Romanos 3

1Qaq ỹoqo'oye ¿huo'o ca naigui peta'a da qomi' judío lashe'? Qataq ¿'onaxaic peta'a da qaỹauo'o ca qana'anaxashet?#3.1 Qana'anaxashet (circuncisión): Qaitaxaỹaxan ye Romanos 2.25 maye ỹa'axat da naigui de'era na'aqtac. 2¡Aja' nache 'eetec! Cha'aye de'era la'aqtaxanaxac Ñim Lo'onatac 'Enauacna hua'auchiguiñi da qoỹami' co'ollaxa na judiopi. 3Qalaxaye ¿hua'ague ca 'eetec namayepi da huo'otaq sa ipaguelec de'era na'aqtac? Qaq ¿peta'a Ñim Lo'onatac 'Enauacna nache ỹaxaañi da saishet da ipaguelec da la'aqtac? 4¡'A'i, saishet! Chaqrata da Ñim Lo'onatac 'Enauacna ỹataqta 'eesa da ipacchiguilo naua la'aqtaqa, qaq na'aictaxa da 'enauac na shiỹaxauapi tenataxanaxaicpi. Cha'aye nache 'enapec naua ñiyigui'she maye nanettalec ana nere maye huetalec na la'aqtacpi Ñimaye, 'eeta':

«Da 'autaqa, nache qaila'a da ỹataqta 'eesa da qonapec,

qataq da 'anachattec da 'am qanmit, nache 'auauegaxan.»

5'Enauac nam qauem maye so'otaqtac ỹachaxan da Ñim Lo'onatac 'Enauacna ỹataqta 'eesa naxa da dalemata qataq ỹauo'o ye qanhuaxanaguec. Qalaxaye saishet da shenaqtega da Ñim Lo'onatac 'Enauacna da sa iqatchigui cam ỹo'ot (de'era itaxaỹaxac, ltaxaỹaxac ca choche shiỹaxaua). 6¡'Eesa mque' da sa nache 'eetec de'era! Cha'aye da huo'otaq Ñim Lo'onatac 'Enauacna saishet da ỹaỹamaqchiguiñi ca ỹo'ot, nache ¿ca 'eeteco' da ishet da ỹaỹaten ca 'onaxaic qataq da ỹaỹaten ca qauem?

7Qalaxaye de'era ỹatenataxanaxac da huo'otaq ichoxot da nquictec da llo'oxoyec de'era 'eesa lataxac maye chegoqo'ot Ñim Lo'onatac 'Enauacna, nache ¿ta'ainco' qone' da aỹem qanmit da sheeta'am qanqa'en ca huo'o ca lasouaxashet? 8Qaq da nache 'eetec de'era, qaq ¿ta'ainco' qone' ye sa qaỹo'ot cam sa ỹaỹamaxañi, yaqto' ishet da anac cam ỹaỹamaqchiguiñi? Qaq 'era dam huo'o na 'eetega da sapaxaguenataxanaqtapeguec, cha'aye qauem da lhuennataxa. Qaq ỹoqo'oye ne'ena shiỹaxauapi huo'o qome ca nhuaxanaguec.

'Enauac na shiỹaxauapi huo'o da lasouaxashet

9Qaq ỹoqo'oye ¿chaq hua'ague ca 'eetec? ¿Peta'a da qomi' judiopi, nache ishet da ñapagaqalec na laỹepi shiỹaxauapi? ¡'A'i, saishet da nache 'eetec de'era! Cha'aye mashe ime da qami' sa'aqtaxaateguema da qomi' judiopi qataq nam saq judiopi 'enauac qomi' 'etaxaloxoicpi. 10Cha'aye ana nere maye huetalec na la'aqtacpi Ñim Lo'onatac 'Enauacna, 'eeta':

«Qaica ca no'on da lataxac.

11Qataq qaica ca huo'o ca ỹaỹaten,

qataq qaica ca nshetaique da nmittaique Ñim Lo'onatac 'Enauacna.

12'Enauac namayepi qaỹoqta naqa'en Ñimaye;

qataq 'enauac ỹe'eguelaxa da qauemaicpi.

Qaica, ỹataqta imauec da qaica

ca nshetaique da ỹo'ot ca no'on.

13Nachaqrata da ỹataqta qauema naua la'aqtaqa;

qataq nda'a't da ỹaỹaten da latenataxanaxac.

Naua la'aqtaqa

ỹataqta deque'emaqtaxan

'eeta'am na na'araxanaq

da denagaxan.

14Da detaqa, qalaq saishet da matac

qataq ỹasaqteguelec naua qauema la'aqtaqa na shiỹaxauapi.

15Ỹataqta sa qaỹaña da lalemataic

qataq camachaqca ca ỹalauat.

