Josué 22
22
Ipiajeitantanajari ishanincajeitaniri Rubén, Gad jeri Manasés savicaarantapaaintsiri intatiquero
1Impoiji yapatojeitaqueri Josué ishanincasanoripeeni Rubén, Gad jeri cashetatatsiri ishanincapeeni Manasés. 2Icantajeitiri:
“Meeca pimoncarajeitaquero icantasanotaquempiri Moiseshini, quemisantiriri Tasorentsi; aisati piquemisantajeitaquero maaroni nocantajeitaquempiri narori. 3Picantani acaratavacaajeitaca, irosati meeca. Te ajocavacaajeiteaji. Piquearioventajeitaquero pimoncarataquero icoacaaquempiri Atasorentsite. 4Meeca timanaque iipatsitepee maaroni ashaninca. Imoncarataquero Avincatsarite Tasorentsi icashiacaaqueeri, isavicajeitanaque cameetsa. Meecaquea pimpiajeitanaje avirori piipatsitepeequi intatiqueroqui nija Jordán, ipajeitanaquempiri Moiseshini, quemisantiriri Atasorentsite. 5Irointiquea noncantasanojeitavaquempi: pimoncaratero icantacantiri Tasorentsi, icantaqueriri Moiseshini quemisantiriri. Ocameetsati pinintasanojeiteri, pincanteani pinquemisantasanoteri, pimatasanotero icoacaajeitaqueeri. Aiquero pijatatiye pishiretasanoteari catsini.”
6Impoiji icantacoventaqueri Tasorentsiqui intasoncacoventajeitanteariri aisati yovetsajeitavajari, irosati ipiajeitantanaja ivancojaniquipeequi.
7Yora Moiseshini ipanaqueri iipatsite cashetatatsiri ishanincasanoripeeni Manasés intatiqueroqui nija Jordán otiminta quipatsi Basán; irioquea Josué paqueriri itsipapee iipatsite acaqueroca nija Jordán iqueapinitinta catsirincaiteri isaviquimojeitaqueri ishanincapee. Intajari icantacoventavajiri Tasorentsiqui jivajeitajantsineri irijataje, irosati itiancantajari ipiajeitanaja. 8Ijajeitantanajari icantavaqueri: “Ariorica pareejeitapaajea piipatsitepeequi, pimpaarantapeeri pishanincapee timimojeitaquempiri: pivirapee, oro, plata, bronce, ashiroyetatsiri jero quitsaarentsipee, paitajeitaqueriri quisajeiteeri.”
9Aitaque ocantacari ijajeitanaji ishanincasanoripeeni Rubén, Gad jeri cashetatatsiri ishanincapeeni Manasés, yojocajeitanajiri ishanincapee savicajeitapaintsiri Silóqui quipatsiquiniri Canaán. Ipiajeitanajaro iipatsitequi iriori timatsiri Galaad, ipanaqueriri Moiseshini, imoncarataquero icantaqueriri Tasorentsi.
Ipiotapaaquero mapi otsapijaqui Jordán
10Yareejeitantapaajarori nijaqui Jordán ishanincasanoripeeni Rubén, Gad jeri cashetatatsiri ishanincapeeni Manasés, yovetsicajeitapaaque antearo altar iipatsitequi canaaneopee. 11Ari iquemacojeitaqueri itsipapee ishaninca oca yantaqueri, yovetsicapaaque ishanincasanoripeeni Rubén, Gad, jeri Manasés altar acaqueroca nija Jordán ovecaratapaaca quipatsi Canaán. 12Iquemacotantacariri ishanincapee, irosati yapatojeitantaca Silóqui irimanajeitavajerime.
13Ari itiancaqueri Finees, itomi Eleazar antaveetatsiri, irijatanteari anta Galaad isavicajeitapaaquenta ishanincasanoripee Rubén, Gad jeri cashetatatsiri ishanincasoripeeni Manasés, inquenquetsatacanteariri. 14Aisati icarajeitanaqueri 10 aparopee jivatacaayetiriri ishanincasanoripee iriori. 15Yareejeitantapaacari, icantapaaqueri:
16—Narojeitaque quenquetsacaajeitiriri ishanincatacari Tasorentsi. ¿Paita pantimojeitaqueriri Atasorentsite? ¿Paitaquea pojocajeitantanajariri Tasorentsi povetsicantacari altar pimpiatsatanteariri? 17¡Tempa pinquenqueshirejeiteroji caari cameetsatatsi antajeitaqueri toncaariqui Peor! Irosatiquera meeca acantajeita te ancameetsajeiteji. Tempa irotaque itsoncaarantantacari, icamajeitaque ishanincavetacari Tasorentsi. 18¡Tempa aashireimatempiji meeca aiquero picoajeitanaitii pojocanajeri Tasorentsi! Pipiatsatacaririca meeca, osaitequera iroasanquetaajeitee maaroni. 19Aisati, teerica oncameetsatimojeitempi oca quipatsi paajeitaqueri, tsamete ajajeitaje otimaquenta Inantari Tasorentsi, ancaratavacaajeitapaajea. Paajeitapee quipatsi nosavicajeitaquenta. Iro cantaincha eiro piatsataritsi Tasorentsi. Eiro povetsicashitatsi pashini altar, tempa ainiro altar irashi Atasorentsite. 20Pinquenqueshiretero yantaqueri peerani Acán itomini Zérah, yaarantavaque icashiavetacari Tasorentsi antsoncasanojeiterome. Irotaque iquisajeitantacariri ashanincapeeni. Te apaniro iriori incamimentero caari cameetsatatsi yantaqueri.
