Romanos 9

Na lalamaxatpi Ñim Lo'onatac 'Enauacna

1Aỹem sa'amaqten So Jesucristo, qaq ỹoqo'oye nam sa'axat ỹataqta 'eesa. Som Saqcha'a Na'añaxac Qui'itta aỹem ỹauecta'aguet. Qaq dam pa'auo da ñachaalataxac aỹem da'aqtaxanem da ỹataqta saishet da satenataxaatac. 2Qataq aỹem ỹataqta 'eesa da saquicota qataq añi iquiyaqte daỹalli, qaq damaye saishet da aỹem ỹalemaxat. 3Huo'o da ñeque'eenaxac souaxat nam judiopi maye ihuo' le'ecpi, qaq aỹem sauotaique da setauan namayepi. Qaq ỹoqo'oye aỹem ỹataqta qaica ca shectega da aỹem talec ca camachaqca qauem qataq aỹem qaỹoqta Ñim Lo'onatac 'Enauacna qataq So Cristo, da huo'otaq chegoqchigui damaye, da itauan namayepi da nquicot Ñimaye. 4Namayepi maiche lalamaxatpi qataq lca'aguishecpi Ñim Lo'onatac 'Enauacna. Qaq namayepi, Ñim Lo'onatac 'Enauacna ỹami' da huo'o naq 'enec da ỹataqta llalaqpi. Qataq Ñimaye hueta'aguet namayepi qataq ỹachaxana da lta'araic la'añaxac. Qataq naỹamaxate' namayepi, nache ỹami' na lamaxasoxonaxacpi. Qataq ỹapaxaguenec namayepi da ỹataqta 'eesa da llo'oxonnataxanaxac, qataq huo'o na ỹachaxanapecotpi. 5Namayepi chegoxoguet soua hua'au' qarta'al, qataq Som ỹale maye Lca'aguishec Ñim Lo'onatac 'Enauacna nataqa'en chegoxoguet soomaye. Somaye ilo'ogue 'enauacna, qataq nacheso so Lo'onatac 'Enauacna ¡Da ño'oxonnataguec Ñimaye ỹataqta chochaq tatec! Aja', nache 'eetec de'era.

6Qaq saishet da sheetega da Ñim Lo'onatac 'Enauacna da huo'otaq sa ipaguelec nam ỹachaxanapecotpi nam Israel le'ecpi. Qalaxaye saishet da 'enauac na judiopi da nhuanaua'a nam ỹataqta 'eesa Israel le'ecpi. 7Nataqa'en saishet da imauec na chegoxoguet so Abraham da ỹataqta 'eesa da lalamaxat llalaqpi somaye, cha'aye Ñim Lo'onatac 'Enauacna 'enapec: «Ca 'aỹa'alaqpi chegoqchigui qome ñi Isaac.» 8-9Qaq damaye naigui da qaica ca ishet da llalec Ñim Lo'onatac 'Enauacna, souaxat da maiche nhuo' le'ec. Cha'aye nam ỹataqta lalamaxat llalaqpi so Abraham, namayepi chegoxoguet so Isaac. Cha'aye so Isaac som nañiguiñi co'ollaxa da yaqto' ipacchigui dam ỹachaxanapecot Ñim Lo'onatac 'Enauacna co'ollaxa so Abraham maye 'eeta': «Qom inoxonec na 'oonolec vi'i, nache ñe'eguelaq, nache añi Sara mashe huo'o qome ca llalec.»

10-12Qaq damaye saishet da nachaqrata, cha'aye nataqa'en soua dos llalqa aso Rebeca, soomaye lta'a' som hua'au qarta'a Isaac. Qaq Ñim Lo'onatac 'Enauacna lca'aguishec so 'oonolec da ỹauotaique da ỹachegoxotchigui na lalamaxatpi. Cha'aye co'ollaq soomaye da saxanaxa da ñiyiñi, nache saxanaxa da huo'o ca 'oonolec soomaye da huo'o ca ỹo'ot da no'on huo'otaq ca qauem. Qalaxaye Ñim Lo'onatac 'Enauacna, mashe da'aqtaxanem aso Rebeca da som ỹe do'onataxanot qome so na'asa. Qaq de'era ỹachaxan da Ñimaye, maicheye ca taalec da lca'aguishec cam nateeteguet dam 'eetapeguec. Qaq ỹoqo'oye da huo'o ca lca'aguishec Ñim Lo'onatac 'Enauacna, qaq saishet da ilotagui ca 'eetec ca ỹo'ottac. 13Qaq 'era da la'aqtaxanaxac ana nere maye huetalec na la'aqtacpi Ñim Lo'onatac 'Enauacna maye 'eeta': «Aỹem ica'aguishec so Jacob qaq so Esaú qalaq saishet.»