16Cam dataigue

qalaq 'enauac nlaxaañi,

qataq ỹataqta ỹachoxoren.

17Saishet da ỹaỹaten da huetaigui da nlagaxayec,

18qataq saishet da huo'o ca 'enec naqa'en Ñim Lo'onatac 'Enauacna.»

19Cha'aye qomi' saỹaanaq da 'enauac nam 'enapec nam namaxasoxonaxacpi maye chegoqo'ot so Moisés, ỹalamaqchigui nam hueto'ot ne'ena namaxasoxonaxacpi. Qaq 'era da 'eetec yaqto' saishet da huo'o ca 'eetega da qaica ca ỹasouaxat, qataq yaqto' 'enauac na shiỹaxauapi ana 'alhua ỹaỹaten da huo'o da lasouaxashet hueto'ot Ñim Lo'onatac 'Enauacna. 20Da sepagaqtelec na namaxasoxonaxacpi, nache saishet da ỹa'axat da qaica ca qarasouaxashet da hueto'ot Ñim Lo'onatac 'Enauacna; cha'aye na namaxasoxonaxacpi ỹo'ot da qomi' saỹatenaqta da qomi' 'etaxaloxoiqa.

Da nca'alaxa chegoqchigui da npi'iỹaxac

21Ana nere maye huetalec na la'aqtacpi Ñim Lo'onatac 'Enauacna qomi' ỹapaxagueneque da lataxac da qomi' ỹaỹamaxareete' Ñimaye, qalaxaye saishet da chegoqchigui da salaxasoxolec na namaxasoxonaxacpi. 22Ñim Lo'onatac 'Enauacna ỹaconeguet 'enauac nam ỹa'amaqten qataq huo'o da lpi'iỹaxac So Jesucristo, saishet da iuen da huo'otaq judío qalqo' saishet. 23'Enauac qomi' huo'o da qarasouaxashet, qaq ỹoqo'oye ỹataqta qomi' qaỹoqtalo Ñim Lo'onatac 'Enauacna. 24Qalaxaye Ñimaye ỹataqta lta'araic da lauotaxanaqtaic da shenaqta. Qaq ỹoqo'oye ỹapalaxat na qarasouaxashet qataq qaca naqa'en aca lasheue. Nachaqrata da chegoqchigui So Jesús da qomi' isoueeguesopa da qanhuaxanaguec maye qomi' taleguetectaxa souaxat da qaye'etaxaloxo. 25-26Ñim Lo'onatac 'Enauacna namaxa ana 'alhua So Jesucristo da yaqto' qomi' ileualeguete. Da sepi'iỹaqa'a da So Jesús qomi' ileualeguete, nache Ñim Lo'onatac 'Enauacna ỹapalaxat na qarasouaxashetpi. 'Era da 'eetec da ỹachaxan Ñim Lo'onatac 'Enauacna da ỹataqta 'eesa. Qana'achec souaxat da lhualaxavic Ñimaye. Cha'aye nagui ỹapalaxat 'enauac nam qauem maye so'otaqtac co'ollaxa. Ñimaye ỹataqta no'on da lataxac qataq ỹaconeguet nam huo'o da lpi'iỹaxac So Jesús.

27-28Da souaqto'ot Ñim Lo'onatac 'Enauacna, nache iuen da saishet da ño'oxonnaqtai'. Cha'aye Ñim Lo'onatac 'Enauacna qomi' ỹaconegueta souaxat da huo'o da qarpi'iỹaxac So Jesucristo, qaq saishet da chegoqchigui da salaxasoxoguet na namaxasoxonaxacpi maye chegoqo'ot so Moisés.

29Qaq ¿peta'a Ñim Lo'onatac 'Enauacna nachaqnata nam judiopi da Lataxala'? ¿Saishet peta'a da Lataxala' nataqa'en na laỹepi shiỹaxauapi? Aja', namayepi nataqa'en Lataxala' Ñimaye. 30Cha'aye 'oonolec Ñim Lo'onatac 'Enauacna qaica ca lỹa. Qaq nacheñi Ñimaye ñim ỹaỹamaxareeta 'enauac nam huo'o da lpi'iỹaxac So Jesucristo, na'aictaxa da judío huo'otaq da saishet. 31Qalaxaye da huo'o da qarpi'iỹaxac So Jesús, nache damaye saishet da ỹa'axat da na namaxasoxonaxacpi maye chegoqo'ot so Moisés da qaica ca naigui. Nachaqrata da huo'o da qarpi'iỹaxac Somaye, nache ichoxot da huo'o naq 'enec ñaqa'enaq nam nqataxacpi.

Currently Selected:

Romanos 3: LÑLE13

Highlight

Copy