghar aur nauta me oesab hardam aage baithe hai. Oelog bhaktie ghat hardam praatna kare hai. Aur ehie me oesab wiedhwa logan ke dhan-daulat me se kha hai. Iesabhanke doesar paapie log se auro kathien sadja mieliega.”

Currently Selected:

Loekaas 20: hns

Highlight

Copy