14Qaq ỹoqo'oye ishet peta'a da shenaqta' ca qara'aqtac ¿Ñim Lo'onatac 'Enauacna sa ỹaỹamaxañi da ỹo'ot? ¡'A'i, saishet! 15Cha'aye Ñim Lo'onatac 'Enauacna co'ollaq 'eetega so Moisés, qalaq 'eeta': «Aỹem sechoxoren cam taalec da sechoxoren.» 16Qaq ỹoqo'oye ca lca'aguishec Ñim Lo'onatac 'Enauacna, saishet da nacheca cam shiỹaxaua maye maiche huotaique da qalca'ateua'a huo'otaq cam ỹo'ot da na'añaxataxac da huotaique da qalca'ateua'a camaye, cha'aye nachaqcata cam maiche chegoqchigui da nqouaguec Ñim Lo'onatac 'Enauacna. 17Ana nere maye huetalec na la'aqtacpi Ñim Lo'onatac 'Enauacna maye setaxaỹaxanaqtac nanettalec co'ollaq Ñimaye, 'enapega so nta'a maye ilotague' ye Egipto, 'eeta': «'Am sanagui da 'am nta'a, cha'aye sauotaique da sachaxan da ỹa'añaxac sachegoqchigui 'enauac nam 'am so'otec yaqto' 'enauac na shiỹaxauapi ana 'alhua aỹem ỹauatton.» 18Qaq 'era da 'eetec Ñim Lo'onatac 'Enauacna da maiche ỹoiqueetac cam huotaique da ỹo'ot. Ñimaye nqouaguec cam taalec da nqouaguec qataq qaramchigui naqa'en añi lquiyaqte cam taalec da qaramchigui naqa'en.

Da lalemataic qataq da lqouagaxanaqtaic Ñim Lo'onatac 'Enauacna

19Da huo'otaq huo'o ca aỹem 'enapega da 'eeta': «¿Negue't ca ishet da qomi' nmaxaleguete da qarasouaxashet Ñim Lo'onatac 'Enauacna, ye qaica ca ishet da dataỹa'aguet ca maiche 'eetapeguec Ñimaye?», 20nache aỹem ishet da sasateguet camaye sheeta': «'Am ñauochaxaua, ¿negue't 'am da qonetega sa ỹaỹamaxaayiñi naua lhuennataxaco Ñim Lo'onatac 'Enauacna?» Aca taxaqui maye no'oxona 'alhua, saishet da quetapeguelec cam ỹo'oxon souaxat da lataxac acamaye. 21Cha'aye cam 'alhua lo'o, camaye maiche ỹoiqueetac ca nshaxa ca lataxac naqa'en. Camaye ishet da ỹachegoxotchigui que'eca 'alhua, da ỹo'ot aca lo'oxona 'alhua maye taiguet da qaiuen da ivita ca laloqo' cam no'onataxanaxac maye lataxaua acamaye, qataq nataqa'en acam taiguet da qaiueetac ye na'a'q.

