Proverbios 29
29
1Ca shiỹaxaua maye sa ỹaconeguet
da qaỹaỹamaxaañi da lataxac,
camaye qaica ca ishet da nca'alaxatec
da nque'elaxatta da qailaxachigui.
2Da qaỹatatalec na no'on da lataxac,
nache machiguiñi na shiỹaxauapi,
qaq da qaỹatatalec na qauem da lataxac,
nache na shiỹaxauapi huo'o da nque'eenaxac.
3Ca ñalec ỹaanaxanaxaic ỹo'ot da machiguiñi ca lta'a,
qaq ca nnaigaxaua aca quisheguetaxai
qalaq choche ỹa'ashaxan ana alom.
4Ca nta'a maye ỹo'ot da nalochiguiñi lataxac,
ỹo'ot da qaica ca iraxaatapigui' na netalec ca na'alhua,
qaq ca ndotec da iỹaxaataua'a da nsheetenaxanaxac
qalaq taỹañecra naqa'en na netalec que'eca 'alhua.
5Ca ỹale maye choche no'onaxa't naua la'aqtaqa
da detaqtacot ca nauochaxaua,
camaye choche nqoviitac que'eca lỹa.
6Ca qauemaic qalaq que'emaxama
naua maiche lqoinaxanaxaco,
qaq ca ỹale no'on da lataxac qalaq nda'a't da machiguiñi.
7Ca no'on da lataxac qalaq iuennata'a da huapegue' ca choxoraq,
qaq ca qauemaic qalaq saishet da huo'o ca qochetega.
8Qaq na nogoqtaxanaxaicpi qalaq lliỹa't naqa'en na netaña ca huaqta'a't nỹecpi,
qaq na ỹaanaxanaxaicpi qalaq nmanaqche't naua nhuennataxaco.
9Ca ỹaanaxanaxaic da ncotaỹapegue' ca qaica ca ỹaỹaanapec,
qalaq na'aictoxo' da dalemata huo'otaq daỹalleguettac,
qalaxaye qaica ca ỹachegoxotaigui damaye.
10Na laataxanaxaicpi qataq qauemaicpi
ỹaỹemec nam nalochiguiñi da lataxac,
qataq huotaique da ỹalauat na no'on da lataxac.
11Ca qaica ca ỹaỹaanapec saỹaỹaten da nllañi da nnogoxonaxac,
qaq ca ỹaanaxanaxaic qalaq ỹaỹaten da nllañi da nnogoxonaxac.
12Ca nta'a da ỹalaxagueta naua natenataxanaxaco,
nache 'enauac na lo'onataxanaxanecpi ỹo'ot na qauem.
13Ca choxoraq qataq ca sa dechoxonnataxan
caamaye nache 'eeta'a't,
cha'aye Ñim Nataxala' ỹanema caamaye da huo'o da lmeenaxanaxa'c.
14Ca nta'a da ỹaỹamaxatchiguiñi da lo'onataxanaxac
da ilotague' na choxoraqpi,
nache camaye nache 'eetai' da sa nlaguiñi
da lo'onataxanaxac.
15Ca nalashenaxanaxat qataq da qanlaxanec ca shiỹaxaua
damaye chegaqaigui da naỹaanec,
qalaxaye ca ñalec maye saiuooneguet da qaitaxaỹot,
ỹo'ot da la'aloxo aca late'e.
16Na qauemaicpi da qalota nache ỹataqta qalota da ñe'etaxaloxo,
qalaxaye na no'on da lataxac ỹauaachigui qom huañi namayepi.
17'Anhuogaxa ca 'aỹa'alec yaqto' 'aulactapiguiñi,
qataq ỹataqta 'auamachiguiñi.
18Ca huaña da qaica ca nauanaqchec saqcha'a, nache qaica ca naỹamqa',
qalaxaye machiguiñi na shiỹaxauapi
maye ỹalaxagueta naua nqataxaco.
19Saishet da ndotec da qaỹauota'aisalo
naua na'aqtaqa da qanlaxanec da lataxac ca nlatac,
cha'aye camaye ỹaỹaten damaye,
qalaxaye saishet da ỹalaq.
20Qaq ỹoqta ỹactec da ishet da qanaquita'a ca qaica ca ỹaỹaanapec,
cha'aye camaye saq 'ena'am ca sa ilo'oguelo naua la'aqtaqa da detaqa.
21Ca 'aco' da saishet da nhuogaxa ca l-latac da ñaq nogotolec,
nache huo'o ca na'a'q qaq choche ntogottague' camaye.
22Ca sa qaỹaloxonguit da lalemataic ỹo'ot da loquiaxac,
qataq ca sancherapec camaye qalota na lsomaxac.
23Da ño'oxonnaxac ca ỹale nachera da qaica ca la'amaqchec naqa'en,
qaq ca sa na'amqaanaxaic qalaq huo'o da la'amaqchec qanqa'en.
24Ca huaqtapeeguet ca cachaxaic
camaye maiche na'aqchettapeguela't,
cha'aye na'aictaxa da hua'aqtega da nsheunaguec
qalaxaye sa da'aqtaxan.
25Da qañe'etega na ỹalleppi damaye nachera da icoñerai' ca shiỹaxaua,
qalaxaye ca pi'iỹa'a Ñim Nataxala' camaye ỹataqta qanpaxattalec.
26Qalota na nmitta'ai da lqouagaxanaqtaic ca nta'a,
qalaxaye nacheñita Ñim Nataxala'
maye ỹan ca nalochiguiñi lataxac.
27Na ỹalleppi maye no'on da lataxac
saisheteguet na qauemaicpi,
qataq na qauemaicpi nataqa'en saisheteguet
na no'on da lataxac.
Currently Selected:
Proverbios 29: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
