Marcos 7

Cam ỹataqta 'eesa da deshepaxanaqtaxan

(Mateo 15.1-20)

1-4Na judiopi qataq ỹactec nam chegaqaigui na fariseopi da namayepi quetague' da lataxac som hua'au lta'alpi, da saishet da deque'e da saxanaxa da iỹoi' naua lhua'q. Da ivireua'a ca lma' da mashe imat da nmenaxac, nache saishet da huo'o ca chec nam lsheenaxanaxat da saxanaxa da iỹo. Qaq huo'o so na'a'q, nache nqo'oneua'a So Jesús so fariseopi qataq som dapaxaguenataxaatapeguec na namaxasoxonaxacpi maye chegaqa'ague da Jerusalén. Qaq co'ollaq ỹauaachiguilo da soua lapaxaguenataqa So Jesús da deque'e', qalaxaye saxanaxa da iỹoi' naua lhuaq, nache quetapegueleguete soomaye 5Nache inattac So Jesús, 'eeta':

–¿Ta'ainco' naua 'arapaxaguenataqa ye saishet da quetegue da lataxac som hua'au qarta'alpi, ye da deque'e', nache saishet da iỹoi' naua lhua'q?

6Nache So Jesús ỹasategueto' somayepi, 'eeta':

–¡Qami' ỹataqta qami' tenataxanaxaiqa! Ỹataqta 'eesa Ñim Lo'onatac 'Enauacna, co'ollaq qami' ỹa'axata'alo, chegoqchigui naqa'en so la'aqtaxanaxanec Isaías, 'eeta':

«Ne'ena shiỹaxauapi 'eetega naxa da Aỹem ỹalaxaguet,

qalaxaye namayepi ỹoqta 'eesa da

saishet da Aỹem iuennatega.

7Ỹataqta qaica ca naigui da Aỹem qavio'oxoyiñiitac,

cha'aye maiche qauo'oche nam lataxacpi,

ime, nache qauapaxaguenataxañic,

qataq qoñiitega da ỹamaxasoxonaxac.»

8Qami' sa qaualaqaigueta naua lamaxasoxonaxaco Ñim Lo'onatac 'Enauacna, nache qoquiigue da maiche lapaxaguenataxanaxac na shiỹaxauapi. [Qaq damaye 'eeta', qoquiigue dam lataxac da qaiỹo ana naco'oña qataq ana ỹomaxaqui qataq qalota na laỹepi qauo'oche maye 'eeta'am damaye.] 9Qami' ỹataqta qauaỹachiñi da lataxac da qaumaqỹa'agueta naua lamaxasoxonaxaco Ñim Lo'onatac 'Enauacna, da yaqto' qoquiigue da maiche qaralamaxache qarapaxaguenataxanaxaqui. 10Cha'aye so Moisés co'ollaxa, 'eeta': «Qaualaqaiguet qataq huo'o naq 'enec qanqa'eñi ca qarta'ai qataq aca qarache'e.» Nataqa'en, 'eeta': «Ca isheuen ca lta'a huo'otaq aca late'e, nache camaye iuen da qaỹalauat.» 11-12Qalaxaye qami' da qarapaxaguenataxanaxaqui ye qoñiitega da ca ñalec saishet da qaỹamaqalec da itauan ca lta'a da huo'otaq, mashe 'eeta': «Sa seshet da 'am setauan, cha'aye 'enauac na aỹem hueto'ot mashe sanot Ñim Lo'onatac 'Enauacna.» 13Qaq da nache qoñiitec de'era, nache qami' sa qaualaqaiguet nam lamaxasoxonaxacpi Ñim Lo'onatac 'Enauacna da yaqto' qoquiigue da maiche qaralamaxache qarapaxaguenataxanaxaqui. Qataq qauo'oche na qalota laỹepi maye 'eeta'am de'era.

14Ime, nache So Jesús iỹaxana so shiỹaxauapi, nache 'enapega, 'eeta':

«Ña qana'axaỹaxañiỹa Aỹem 'enauac da qoñiita, qataq no'on da Aỹem qauaỹaañiteguet. 15'Enauac nam chec ca shiỹaxaua saishet da nshepaxanaqchet da nachaalataxac da datato'ot Ñim Lo'onatac 'Enauacna. Nam ishet da nshepaxanaqchet da nachaalataxac ca shiỹaxaua, nachera da lsheunaxanaxac qataq naua qauema la'aqtaqa maye nasaxare'c.» 16[Qaq cam huo'oi naua ltela lauaco, qaq no'on da na'axaỹaxaachiguiñi.]

17Qaq So Jesús co'ollaq ca'ai so shiỹaxauapi, nache pa'aigui so nỹec, nache soua lapaxaguenataqa inatta'ape Somaye chaq negue't ca naigui de'era daloqnaxaatega. 18Nache Somaye 'enapeco':

«¿Qache nataqa'en qami' saishet da qauaỹaañi de'era? Qaica ca 'oonolec nam chec ca shiỹaxaua da ishet da ishepaxanaqchet da nachaalataxac da datato'ot Ñim Lo'onatac 'Enauacna. 19Cha'aye nam qanallec saishet da taua'a da toonaxac, nachaqrata da tangui añi da'am ca shiỹaxaua, ime, nache inoxonec.»

