San Marcos 9
9
1Ni chëbak Jesús:
—Nli xñen lo do nii no bla meñ nii nche nu kejty axte nii kan kñabey Dios con kyalxtisy.
Lëë Jesús xtsyëëlo
(Mt. 17:1‑13; Lc. 9:28‑36)
2Tse nii kwloxo xoop kpidz lëë Jesús kwey tu kiy nii per nli busy klaa. Kuni xaa xaktyee Pedre, Jacob ni Juan. Siko xña lo xaa lëë Jesús ptsyëëlo. 3Bibëly xab xaa, byak nguitsy pu rusyo ni ni tu cho chilody ksaan nguitsy ladx singo nikxe nii xare kiibo. 4Ni lëë xaa kon nii lëë Elías ni Moisés ncheyutiits ksa Jesús. 5Tsigo lëë Pedre chëb lo Jesús:
—Maestre, ¡xaatee mbëë nche no nu! Lëë noo ksaa tson yu yagxiidy nu: tuwo par lii, stuwo par Moisés, stuwo par Elías.
6Ksa xpëëdscuel Jesús ptsyeb. Ngo nii nandy Pedre pe xñee. 7Tsigo lëë tu xkey ptaagw aan lëë xaa kwnity lo xkey. Aan lo xkey go pchoo tsiy Dios chëb:
—Lëë xiñaa nii xkëstyoon nrii. Kol jkëëtyag xtiits xaa.
8Aan tsiñee lëë xaa buy, ni stu cho kontre xaa, xaktyee Jesús.
9Tsiñee lëë xaa siksëëb chex kiy go, lëë Jesús chëb kazh nii kwtiisty xaa nii kon xaa axte nii kpañ mguiy nii pxaal Dios. 10Por ngo kwlootseysye xaa leñ styoo xaa nii kon xaa, nikxe nii kwnabtiits lsa xaa lo xcombañer xaa xa nak nii kpañ meñ. 11Tsigo lëë xaa kwnabtiits lo Jesús chëb xaa:
—¿Penak nii xñee maestre ley nii klo Elías no nii kiid?
12Tsigo lëë xaa kwëb chëb xaa:
—Nliw, no nii klo Elías kiid par kxixkwaa xaa kchësy cos. ¿Per penak tsigo nii xñee leñ kitsy nii kë xtiits Dios nii lëë mguiy nii pxaal Dios te kchëlo kyalnë ni ksaldy meñ xaa? 13Per naa nii xcuentaa xñen nii lëë Elías biidle ni lëë meñ beeñtsyey xaa sinak nii kwlaañtyee styoo meñ, sinak nii xñee leñ kitsy nii kë xtiits Dios nii no nii tedy xaa.
Lëë Jesús chuuñ kyak tu xaa wiñ nii no tu kyalbini mal leñ styoo
(Mt. 17:14‑21; Lc. 9:37‑43)
14Tsi lëë xaa ptsiñ laañee nche stubla xpëëdscuel Jesús, lëë xaa kon nii per nli busy ndaly meñ nche kyako kwi xaa, ni lëë maestre ley nche ktilytiitsni xaa. 15Siikñee lëë meñ kon Jesús, lëë meñ psee aan lëënlëdy lëë meñ kujkëëptyux xaa. 16Loxsye ngo lëë Jesús kwnabtiits lo xpëëdscuel chëb:
—¿Pe cos nche ktilytiits to ksa do xaa gue?
17Lëë tu xaa nii so siko kwëb chëb:
—Maestre, lëën syely ni xiñganaa lool nu por lëë tu kyalbini mal no leñ styoo xaa aan lëëw beeñ ngop xaa. 18Laañee sotyee xaa lëë kyalbini mal xsyeñ xaa aan lëëw xchon xaa lyu. Aan xchoo ptsiñ chuw xaa, chaw lay xaa ni xkyedzy xaa. Lëën tse kwnab lo xpëëdscueeloo nii ngwii xaa kyalbini mal go, per pchilody xaa.
19Tsigo lëë Jesús kwëb chëb:
—¡Natsypee nguiedzy styoo do! ¿Axte pa wor këb ñe nii lëën ksaladzy lëë do? ¿Pa slal tiemp kxekwaa lo do? Kol tëni xaa wiñ go nu dyon.
20Tsigo lëë xaa kuni xaa wiñ go lo Jesús. Per tsiñee lëë kyalbini mal go kon Jesús, lëëw beeñ nii lëë xaa wiñ go kutyë, aan lëë xaa byab lyu xtuupxto xaa ni xchoo ptsiiñ chuw xaa. 21Tsigo lëë Jesús kwnabtiits lo pxosy xaa chëb:
—¿Destye pa wor chak xaa sinrii?
Tsigo lëë pxosy xaa kwëb chëb:
—Destye nii nak xaa xaa wiñ. 22Aan ndaly vuelt no kchon kyalbini mal gue xaa lo ki ni lo nis par kutyo xaa. Singo nako deelñee schilo kuuñ kyakoo xaa, pkëstyoo lëë noo ni beeñ noo yudar.
23Tsigo lëë Jesús chëb:
—¿Xa nak nii deelñee schilool? Kchësyo schilo lo meñ nii xniladzy.
