Oseas 7
7
1Qaq co'ollaq ñatareetac na Israel le'ecpi,
nache yo'oq da lle'etaxaloxo na Efraín,
qataq nam lasouaxashetpi nam Samaria le'ecpi,
cha'aye namayepi ỹo'ottac da natenataxanaxac,
nache na'aictaxa da yo'oxoñi qalaq inoxotaua'a na nỹecpi,
qataq decachiỹot nam quetague' na nqa'aicpi.
2Nache saishet da tagui lauel da Aỹem ñetoueeta'ac 'enauac nam qauem maye ỹo'otpi.
Qaq nagui qalaq coleesop nam maiche ỹo'ottacpi maye qauem,
nam nache 'eetai' naxa da semeteetac.
3Qaq nam qauem maye ỹo'ottac namayepi qalaq machiguiñi naqa'en ñi nta'a,
qataq nam latenataxanaxacpi machiguiñi naqa'en nam nataxala'pi.
4'Enauac namayepi da sa ỹalemaq, 'eeta'am ana qatelaxanaxaqui da mashe ỹaguec na le'eraxa,
nache sa iuen da queta da qaỹalootaigui,
da qaiuatta'a da nashiiyesheguem ca ndaqñiguishec 'ayiiña.
5Da ivita da qaique'elec so nta'a, nache nam nataxala'pi itaqchet somaye, nỹomaxangui na lataxa.
¡Qaq so nta'a ỹaconeguet na lhuaq som ỹe'enai'pi somaye!
6Qaq da lquiyaqteỹaxac somayepi da deque'elaqtaxan,
qalaq 'eeta'am aca nqatelaxanaxaqui da 'eroigui,
qataq na'aictaxa da palom da do'ocheta so nqatelaxanaxaqui lo'o,
qalaxaye ye nte'eta qalaq ñaq 'eetalec da 'ettaigui aso nqatelaxanaxaqui.
7Qaq 'enauac somayepi 'eeta'am aca nqatelaxanaxaqui maye 'ettaigui,
da ỹavigaxat som lataxala'pi.
Qataq 'enauac so lta'alpi da nmichiguiñi naqa'en,
nache qaica da huo'otaq 'oonolec ca aỹem iỹaxaatacot.
So nhuo' le'ecpi maye ca'ai Ñim Natamnaxala'
8So Efraín, ỹaleeguet nam ỹaqa'a nhuo' le'ecpi;
qaq nache 'eeta'am ana nauole maye 'oonolec laỹe na dato.
9Nache na chegaqauec shiỹaxauapi nquicta'a't naqa'en da la'añaxac namayepi,
qaq namayepi sa nanoma de'era.
Qataq ivira'a na laue da ỹapagaq qalaq sa nanoma damaye.
10Qaq de'era na'amqaanaxac na Israel le'ecpi,
damaye maiche dataỹa'aguet qome namayepi.
Qaq na'aictaxa de'era, namayepi saishet da ỹe'eguelaxa da nmitaique Ñim Nataxala' maye Natamnaxala'.
11Qaq ye Efraín, qalaq 'eeta'am na qoto' da 'enaqaic qataq qaica ca lauattonaxanaxac,
nache taỹa qome ye Egipto da iỹaxanaique ca ntaunaguec,
ime, qaltaq taỹa ye Asiria.
12Qalaxaye qom taỹa, nache sa ñaỹaloxon da sasaxalec ca ỹaleguec yemayepi,
qataq naañi ñaqa'en, 'eeta'am ana qoỹopi da chegaqasheguema na piguem,
nache sauo'o qome ca nhuaxanaguec souaxat na qauem maye ỹo'otacpi.
13¡Qaq ỹataqta qauem qome ca taỹa'a yemayepi souaxat da aỹem ca'ai!
Qataq taỹa'a da nlaguiñi qome, souaxat da aỹem dataỹa'aguet.
Aỹem, sauotaique da ñeca'alaxatec yemayepi,
qalaxaye yemayepi ỹo'ot na latenataxanaxacpi da Aỹem dataỹa'aguet.
14Qataq saishet da ỹataqta lquiyaqteỹaxac da aỹem nachoxoreetacot,
da huetalec ye lmala' da huo'o da nachoxoc.
Qaq da iỹaxanaique na trigo qataq na lataxa nache ique'emaqchet da lo'ocỹaxac;
¡qaq ỹataqta aỹem dataỹa'aguet namayepi!
15Qaq na'aictaxa da sapaxaguen co'ollaxa namayepi,
qataq sauo'o da la'añaxa'c naua lhua'q,
qalaxaye namayepi lapaxañi na qauem da yaqto' aỹem dataỹa'aguet.
16Namayepi ỹe'eguelaxa na saq 'en atamnaxala'pi,
nache 'eeta'am ca checnec da namaxagui.
Qaq nam lataxala'pi qairolec ca ỹeelonec da qaỹalauat,
souaxat da na'amaqte'n naua la'aqtaqa,
nache huaña ye Egipto da qane'eetapigui qome namayepi.
Currently Selected:
Oseas 7: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