Qaq So Jesús nasaxauec de'era, yaqto' qaỹaỹaten da qaica ca nallec da nshepaxan. 20Nataqa'en 'enapeco':

«Ca nshepaxanaqchet da nachaalataxac na shiỹaxauapi da nachatto'ot Ñim Lo'onatac 'Enauacna, nachena nam nasaxauec qataq nam ỹo'ottacpi. 21-23Cha'aye da huo'o ca nasaxauec ca qauem la'aqtac, qaq camaye qauemaic qataq nache 'eetai' da iuennatega ca qauem, qataq ca lataxac da ỹo'ot ca saỹaỹamaxañi, huo'otaq decache qataq ỹalauat ca lỹa huo'otaq da ncachetague' aca sa lhua, qataq nachaqrata da iuennatega cam 'eetec da ishet da sallaxanec qataq ỹo'ottac nam qauemsat, datenataxaatac, qataq quiỹaxanaqtaqaic, sheunaxanaxaic qataq ỹasaxalec ca qauem la'aqtac ca lỹa, qataq qaica ca ỹaỹaanapec qataq ño'oxonnaxaic.»

Da lpi'iỹaxac aso 'alo maye saishet da lma' ye Judá

(Mateo 15.21-28)

24Qaq co'ollaq ime de'era, nache So Jesús ca'ai ca hueta'a, nache taỹa ye nỹecpi le'enaxat Tiro. Qaq nache huo'oi soua na'axa'te da hueta'a so 'oonolec nỹec qataq saỹaỹamaxaren da qaỹaỹaten da hueta'a yemaye. Qalaxaye saỹañoxot da nqañoxooñi.

25-26Qaq huo'o aso 'alo da ỹaỹaten So Jesús da hueta'a yi'iye 'alhua, nache jec da ỹe'eguena'a Somaye, cha'aye huo'o aso llale maye huo'o so netaigui saqcha'a na'añaxac leguemaxaic. Qaq asa'aso 'alo saishet da lma' ye Judá, asomaye lma' ye Fenicia, maye huaigui ye 'alhua Siria. Qaq co'ollaq ỹanata So Jesús, nache ỹa'aroto naua l-llectel, nache nachoxoreetacot da ỹo'orauec so saqcha'a na'añaxac leguemaxaic maye netaigui aso llale. 27Qalaxaye So Jesús 'enapego' asomaye, 'eeta':

–Ña 'aua'axaỹa'a nam ỹoqta ñalaqpi da hua'auñi da deque'e, cha'aye sa ỹaỹamaxañi da qaiuotaxanec ca aloq na ỹoqta ñalaqpi, nache qoỹami' na pioxoppi.#7.27 Qoỹami' na pioxoppi: Na judiopi huo'o naxa da ỹamata'ac pioxoppi nam saishet da judiopi.

28Nache asomaye 'enapeco':

–'Eesa da qonapec, 'am Ỹataxala', qalaxaye ivira'a nam pioxoppi maye hueto'ot na pa'aguiñi ca lquia'axala' ca ñalaqpi, checta'aguet na naañi aloq lsoche camayepi.

29Nache So Jesús 'enapego' asomaye, 'eeta':

–'Am 'alo ỹataqta 'eesa de'era qonapec. Qaq nagui no'on da 'avi'eguelaxa ca 'arma', cha'aye som saqcha'a na'añaxac leguemaxaic mashe ca'ai aca 'aỹa'ale.

30Nache aso 'alo ỹe'eguelaxa ca lma', qaq co'ollaq ivita, nache ilalec aso llale da huetalec so lmala', qaq som saqcha'a na'añaxac leguemaxaic mashe ca'ai asomaye.

So Jesús nataren so saq hua'aqa qataq na'aprapegue'c naua la'aqtaqa

31Nache So Jesús qaltaq ca'ai ye nỹecpi le'enaxat Tiro, nache taalec ye 'alhua Sidón, choche ivittaxaama aso lapel ye Galilea yem 'alhua Decápolis.#7.31 Decápolis: Qaitaxaỹaxan da naigui de'era ne'enaxat hueta'a ye Marcos 5.20. 32Qaq huaña yemaye, nache qanauegueua'a so ỹale maye saq hua'aqa qataq na'aprapegue'c naua la'aqtaqa, nache qanachoxoreetacot Somaye da yaqto' ỹashel-lec, nache no'oita. 33Nache So Jesús iỹotauga somaye, ca'ai naqa'en so shiỹaxauapi, nache ỹa'aroiguilo naua ltela lauaco somaye, ime, nache nqaigoxoleguete naua llaxaata, nache ỹasheleua'a ñi lachaxat somaye. 34Ime, nache ỹamato'ot na piguem, nache ñaxaayishegue'm naua la'a'che, nache 'enapego' somaye, 'eeta':

«¡Efatá!» Damaye naigui da 'eeta': «¡Nauatre'c qome naua ntela lauaco!»

35Huaña, nache se'eso ỹale hua'aqa, qataq ỹaỹamaxaayiñi naua la'aqtaqa.

36Nache So Jesús 'eetega so shiỹaxauapi da saishet da huo'o ca qaỹa'aqtaxanem de'era. Qalaxaye co'ollaq ỹataqta na'axannec da huaqatteguelec somayepi, nache somayepi ỹataqta nquigaxattec da la'aqtaxanaxac, 37cha'aye huo'o da la'aalaxa, nache 'eeta': «So Jesús ỹataqta 'enauac nam ỹo'ot ỹaỹamaqchiguiñi. ¡Cha'aye ivira'a da hua'aqa naqa'en na da'añaigui na lqaic, qataq na qaicaua naua la'aqtaqa qalaq detaqa naqa'en!»

Currently Selected:

Marcos 7: LÑLE13

Highlight

Copy