21Ari yacajeitanaqueri ishanincasanoripeeni Rubén, Gad jeri Manasés yora jivatacaajeitantatsiri. Icantiri:
22—Yora Tasorentsisanori, anaacotirori maaroni ijitasorentsitashiyeetari, iotaquero te iro novetsicantearo altar nompiatsateari aisati nojocantanajeariri. Iotasanotiro iriotaque iotacaajeitempineri avirori. Iroorica novetsicantacaro eiro noquemisantantajaritsi, ocameetsati poajeitena. 23Aisati iroorica nontaanteanariri virantsipee, panquirentsipee aisati iraacameetsajeitantajenari, irio cantimentajeitenarone nantajeitaqueri. 24Queario iro novetsicantacarori, te noncoyeji incantavacaajeitea atomipee coajicani. ‘¿Paita pinquemisantantariri Tasorentsi iquemisantajeitiniri intacantajeitaqueerini? 25Yora Tasorentsi yoaquero nija Jordán nashitacaajeitaqueeri meeca, avirojei ishanincasanoripeeni Rubén jeri Gad, tecatsi oncantea pinquemisanteri Notasorentsite.’ Aitaque incanteari pitomipee irojocacaajeiteri notomipee narori, eiro iquemisantantajeitajaritsi Atasorentsite.
26“Irotaque noquenqueshireajeitacari novetsicantacarori altar, te iro nontaanteanariri Tasorentsi virantsi aisati paitapeerica. 27Irointiquea iotacaajeiteeneri aisati iotacaajeiterineri ashanincajeitajeari coajicani, acaratavacaajeita aquemisantiri Tasorentsi. Aisati ocameetsati amapiniteneri virantsipee antaimenterori caari cameetsatatsi antayetiri, iraacameetsajeitanteeri. Eiroquea icantantaritsi pishanincajeitajeari avirori yora noshanincajeitajeari narori coajicani: ‘Te noncoyeji noncarajeitempi anquemisanteri Tasorentsi.’ 28Noquenqueshirejeitaca timatsirica sampitenane iriorica isampiyetee noshanincapee nancantanaqueariri: ‘¡Pamenero, yora intacantajeitaquenaniri yovetsicanaqueneri Tasorentsi oca altar! Te iro nontaanteanariri virantsipee aisati te iro noayetanteariri. Irointiquea quenqueshiretacaajeiteeneri aquemisantiri Tasorentsi.’ 29Irio Tasorentsi oipacaacoventajeitajenane nopiatsajeitacaririca, nojocajeitaqueririca, novetsicashitantacari pashini altar nontaanteneariri virantsipee, panquirentsipee jero pashinipee. Tempa niojeitaque timatsi aparoni altar anta Inantari Tasorentsi.”
30Iquemantavacarori Finees aisati icarajeitaqueri icantaqueriri, onimojeitanaqueri. 31Ari icantanaque Finees itomi antaveetatsiri Eleazar:
—Jaa, niotasanojeitaque meeca icarajeitaquee Tasorentsi, te pincoajeite pimpiatsateari. Meecaquea eiro yoasanquetaajeiteetsi.
32Itsoncantanacarori iquenquetsatacairi, ari yovetsajeitanajari, irosati ipiajeitantanaja iponeanajaro Galaad irosati quipatsiqui Canaán. Yareejeitantapaajari, icamantapaaqueri maaroni ishanincapee icantavaqueriri. 33Iquemajeitantavajariri, onimojeitanajiri aisati icantacojeitanaqueri Tasorentsi: Icameetsati. Irosati te inquenqueshiretajeroji irimanajeiteri.
34Yora ishanincajeitaniri Rubén aisati Gad ipajitaquero ipiotaqueri mapi. “Iotacantatsiri” Icanti: “Oca altar, irotaque iotacaajeiteeneri yora Atasorentsite, iriotaque Tasorentsisanori aquemisantajeitiri.”
Currently Selected:
Josué 22: cni
Highlight
Share
Copy
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
