Lucas 22
22
Da qoỹoxottañi ỹamaxataxac da qaỹaconeua'a So Jesús
(Mateo 26.1-5, 14-16; Marcos 14.1-2, 10-11; Juan 11.45-53)
1Qaq mashe nayeetauga som laloxoqui da qanallec ana nauole 'ayiiña, maye qaca aca lalegue anam ỹasheeraxachigui. Se'eso naponaxac nataqa'en le'enaxat da Lapascua.#22.1 Na'a'q maye huetoigui da qaiuennate so na'a'q co'ollaq qanayeca'ai ye Egipto. 2Nache so lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq som dapaxaguenataxaatapeguec na namaxasoxonaxacpi, somayepi nmittaique ca ỹachegoxotchigui da ishet da ỹalauat So Jesús, qataq da saishet da qananoma, cha'aye somayepi ỹataqta ñi'iỹa na shiỹaxauapi.
3Nache so pa'aguenataxanaxaic taigui da lquiyaqteỹaxac so Judas, da le'enaxat lỹa Iscariote. Somaye maiche 'oonolec soua doce lapaxaguenataqa So Jesús. 4Nache somaye nqo'oneua'a da detaxaỹapegue' so lataxala'pi na ntaxaỹaxanaxanecpi, qataq so huataxanaqpi maye ilotague' aso no'onaxanaxaqui late'erai, nache naỹamaxate' somayepi da yaqto' ỹaneua'a somayepi So Jesús. 5Nache somayepi ỹataqta huo'o da lpe'e. Huaña, nache qaỹachaxanapecot somaye da qaisheeten. 6Nache so Judas ỹasat, nache ỹachegoxotchiguiña da nmitaique ca lataxac da ỹaneuo So Jesús, qataq da sa qananoma.
Da nquia'axac maye saishet da qaicoua'ai
(Mateo 26.17-29; Marcos 14.12-25; Juan 13.21-30; 1 Corintios 11.23-26)
7Qaq co'ollaq mashe ivireugalo soua na'axa'te maye huetoiguilo da qanallec ana nauole 'ayiiña maye sa qaỹauo'o aca lalecte. Se'eso na'a'q nataqa'en nalaataxaqui na qagueta llalec da yaqto' qanallec da qaiuennate so na'a'q le'enaxat da Lapascua. 8Nache So Jesús ỹama'q so Pedro qataq so Juan, nache 'enapegalo', 'eeta':
–Qoqui qome, qauqataxañiỹai' cam qonoq na pe maye le'enaxat da Lapascua.
9Nache soomaye denataxa'n, 'eetra':
–¿Ca hua'ague ca 'auauotaique da sachaqa'ague camaye da seqataxanaqai'?
10Nache So Jesús 'enapeco':
–Qami' qom qaunoxoñiiua'a ye nỹecpi ye Jerusalén, nache huaña yemaye qaq qauloỹa'ague qome ca ỹale ỹachetac aca laco'oña 'etaxat laỹe'. Qaq nacheca qome qauca'acheegue, choche qaviyeetaua'a ca nma' maye tateua'a. 11Nache qoñiỹapega qome cam lma' que'eca nỹec, qoñiita': «Ñim Napaxaguenataxanaq huotaique da ỹaỹaten ca hua'ague cam ndaqa', maye huaña da dequi'iỹa'aisalo naua lapaxaguenataqa ne'ena pe maye le'enaxat da Lapascua.» 12Nache qami' ỹachaxanalo qome ca ndaqa' lta'araic na pa'aỹasheguem ca nỹec, mashe sogote da qaỹaỹamaxatchiguiñi. Huaña, nache qauqataxañiỹai' qome cam qonoq ne'ena pe.
13Nache so Pedro qataq so Juan je'c, nache nateeralec 'enauac nam 'eetega So Jesús. Huaña, nache iqataxaarai' so nquia'axala' qataq so nallec.
14Qaq co'ollaq ivita so laloqo' da nquia'axac, nache So Jesús qataq soua lapaxaguenataqa nso'ooyiñi da dataleguete so nquia'axala'. 15Nache So Jesús 'enapeco':
–¡Aỹem ỹataqta huo'o da iyaxa da qami' ñeuanaxau' ne'ena nallec, nagui da saxanaxa da ñeque'etaxangui da ñeque'eenaxac, qataq da saxanaxa da seleu! 16Cha'aye Aỹem shenapec da nagui saishet da qaltaq she'eguelaxalec da sachec ne'ena nallec, nato' qom ivita ca na'a'q da qaltaq sequi'iỹaqa'a't qom souaqtaigui ca lta'araic lquia'axac Ñim Lo'onatac 'Enauacna.