22Qaq de'era 'eeta'am da ỹo'ot Ñim Lo'onatac 'Enauacna. Cha'aye Ñimaye huotaique da ỹachaxan da 'eetec da huo'o ca ỹauo'o ca nhuaxanaguec da yaqto' 'enauac ana 'alhua, qaỹaỹaten da Ñimaye ỹataqta huo'o da la'añaxac. Qalaxaye Ñimaye huo'o da lhualaxavic da na'añaxateguet nam taỹa'actaxa da nhuaxanaguec qataq qailaxachigui. 23Qataq nataqa'en ỹachaxan da lta'araic lsoxoyec qataq la'añaxac da qomi' nca'alaxatre'c. Cha'aye nache 'eetai' co'ollaxa da lchoxonnataxanaxa da shenaqta qataq qomi' lca'agui'she da yaqto' souaqta'aguet Ñimaye. 24Qataq saishet da ỹectega da qomi' judiopi, huo'otaq saishet. 25Qaq ipacchigui da 'enapec Ñim Lo'onatac 'Enauacna maye nanettalec ana nere maye huetalec na la'aqtacpi maye ỹiyiñi co'ollaxa so la'aqtaxanaxanec Oseas, 'eeta':

«Nam saishet da ỹalamaxatpi,

qalaq seỹaxana da ỹalamaxatpi,

qataq nam saishet da sauotec,

qalaq sachaxana da isoxoyec.

26Qaq yem huaña co'ollaxa da shenapega namayepi da sheeta':

‹Qami' saishet da qami' ỹalamaqa'ate›,

nache huaña da qaltaq shenapega namayepi da sheeta':

‹Nagui qami' ỹalamaqa'ate,

Aỹem maye So'otna maye Aỹem nca'alaxa.›»

27Nataqa'en so na'aqtaxanaxanec Isaías co'ollaq detaxaỹa na Israel le'ecpi qalaq 'eeta':

«Na'aictaxa da ỹataqta qalota na Israel le'ecpi

da 'eeta'am na lsoche na delec maye hueto'ot na loigue aso auaxai,

qalaxaye saq 'amaqtaq cam qanca'alaxatec.

28Cha'aye Ñim Nataxala' ỹataqta saqaỹaloq da nmit

'enauac na huetalec ana 'alhua.»

29Qaq nacheso ỹoltaxa so Isaías da la'aqtac de'era, 'eeta':

«Ñim Lo'onatac 'Enauacna maye qaica ca ỹaqalanapec,

da huo'otaq saishet da nca'alaxatec se'eso saq 'amaqtaq,

nache naguictaxa, nache shenaqta'am

so nỹecpi ye Sodoma qataq ye Gomorra.»#9.29 Sodoma qataq ye Gomorra: Ñim Lo'onatac 'Enauacna, ilaxachiguilo co'ollaxa se'esoua so na'a'q maye huetaiguilo so Abraham, souaxat so shiỹaxauapi maye lama' soomaye da ỹataqta qauemaicpi (Isaías 1.9; Génesis 19.1-28).

Na Israel le'ecpi qataq So Cristo

30¿Negue't ca lỹa ishet da ỹa'aqtac? Ye nam laỹepi shiỹaxauapi maye saishet da nhuo' le'ecpi, namayepi qaica cam ỹo'ot cam yaqto' Ñim Lo'onatac 'Enauacna ishet da ỹaỹamaxareeta, qalaxaye nachena nam ỹaỹamaxareeta Ñim Lo'onatac 'Enauacna, souaxat da huo'o da lpi'iỹaxac. 31Qalaxaye nam Israel le'ecpi, namayepi sa qaỹaỹamaxaren, cha'aye namayepi huotaique da ipaqueelec na namaxasoxonaxacpi da yaqto' Ñim Lo'onatac 'Enauacna ỹaỹamaxareeta namayepi. 32Qalaq ¿ta'ainco' ye saishet da qaỹaconeguet namayepi? Cha'aye huotaique da Ñim Lo'onatac 'Enauacna ỹaconeguet namayepi souaxat nam ỹo'otpi, qaq saishet da huo'o ca lpi'iỹaxac Ñimaye. Ỹoqo'oye namayepi 'ena'am naqa'en ca coma' So Cristo da qaipogolaxaateguesop. 33Ana nere maye huetalec na la'aqtacpi Ñim Lo'onatac 'Enauacna Ñimaye 'eeta':

«Aỹem sanaña qome ye Jerusalén

ca 'oonolec coma'.

Qaq camaye qome qalota na depoxolaxaisop qataq huañi naqa'en.

Qalaxaye Ñim Lo'onatac 'Enauacna sa ỹatenachet

'enauac nam pi'iỹa'a Ñimaye.»

Currently Selected:

Romanos 9: LÑLE13

Highlight

Copy