Proverbios 14
14
1Aca 'alo ỹaanaxanaxai no'oxoosheguem ca lma',
qaq aca qaica ca ỹaỹaanapec qalaq nlaxaañi.
2Ca no'oitegue da lataxac qalaq huo'o naq 'enec naqa'en Ñim Nataxala',
qaq ca sa ỹaỹamaxañi da lataxac qalaq ỹo'otan Ñimaye.
3Naua la'aqtaqa ca qaica ca ỹaỹaanapec
qalaq chegaqaiguilo da na'amqaanaxac,
qaq naua la'aqtaqa ca ỹaanaxanaxaic
qalaq npaxattaleguete camaye.
4Da qaica ca nauegaxanaxala'pi huaca,
nache qui'itchigui ca laỹe' na ala na trigo,
cha'aye da la'añaxac ca nauegaxanaxala'pi
nquiguec naqa'en na ala na nañiguishec.
5Ca na'aqtaxanaxanec maye 'eesa saishet da datenataxan,
qaq ca na'aqtaxanaxanec maye saq 'en qalaq ỹa'axat ca saq 'en.
6Ca nogoqtaxanaxaic qalaq nmittaique
da naỹaanec qalaxaye saishet da ỹanata,
qaq ca ỹaanataxanaxaic qalaq qaica ca lqalaic da ỹanata da naỹaanec.
7Qoca'ai qome ca qaica ca ỹaỹaanapec,
cha'aye naua la'aqtaqa sa 'auachegoxotaiguilo ca 'arauattonaxanaxac.
8Da laỹaanec ca ỹaanaxanaxaic
ỹo'ot da ỹaỹateetegue da lataxac camaye,
qaq ca qaica ca ỹaỹaanapec qalaq maiche ỹatenachet da no'oopashaxac.
9Na qaica ca ỹaỹaanapec qalaq lashetac na maiche lasouaxashetpi,
qaq na ỹalleppi maye no'on da lataxac qalaq huo'o da nchoxonnataguec.
10Añi nquiyaqte ỹauatton da maiche lalamaxat nqui'ic,
qataq da lamaicỹaxac saishet da ỹaỹaten ca ỹaqa'a shiỹaxaua.
11Ca lma' na qauemaicpi qalaq taỹa'a da nlachiguiñi,
qaq ca lma' na no'on da lataxac qalaq nquictasheguem.
12Huo'o ca nqa'aic maye 'eeta'am da ỹashectec,
qalaxaye ca loga't camaye huetaña da nleuaxa.
13Ivira'a da naỹalliguiyec nataqa'en ỹo'ot da lqui'ic añi nquiyaqte,
qataq ye loga't da namaicỹaxac, damaye naquicoxo.
14Ca qaica ca ỹaỹaanapec qalaq ỹaỹamaxareeta da maiche lataxac,
qaq ca no'on da lataxac qalaq machiguiñi naqa'en nam ỹo'otpi.
15Ca qaica ca ỹaỹaanapec ỹa'amaqten 'enauac nam qaỹa'axatem,
qaq ca huo'o na ỹaỹaten qalaq ilotague' da lqauaxac.
16Ca ỹaanaxanaxaic ñi'iỹa'aguet ca qauem qataq ca'ai camaye,
qaq ca qaica ca ỹaỹaanapec qalaq qaica ca huotaique.
17Ca saq ỹoxonguit da lalemataic qalaq
saishet da deuennataxaalec ca ỹo'ot,
qaq ca deuennataxaalec ca ỹo'ot qalaq ỹaỹaten da nhualaxauen.
18Na qaica ca ỹaỹaanapec qalaq talec da qaica ca ỹaỹaana'a,
qaq na ỹaanataxanaxaic qalaq laueguec da lauattonaxanaxac.
19Na qauemaicpi qalaq ỹa'aroto naua l-llecte na soxoraicpi,
qaq na qauem da lataxac qalaq nachoxoreetacot
qataq hueta'a ca nasom na no'on da lataxac.
20Ca choxoraq qalaq ivira'a na nauochaxauapi da ỹaỹemec camaye,
qaq ca sallaxanec qalaq qalota na nauochaxauapi.
21Ca ỹo'otan ca nauochaxaua qalaq huo'o da lasouaxashet,
qaq ca ichoxoren na choxoraq qalaq ỹataqta machiguiñi.
22Ca nmitta'ai da ỹo'ot na qauem qalaq deqat da llecỹaxac,
qaq na nmitta'ai da ỹo'ot ca ỹaỹamaqchiguiñi
qalaq 'eesa qanqa'en qataq nauotaxat.
23'Enauac na qana'añaxaalec no'onatacpi huo'o ca naigui,
qaq na qalota na'aqtacpi qalaq ỹo'ot da nachoxoyec.
24Da laỹaanec ca ỹaanaxanaxaic
nachera da ỹo'ot da llo'oxoyec,
qaq ca qaica ca ỹaỹaanapec qalaq laueguec da no'oopashaxac.
25Ca 'eesa na'aqtaxanaxanec qalaq nca'alaxateeguesop da l-leuaxa ca lỹa,
qaq ca saq 'en na'aqtaxanaxanec, qalaq ỹo'otec da l-leuaxa ca lỹa.
26Da huo'o naq 'enec qanqa'en Ñim Nataxala',
nachera da ỹo'ot da 'eesa naqa'en da aquitaxac
qataq npaxattalec na ñalaqpi.
27Da huo'o naq 'enec qanqa'en Ñim Nataxala',
nachera da chegaqaigui da nca'alaxa,
qataq nca'alaxateeguesop ca shiỹaxaua da loxonaxanaxac da nleuaxa.
28Ca nta'a da qalota na ilotague',
nachera da ỹo'ot da llo'oxoyec camaye,
qaq ca llalec ca nta'a da saq 'amaqtaq na ilotague',
qalaq nachera da nlaguiñi naqa'en camaye.
29Ca qaỹoqchiguinguit da lalemataic camaye ỹoqta ỹaanataxanaxaic,
qaq ca sancherapec qalaq ỹachaxan da ne'enaxac.
30Da ỹe'emaqtac da nquiyaqteỹaxac,
nache no'oita naqa'en da no'ocỹaxac,
qaq da nquiỹaxanaqtaic qalaq ivira'a da iche'c naua npi'ineqa.
31Ca qaica ca naigui naqa'en ca choxoraq
qalaq camaye inogoqchet Ñim Lo'onatac 'Enauacna,
qalaxaye Ñimaye ỹo'oxoren ca ichoxoren ca choxoraq.
32Ca qauemaic qalaq nlaxaañi da maiche lle'etaxaloxo,
qaq ca ỹale no'on da lataxac qalaq npaxaalec da maiche ño'oxonnataguec.
33Añi lquiyaqte ca ỹaanaxanaxaic nache huetanguit da naỹaanec,
qalaxaye na qaica ca ỹaỹaanapec saishet da ỹauatton damaye.
34Naua nalochiyiñi lataxaco
ỹo'ot da la'amaqchec ca shiỹaxauapi,
qaq da ñe'etaxaloxo qalaq ỹo'ot da la'aloxo ca shiỹaxauapi.
35Ca nlatac maye sanqalat camaye lauotaxat ca nta'a,
qaq ca 'enaqaic qalaq lquiỹaxat camaye.
Currently Selected:
Proverbios 14: LÑLE13
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.