HAGONEGAHANI 26
26
O Isako ki oga i Gerare
1Ta na magêha raha ki tarahua nikâ na agua i murina na ani i râ me hagenago igê na matena iana Abarahamo. O Isako ki râ i pasina o Abimeleki na maneraha iata na Pilisitina i oga i Gerare. 2Na Araha ki bani vora tanga o Isako ma ki bani vi: “Siana ko arâ i Esipito. Go oga so nga i na agua ikê. Inê be visia tangago na agua go page gâga igê. 3Go gâga ikê. Inê be tamanigo ma be haganahunigo renia na ramana. Inê be haganahunigamu igo ma na raraha iamu renigi na ara ni mako hato ikê. Inê be hagamonaria na bani suruha iaku tanga o vaemamu o Abarahamo. 4Inê be hagarakonira na raraha iamu, ke rako mangagi na higu i vavearo, ma be haganahunira renigi na mako hato ikê. Na ara ni hakuta ninuni ka page avarasiê, kê korokoro tangara manga gê koro tangara na raraha iamu. 5Inê be haganahunigo renia na ramana, suria o Abarahamo ki tê viteaku ma ki marupegi na ramata ma na tamasinga hato iaku.”
6Vikê o Isako ki oga i Gerare. 7Matena na mane i ngekana ka hagatea renia kaniana, ngaia ki hagaparura, vi ngaia kani kesina. Ngaia ki pe obania, vige visia kaniana, suria ngaia ki magutenira na mane ngegana, i era ma ka nahuia ki meme, hanana viga torea ka Rebeka, suria ngaia ki na tohona na gete. 8Matena o Isako ki oga rârâ i ngekana, na maneraha o Abimeleki ki bâ hura igê na mabaha ma ki rigia o Isako i meapisi ka Rebeka. 9O Abimeleki ki kasi tamasinga tanga o Isako ki râ me ma ki vi tanga, ki vi: “O, gê kahu girara, vi ngaia kani kaniamu! Tanu hega, go visia vi kesimu?” Ngaia ki arami, ki vi: “Suria gê takusia, vi era ma ka nahuiê manga vi inê kê visia vi kaniaku.”
10O Abimeleki ki vi: “Tanu hega, go katoa tangagami na tarana ngekana? Tahema i pe bara tanga na hitangita na me iaku vige memêru kaniamu. Igami kami kato vikana, suria ma igo nge.” 11O Abimeleki ki ramonira na enoni hato, ki vi: “Na anima na enoni i katoa bera na mane ikê se kaniana, ngaia ka page nahuia ki meme.”
12O Isako ki hasi na mu i ngekana. Igê na harisi ngekana na mu ka ganora hagetangarê me nikâ teharigi matena i hasi, suria na Araha ki haganahunia renia na ramana. 13Ngaia ki ama ni nahunia nga na ramana ma ki vora na mane i ruruguha ngavê. 14Suria ngaia ki nahunira rako na totoha ni sipi, ni goti ma ni puruka ma na enoni tagara, na Pilisitia ka hengaria. 15Tahema ngaira ka ahunigi na ara ni vekaru hato ga bani oparigi na kariana o Abarahamo o vaemana, matena ki tahitahi mênga o Abarahamo.
16Ma hemuri o Abimeleki ki vi tanga o Isako, ki vi: “Gu hura pania na mako iamami, suria i ngekê igo ko ura gatagata teharigami.” 17Hoi, o Isako ki tavoraha ki râ ma ki tagarahia na tênga iana igê na maruguna i Gerare, ma ki oga noga igê. 18Ngaia ki oparigi aporo na vekaru, ga bani oparigi na kariana o Abarahamo ma na Pilisitia ka ahunigi i murina i bani me o Abarahamo. O Isako ki hêtani na ve karu ngegana renigi na ata ki bani hêtani o vaemana renigi.
19Na kariana o Isako ka oparia na kiru igê na maruguna ma ka tarahua igê na ve. 20Na mane i Gerara ga bâsuri sipi ka ramonira na kariana o Isako ga bâsuri sipi nogata, ka vi: “Na vekaru iamami ngekana.” Tahema o Isako ki hêtana na vekaru akana vi ‘Heparaparanga’.
21Na kariana o Isako ka oparia nikâ tani na vekaru, ma ngaira ka hemeronge nikâ renia na ani ngekana. Tahema o Isako ki hêtana na vekaru ngekana vi ‘Hemerongeana’. 22Ngaia ki aharaga tenia i ngekana ma ki oparia nikâ ta na vekaru. Ngekana ka kahu pe hemeronge renia. Tahema ngaia ki hêtana na vekaru ngekana vi ‘Asitatara.’ Ngaia ki vi: “I ngekê na Araha ki katogia ka oga asitatara ikê ma igia ka page nahunia na ramana.”
23O Isako ki tavoraha ma ki râ tanga i Bereseba. 24Igê na bungiana ngekana na Araha ki vora tanga ma ki vi: “Inê nga ki na God, o Abarahamo o vaemanu i rahesiê. Siana ko magu. Inê kê ngahisigo. Inê be koro tangago, ma be hagarakonira na raraha iamu, suria inê kê bani surua tanga o Abarahamo na kariaku.” 25O Isako ki tagarahia na panga na bea ni vogasiha i ngekana ma ki rahesia igê na Araha. Ma hemuri ngaia ki tênga i ngekana, ma na kariana ka oparia nikâ igê na vekaru.
O Isako mo Abimeleki karu suruheri
26O Abimeleki mo Ahusata na mane ni hagaotonga iana mo Pikolo na araha iata na mane ni me iana, ngaira ka râ me tenia i Gerara, hanana ga bâsia o Isako. 27Vikê o Isako ki hagate, ki vi: Tanu hega mu kahu râ me kamu bâsiê i ngeke, suria i nago igamu kamu pe komaniê ma kamu kasiê hura hete tenia na mako iami?”
28Ngaira ka arami, ka vi: “I ngekê igami kami girara, vi na Araha ki ngahisigo, ma kami takusia, vi igia ke naka na suruheri i berarogaka ma ke tohe, hanana viga arâ suria. Igami kami obanigo, vigo surusuru, 29vi siana ko erasigami, suria igami kami pe erasigo rârâ. Igami kami komanigo ma kami nakago vê ko râ asitatara. I ngekê ki vaga me mave, vi na Araha ki haganahunigo renia na ramana.”
30O Isako ki hagarêa na magotoha tangara. Ma ngaira ka ngê ma ka tono. 31Igê na mahogotana i tangi me, na ara ni hitangita ki katoa na suruha iana ma ki hagagatagatania renia na tohenga. O Isako ki arira. Ngaira ka hegirara aporo.
32Igê na tangiana ngekana na kariana o Isako ka râ me ka hagarongoa renia na vekaru ga oparia. Ngaira ka vi: “Igami kami opatenia na ve.” 33Ngaia ki hêtana na ve karu ngekana vi ‘Seba,’ i vi ‘Tohenga.’ Tahema ga hêtana na hinua i ngekana vi Bereseba, vi ‘Vekaru ni Tohenga.’
Ngaira na gete iana o Esau
34Matena o Esau ki tonga na 40 na harisi iana, ngaia ki êragirerua na kere gete gi rua na Hitita. Tani ka Jehutiti ka karena o Beri, ma tani ka Basemata ka karena o Elone. 35Ngairerua karu hagamamasiaga apeterua o Isako ma ka Rebeka.
Currently Selected:
HAGONEGAHANI 26: KCB
Highlight
Share
Copy

Want to have your highlights saved across all your devices? Sign up or sign in
© 2011 Bible Society of the South Pacific