17Nache ỹacona asom ỹomaxaqui. Ime, nache ỹanot da na'achec Ñim Lo'onatac 'Enauacna. Qaq co'ollaq ime, nache 'eeta':
–Qauacoñiiguet ana'ana ỹomaxaqui, nache qanỹomiigui. Ime, nache ñi 'oonolec da qoñiita ỹami' ca lỹa. 18Cha'aye Aỹem shenapec nagui da saishet da qaltaq she'eguelaxalec da ñeỹomgui ne'ena lli'i ana uva, nato' qom nvi' ca lo'onataxanaxac Ñim Lo'onatac 'Enauacna.
19Qaq co'ollaq ime, nache ỹacona aso nauole 'ayiiña, nache ỹanot da na'achec Ñim Lo'onatac 'Enauacna. Ime, nache icolaxachigui, nache ỹanoiguilo soomaye, nache 'enapeco':
«'Ena na maiche ỹo'ocỹaxac maye qoỹaneguet da nalaataguec, souaxat da qoñiita. Qaq qauo'ocheetaco' qome damaye, yaqto' saishet da Aỹem qaucoviỹa'ai.»
20Qaq nache ỹe'enaxatteguet nataqa'en aso ỹomaxaqui maye nlaqchigui na lataxa co'ollaq mashe ime da nquia'axac, nache 'eeta':
–Ne'ena lataxa nachenaua naua itago'q maye huecolde'c, souaxat da qoñiita. Qataq naamaye nachenaua naua chegoqchiguilo da Ñim Lo'onatac 'Enauacna qami' naỹamaxatto.
21Qaq nagui qami' iuen da qauaỹaañi da ñi Aỹem ỹaneuo qome, ñimaye nataqa'en ñeso'onaqta'ai', datatalec ne'ena qarquia'axala'. 22Qalaxaye ne'ena Shiỹaxaua Llalec, namaye quetelec dam llecỹaxac maye sogote da qoỹettañi, ¡qalaxaye ñim ỹale maye Ayem ỹaneuo ỹataqta qauem qome ca taỹa'aguet!
23Huaña, nache maiche nnattega't soomaye da chaq negue't cam ỹaneuo So Jesús.
¿Negue't ca ỹactec da la'amaqchec?
24Huaña, nache soua napaxaguenataqa ncotatrapigui da chaq negue't ca ỹoqta ỹactec da la'amaqchec soomaye. 25Qalaxaye So Jesús 'enapeco':
«Ana'ana 'alhua nam nta'alpi maye ilotague' na ỹotta'a't shiỹaxauapi, saishet da ỹashen da huo'o ca qaỹo'ot da huo'otaq sa qaicoyeguen namayepi. Nataqa'en nam nataxala'pi maye ilotague' na shiỹaxauapi da detaqa nache, 'eeta': ‹Qomi' ỹataqta qami' qanauochaxau' ỹoqo'oye qami' so'otaxaque ca ỹaỹamaqchiguiñi.›
26Qami', qalaxaye saishet da nache qoñiitec de'era. Cha'aye ca 'oonolec da qoñiita da nshetaique da ỹo'oxoraq, nache camaye iuen da ỹe'enaxat da qaica ca la'amaqchec da ỹalectaigui na laỹepi. Qaq cam nataxala', camaye iuen da huapegue' na laỹepi.
27Qaq ỹoqo'oye ¿chaq negue't cam ỹoqta ỹactec da la'amaqchec, peta'a cam nso'ootañi da datatalec cam nquia'axala' da deque'etac, huo'otaq cam do'onataxaatac? Qaq ¿peta'a saisheto' da nacheso som datatalec so nquia'axala' som huo'o da la'amaqchec? Aỹem, qalaxaye qami' sootaiguilo, sheeta'am da qami' so'onataxaatacoto.
