Malaquías 3
3
Ñim Nataxala' namaq ca la'aqtaxanaxanec
1Ñim Nataxala' maye Qaica ca Ỹaqalanapec 'enapec: «Mashe huotaique da ñamaq ñim ỹa'aqtaxanaxanec, da yaqto' iqataxanai' cam ñaqa'aic. Ñim Nataxala' maye qanmicheetaique, mashe saqaỹaloq da naỹa añim atamnaxaqui maye lalamaqte. ¡Mashe anacta nam na'aqtaxanaxanec maye ndoi' na aỹamaxataxac maye qanqopicheetaique!» 2Qalaxaye ¿negue't ca ishet da nala'aguet que'eca na'a'q maye lviraxaqui? Qataq ¿negue'tom cam ishet da nachaata'aguet? Cha'aye qom nvi', nache 'eeta'am ca norec, da yaqto' qomi' iqui'itaxa't, qataq 'eeta'am qome ca nỹoxonaxat da iỹouec nam qarshepaxanaxa. 3Ñim Nataxala' nso'ooñi qome da iỹo na ntaxaỹaxanaxanecpi maye chegoxoguet so Leví, 'eeta'am cam iỹo ca lcat oro, qataq ca lcat plata. Qaq ime qome, nache namayepi ishet da ỹanot Ñim Nataxala' aca lachetaqtaxanaqte, qaq nache ipacchigui dam ỹoqta 'eesa lataxac. 4Nache Ñim Nataxala' ỹaỹamaxareeta qome, ana lachetaqtaxanaqte na Judá, qataq na Jerusalén, 'eeta'am da 'eetec naxa soua hua'au' na'axa'te da machiguiñi naqa'en Ñimaye. 5«Aỹem ñanac qome da qami' ñemi't, qataq sa'axat nataqa'en nam napaxagueetega na 'iyaxaic, qataq na ncachetague' aca saishet da lhua, qataq na saipaguelec ca ỹan la'aqtac, qataq nam saiyacnapec na 'onataxanaxaicpi, qataq ana pa'aipi, qataq na saploqpi, qataq na saỹaỹamaxatapec na chegaqauecpi, qataq nam qaica ca 'enec naqa'en Aỹem. Qaq 'era da la'aqtac Ñim Nataxala' maye Qaica ca Ỹaqalanapec. 6Cha'aye Aỹem Nataxala', saishet da ñequic. Qaq ỹoqo'oye qami', maye qauachegoqoiguet so Jacob, saishet co'ollaxa da qami' qanmatchiyiñi.» 7Qaq nache chegoqchiguiña se'eso na'a'q, co'ollaq ñaq huo'o som qarta'ailpi, da qami' saishet da qaualaqaiguet na ỹamaxasoxonaxacpi, qataq saqauaỹamaxache. Qaq Aỹem Nataxala' maye Qaica ca Saqalanapec, qami' shenapegalo. ¡Aỹem qañe'eguelaqỹa qome, nache Aỹem qami' she'eguelaxagueta! Qalaxaye qami' qoñiỹapec: «¿Ta'ainco' da 'am she'eguelaxasoqot?» 8Qaq Aỹem shenapec: ¿Cam shiỹaxaua peta'a ishet da decachiỹot Ñim Lo'onatac 'Enauacna? ¡Qalaxaye qami' Aỹem qaucachiitacot! Qalaq ñaq 'eetalec qaunataxañiitac, qoñiita': «¿Negue't cam saconaxa da 'Am secachaqtacot?» ¡Qomye Aỹem sa qandoiua'a ana qarachetaqtaxanaqche, qataq ana qandiezmoi! 9Qaq 'enauac nam shiỹaxauapi maye netalec ne'ena 'alhua, qataq 'enauac qami' da Aỹem qaucachiitacot; qaq ỹoqo'oye qami' taleguete ñaqa'en qome ca qauem. Qaq Aỹem Nataxala' maye Qaica ca Saqalanapec qami' shenapegalo: 10Qandoiua'a qome ana qandiezmoi añim laỹe' anamaye, maye netaigui añi atamnaxaqui, qaq yaqto' huo'o qome na nallec ñi ima'. Ñaq Aỹem qavi'eguiñic qome de'era, yaqto' qauaỹachiñi da Aỹem seshet da sauatoigui nam lasompi na piguem, da yaqto' qami' secoreleguete da ichoxonnataxanaxa, nache ivita'a da chochaq huañi da qana'achecỹaxaqui. 11Qataq na ala na qa'añiguishequi sa sashenem qome, da nlaxaañi na lalaxat, qataq na lma' ana qa'añiguishe uvapi. 12Qaq huaña nache 'enauac na ỹotta'at shiỹaxauapi, qami' ỹamata'aque qome da ỹataqta qauamaichiguiñi, cha'aye qami' qoñeetalec qome na 'alhua maye ỹataqta 'onaxaic. Qaq 'era da ỹa'aqtac Aỹem Nataxala' maye Qaica ca Seqalanapec.
Da lchoxonnataxanaxa Ñim Nataxala'
13Ñim Nataxala', 'enapec: Qami' ỹataqta sansatte' naua qara'aqtaqalli' da Aỹem qautaqaitega. Qalaq ñaq 'eetalec da qaunataxañeetac qoñeeta': «¿Negue't cam qauem qara'aqtac da 'am sataỹaqa'aguet?» 14Qomye qami' qoñeỹapec naxa: Da qaỹo'onataxaatacot Ñim Lo'onatac 'Enauacna, qaica ca naigui. ¿Negue'to' cam sachegoxotaqaigui da so'otaqtac dam lamaxasoxonaxac Ñimaye, da sanaqtrañi naua qarasouaxaqui da sataqto'ot Ñim Nataxala' maye Qaica ca Ỹaqalanapec? 15Qomi' sauanaqchigui, da nam ño'oxonnaxaicpi ỹataqta matapiguiñi, qataq na 'etaxaloxoicpi ỹataqta nquictauec nam hueto'otpi, qataq ỹe'eguen naxa Ñim Lo'onatac 'Enauacna, qalaq saishet da talec ca nhuaxanaguec. 16Qaq huaña nache nam huo'o naq 'enec naqa'en Ñim Lo'onatac 'Enauacna, detaqtega't. Qaq Ñim Nataxala' hua'axaỹa, nache ỹataqta na'axaỹaxaachigui na la'aqtacpi. Qaq nache qaỹatato'ot Ñim Nataxala', co'ollaq qoỹerelec aso nere da yaqto' saishet da qaicoua'ai nam huo'o naq 'enec naqa'en Ñim Nataxala', qataq ỹo'oxoreetac Ñimaye. 17Ñim Nataxala' maye Qaica ca Ỹaqalanapec 'enapec: «Aỹem seqataxaatai' ca 'oonolec na'a'q, maye huaigui da namayepi ỹe'eguelaxa da qaltaq ỹalamaxat. 'Eeta'am ca nta'a da ichoxoren ca llalec, qaq nache sheetec qome da qaltaq sechoxoren namayepi. 18Huaña qome, nache qami' qaltaq ỹataqteguet qanqa'eñi ca no'on qataq ca qauem, qataq cam ỹo'oxoreetac Ñim Lo'onatac 'Enauacna, qataq cam saishet da ỹo'oxoren Ñimaye.»
Currently Selected:
Malaquías 3: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