24Tsigo lëë pxosy xaa wiñ go kwchuptsyë chëb:
—¡Xniladzyaa; beeñ naa yudar kniladzyraa!
25Tsiñee lëë Jesús kon nii lëë meñ xtyopre, lëë xaa kwëntseeb lo kyalbini mal go chëb xaa:
—Kyalbini ngop ni ngwaat, naa xñabey nii kchool leñ styoo xaa wiñ re aan kpikchedroo sëëboo.
26Lëë kyalbini mal go kwchuptsyë, aan lëëw beetyë xaa wiñ go stub. Loxsye ngo lëëw pchoo leñ styoo xaa, psaano xaa sootee meñ nii lox kuty. Por ngo ndaly meñ kwnee nii lëë xaa kuty. 27Per lëë Jesús kwseñ ña xaa, lëë xaa blische xaa, aan lëë xaa wiñ go kusoli.
28Loxsye ngo lëë Jesús kwsëëb tu leñ yu, aan lëë xpëëdscuel xaa kwnabtiits chëb:
—¿Penak nii pchiloody noo ngwii noo kyalbini mal go?
29Lëë Jesús kwëb chëb:
—Por parñee kwii ñe clasy kyalbini mal go no nii kutiitsni kazh ñe Dios.
Lëë Jesús xñee stub nii lëë xaa kety
(Mt. 17:22‑23; Lc. 9:43‑45)
30Tsiñee lëë xaa bi siko, lëë xaa kwte nëz Galilea. Per koklasty Jesús nii cho nyaknano 31porñee lëë xaa noyuuñ kseedy xpëëdscuel xaa xñee xaa lo xaa:
—Lëë mguiy nii pxaal Dios jkaa ña meñ, aan lëë meñ kuty xaa. Per tse nii loxo tson kpidz lëë xaa kpañ. 32Per byeñdy xaa nii kwnee Jesús aan ptsyeb xaa nyabtiits xaa.
¿Cho mastre non?
(Mt. 18:1‑5; Lc. 9:46‑48)
33Lëë xaa ptsiñ leñ kyedzy Capernaum, aan lëë xaa nchenol leñ yu tsi lëë Jesús kwnabtiits chëb:
—¿Pe cos no ktilytiits to nii syoop no nëz?
34Per tsesy kwche xaa, porñee nan xaa nii worñee siid xaa nëz lëë xaa no ktilytiits xaa dyon cho xaa mastre non. 35Tsigo lëë Jesús kwsob aan lëë xaa kwtsyetsy ksa tsiipchop xpëëdscuel xaa aan lëë xaa chëb:
—Deel no cho chakladzy kak tu xaa nii mastre non, no nii kyaanlyu xaa ni jkiiñ xaa kchë lo meñ.
36Loxsye ngo lëë xaa pso tu xaa wiñ groltyee, lëë xaa kwteetsy xaa wiñ go aan lëë xaa chëb:
37—Kchësy meñ nii kantsi tu xaa wiñ re porñee xniladzy meñ xtitsaa, naa chantsi meñ go. Ni kchësy meñ nii chantsi naa, lëdy nonsyaa chantsi meñ go, sink wi xaa nii pxaal naa.
Meñ nii xtilynidy lëë no, no xlad no
(Lc. 9:49‑50; Mt. 10:42)
38Tsigo lëë Juan chëb:
—Maestre, ptyon noo tu xaa nii nonsyke lël xseety xaa tsi lëë xaa kwii kyalbini mal, per como nody xaa lady no lëë noo pkaw.
39Tsigo lëë Jesús kwëb chëb:
—Jkady tow, porque ni tu xaa nii xseety lën par kuñ tu kyalntson kyaxty kñeenë naa. 40Por meñ nii xtilynidy lëë no, no xlad no. 41Ni cholsye meñ nii kneetsy nikxe tub xigak nis ki do porñee nak ksa do Crist, nli xñen nii stikche Dios kyalnsaak ko lo meñ go.
Ndox kuñ meñ tol
(Mt. 18:6‑9; Lc. 17:1‑2)
42’Cualquier xaa nii kuñ xtol meñ nii xniladzy xtitsaa, masy buen kyëtuu tu kyomoliñ yañ xaa go aan tsikchon meñ xaa lo nistoo. 43-44Deelñee ñal chuñ xtoloo, pchugo. Mbëëre sëëboo kpaa tunkoo, lëjty nii chop ñal sob aan kyeyoo laañee mban xtye meñ, laañee chilody kyuuy ki. 45-46Deelñee niy gaal chuñ xtoloo, kwliiw. Mbëëre koxoo sëëboo kpaa, lëjty nii chop niyoo sob aan kyeyoo laañee mban xtye meñ. 47Deelñee loo gaal na chuñ xtoloo, kwliiw. Mbëë sëëboo kpaa con tugak lool, lëjty nii chop lool sob aan kyeyoo laañee mban xtye meñ, 48laañee chejty msyog ni xyuuydy ki.
49’Porque kchësy lady cos kwib ki sinak xkwib sedy lady pëël parñee xiñdyo. 50Xkiiñ sedy. Per deelñee ksaano nii kak nxiyo, ¿xa kuñ do nii kyak nxiyo stub? Kol kak sinak sedy nii nxiy aan ngui kol kpañ ksa xcombañer do.
Currently Selected:
San Marcos 9: ztq
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.