28Qaq qami' ỹataqta nache 'eetai' da Aỹem qannaiquiitague', qaq qanque'etaxañiigui 'enauac nam ñeque'eenaxaguesat. 29Qaq ỹoqo'oye Aỹem qami' sanema qome da qanhuañiỹaua'a ca ỹo'onataxanaxac da selo'ogue 'enauacna, cam Aỹem ỹanem qome ñi Ita'a, 30nache qami' ñeuanaxau', qataq qami' ñeỹomaxau' cam iquia'axala' qom mashe sootaigui ca ỹo'onataxanaxac, qataq nataqa'en qanso'oñiingui acam so'onaxaquipi maye ỹo'oxoraq, da yaqto' qanmichi nam llalaqpi soua doce llalqa so Israel.»
So Jesús ỹa'axata'a da nqoleguet so Pedro
(Mateo 26.31-35; Marcos 14.27-31; Juan 13.36-38)
31Nataqa'en 'enapeco' So Jesús:
–Simón, Simón, maxatchaxa, ten so pa'aguenataxanaxaic mashe iỹaxanot Ñim Lo'onatac 'Enauacna qataq mashe qoỹami' da qami' ỹe'egue'n, huotaique da 'eeta'am naqa'en qami' na trigo da ichegoq. 32Qalaxaye Aỹem 'am ñeqouagaxaueetapeguelec, da yaqto' saishet da saqca ca 'arpi'iỹaxac Aỹem. Qaq 'am qom ivita da Aỹem 'añe'eguelqot, nache 'autauan qome na 'arqaỹañecpi da yaqto', nache 'eetai' da lpi'iỹaxac.
33Nache so Simón 'enapeco':
–'Am Ỹataxala', aỹem qaica ca shega da 'am iỹateuo aca ncoñetaxanaxaqui, ivitta'a da 'am seleetañi'.
34Qalaxaye So Jesús 'enapego' somaye, 'eeta':
–Pedro, nagui 'am sa'aqtaxanem da ne'ena pe qom yaqta'a da nỹen ca 'olgaxa, nache 'am mashe tres qome da 'avi'eguelaxalec da 'anqoleguet da qonetega Aỹem sa 'auauatton.
Soua napaxaguenataqa saishet da ỹaỹaanegueta So Jesús
35Nache So Jesús inatta'ape soua lapaxaguenataqa, 'eeta':
–Se'eso na'a'q can qami' sama'q da saishet da qauauo'oi caua qarachoxonaxaquilli' qataq aca laỹe' aca qo'omi qataq caua qarapela'achilli', qaq ¿peta'a huo'o co'ollaxa ca qaviñiitaique?
Nache soomaye 'ena'apo':
–'A'i, qaica ca seuenaqtac.
36Nache 'enapeco':
–Nagui qalaxaye ca huo'o ca lachoxonaxaqui, qaq no'on da ỹache, nataqa'en cam alom laỹe'. Qaq cam qaica ca lainec, qaq no'on da imen ca lapo', ime, qaq desheenaxanaique camaye. 37Cha'aye Aỹem shenapec da ỹataqta iuen da ipacchigui qome da ña'aqtaguec maye ỹa'axa't naua ñiyigui'she la'aqtaqa Ñim Lo'onatac 'Enauacna maye 'eeta': «Nache qaỹalecnoigui nam 'etaxaloxoicpi camaye.» Cha'aye 'enauac nam ña'aqtaguec maye qoỹettañi, namaye iuen da ipacchigui.
38Nache soomaye 'ena'apo':
–'Am Qarataxala', 'enaua huo'oi naua dos qorainaqa.
Nache Somaye 'enapeco':
–A'aye, nache tachiguiña, qami' saishet da Aỹem qauaỹaañiguet.
So Jesús nqouagaxaueetac souaxat da ỹataqta ỹaguec da laquicoxo
(Mateo 26.36-46; Marcos 14.32-42)
39So Jesús ca'ai ye nỹecpi, nache tauga aso qaỹoqotcheguemec 'alhua maye nanqa' ana Olivo, cha'aye maiche lataxac naxa. Qaq soua lapaxaguenataqa, nache nnaictagueto Somaye. 40Qaq co'ollaq ivireugalo yemaye, nache 'enapegalo soomaye, 'eeta':
–Qanqouagaxauñi qome, yaqto' saishet da qami' inoxonoiguilo ca qauem nhuennataxac.
41Nache So Jesús ca'aisalo, taỹa cam qaỹata'a cam huetra'a soomaye. Ime, nache ỹa'alyiñi naua l-llectel da nqouagaxauen. 42Nache, 'eeta':
–'Am Ita'a, da 'aushet, qaq no'on da saishet da Aỹem 'apagaqna'aguet de'era que'eenaxac. Qalaxaye saishet qome da 'auo'ot ca maiche sheetapeguec, nachaqcata ca maiche qonetapeguec.
43[Nache anac som namaxashec chegoqo'ot na piguem da ỹanem da la'añaxac Somaye. 44Qaq co'ollaq mashe ỹaguec da nque'eenaxac, nache qaltaq nquigaxattec da na'añaxataxac da nqouagaxaunaxac, nache na nchelchaxa maye anactac, 'eeta'ama naua ntago'q da ñeeleguete na 'alhua.]#22.43-44 Yi'iyiua versículos qaỹauo'o so la'anaxat maye ỹa'axat da saishet co'ollaxa da ỹalegueuo se'eso na'aqtac asom ỹataqta togoshe nerepi.
45Qaq co'ollaq imat da nqouagaxaunaxac, nache ñesheguem da nqo'onalo soua lapaxaguenataqa. Nache co'ollaq ivitalo, nache ilaleguete da do'ochete' soomaye, souaxat da sa nalo'ogueta da laquicoqo'. 46Nache 'eetegalo soomaye, 'eeta':
–¿Ta'ainco' ye qauo'ocheeta? Ña qoñiisheguem. Ime, qaq qanqouagaxauñi, yaqto' ishet da qauataiỹa'aguet da qañe'eguenataguiiqui maye saqaỹapeque.
Qaỹaconeua'a So Jesús da qaicoñe'
(Mateo 26.47-56; Marcos 14.43-50; Juan 18.2-11)
47Qaq ña detaqtac So Jesús co'ollaq nvi' so ỹataqta qalota shiỹaxauapi. Qaq qanatataueegue so Judas, som 'oonolec soua doce lapaxaguenataqa Somaye. Nache so Judas nquigueua'a So Jesús da napigoxoi'. 48Nache So Jesús 'enapego':
–Judas, ¿'am 'anapigoxoi' Aỹem Shiỹaxaua Llalec da 'auauotaique da Aỹem 'aỹa'aneuo?
49Qaq soua lapaxaguenataqa maye nnaictagueto So Jesús co'ollaq ỹauaachiguilo de'era qanayeuaigui, nache inattac Somaye, 'eeta':
–'Am Qarataxala', ¿seloquiaxai' peta'a namayepi?
50Nache so 'oonolec soomaye iquesoxouec aso aloiguishe ltela som l-latac so lataxala' nam ntaxaỹaxanaxanecpi da qaitaxaỹapegue' Ñim Lo'onatac 'Enauacna. 51Qalaxaye So Jesús 'enapeco':
–¡Qauaqaỹa'a, a'aye, nache tachiguiña!
Nache So Jesús ipoteua'a ana ltela so namaxashec, nache nataren. 52Ime, nache 'enapega som lataxala'pi nam ntaxaỹaxanaxanecpi qataq som huataxanaq maye ilotague' aso no'onaxanaxaqui late'erai, qataq som nqueroxonecpi maye lataxala'pi na judiopi maye anac da ñe'eguenauga Somaye da ỹauec, 'eeta':
–¿Qami' qauanaqui, qanacheeta'ape naua qa'ainaqalli' qataq naua qanpo'oñilli', 'eeta'amo' da huo'otaq Aỹem cachaxaic? 53Qami' soota'agueta soua na'axa'te añi no'onaxanaxaqui late'erai, qalaq ¿ta'ainco' ye saisheto' da Aỹem qauacoñiiua'a? Qalaxaye nagui mashe ivita ye laloqo' da qauo'onataxañi qataq da do'onataxan da la'añaxac na napalaxa.
So Pedro nqoleguettac, 'eetega da sa ỹauatton So Jesús
(Mateo 26.57-58, 69-75; Marcos 14.53-54, 66-72; Juan 18.12-18, 25-27)
54Nache qaỹaconeua'a So Jesús da qaicoñe', nache qaỹauegueua'a ca lma' som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna. Nache so Pedro ca'attaueegue Somaye, qalaxaye qaỹoqteguet. 55Qaq co'ollaq ivireuo somayepi, nache qaỹalon so norec, qaỹachangui na laiñi so qasoxoc. Qaq nataqa'en so Pedro nso'ooñi, ỹalectaigui somayepi. 56Huaña, nache huo'o aso nlata co'ollaq ila'a somaye da datatangui so norec, nache iloto'ot, qaq 'enapeco':
–Nataqa'en peta'a ñi'iñi ỹale nnaictague' da Jesús.
57Qalaxaye so Pedro nqoleguet, nache 'eeta':
–'Am 'alo, aỹem sa sauatton damaye.
58Qaq co'ollaq qaỹata'ague de'era, qaltaq jec so lỹa da ila'a somaye, nache 'enapega, 'eeta':
–¡'Am nataqa'en 'am 'oonolec nam ca'attague' da Jesús!
Nache so Pedro ỹasateguet 'eeta':
–Aque', saishet da nachaỹem.
59Qaq co'ollaq mashe qaỹata'ague de'era, nache huo'o so lỹa ỹale da ỹe'eguelaxalec da 'enapec:
–Ỹoqta 'eesa ñaqa'en da ñi'iñi ỹale da ca'attague' nataqa'en da Jesús, cha'aye ñimaye nataqa'en chegaqa'ague da 'alhua Galilea.
60Nache so Pedro 'enapeco':
–Aque', aỹem sa saỹaten de'era 'aua'axattac.
Nache co'ollaq ña detaqtac so Pedro, nache nỹen so 'olgaxa. 61Huaña, nache So Jesús namataique so Pedro, nache so Pedro tachigui lauel da la'aqtac So Jesús co'ollaq 'eeta': «Qomele qom nỹen ca 'olgaxa, qaq mashe tres qome da 'avi'eguelaxalec da 'anqoleguettac da qonetega da Aỹem sa 'auauatton.» 62Huaña, nache pa'auec so Pedro, nache ỹataqta lta'araic da nnoinaxac.
Qaỹe'enai' So Jesús
(Mateo 26.67-68; Marcos 14.65)
63Nache so shiỹaxauapi maye iuattague' So Jesús, ỹataqta ỹe'enai' Somaye qataq iuaxaatac. 64Ỹapoguilo naua la'ai'te somaye, qataq nhuaxanec na lashec, nache 'eetega, 'eeta':
–¡Ña 'aua'axat chaq negue't na 'am iuaxaatac!
65Qataq qalota na laỹepi na'aqtac da qaisheueetac Somaye.
So loicnatac na lataxaguesatpi nmit So Jesús
(Mateo 26.59-66; Marcos 14.55-64; Juan 18.19-24)
66Qaq co'ollaq mashe yo'oxoñi, nache lapona't so nqueroxonecpi maye lataxala' na judiopi qataq so lataxala'pi na ntaxaỹaxanaxanecpi qataq nam dapaxaguenataxaatapeguec na namaxasoxonaxacpi. Nache somayepi ỹauec So Jesús, ỹauegueua'a so nta'alpi maye loicnatac na lataxaguesat. Nache qainattac, qoỹeeta':
67–Ña qomi' 'aua'aqtaxanema, ¿'eesa da nache 'am Lca'aguishec Ñim Lo'onatac 'Enauacna?
Nache So Jesús 'enapeco':
–Da sheeta': Aja' Nachaỹem, qaq qami' saishet da Aỹem qaua'amaqchiñi. 68Qaq da huo'otaq qami' sena't, qalaq ỹoqta da saishet da Aỹem qaua'aqtaxañim. 69Qalaxaye Aỹem Shiỹaxaua Llalec, mashe yaqta'a da ñeso'oota'ague da aloic Ñim Lo'onatac 'Enauacna maye qaica ca ỹaqalanapec.
70Ime, nache 'enauac qaimalec da qainattac, qoỹeeta':
–¿Nache'am, peta'a 'am Llalec Ñim Lo'onatac 'Enauacna?
Nache So Jesús 'enapeco':
–Aja', Nachaỹem, nachera dam qoñiỹapec.
71Nache somayepi 'enapeco':
–¿Saishet da qaltaq seuenaq da huo'o ca lỹa da da'aqtaxan? Cha'aye qomi' maiche sa'axasoqchigui da la'aqtac damaye.
Currently Selected:
Lucas 22: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
