Habacuc 3
3
Da natamnaxac so Habacuc
1Qaq 'era da natamnaxac co'ollaxa so na'aqtaxanaxanec Habacuc.
2«'Am Nataxala', co'ollaq sa'axaỹa da 'ara'aqtac,
nache ỹataqta lta'araic da icolanaxa.
Ñaq 'auo'ot ne'enaua na'axa'te maye souaqtaiguilo,
nam lta'araicpi maye 'auo'ot co'ollaxa soua hua'au' vi'iye.
Qaq da nvi' da 'aralemataic, nache 'auennata'a qome da 'archoxonnataxanaxa.
3Ñim Lo'onatac 'Enauacna, chegoqta'a ye 'alhua Temán;
qaq Ñim Qui'itta qalaq chegoqta'a añi qasoxonaxa Parán.
Qaq da llo'oxoyec qalaq imattalec 'enauac na piguem,
qataq da ño'oxonnataguec nlaqaalec 'enauac ana 'alhua.
4Namaye nactaigui na qashelecteguiñi le'eraxa,
qataq chegoqtapoiguilo naua lhuaxaye na nqashelgaxa,
maye ỹachaxan dam la'añaxac maye saqcha'a.
5Qaq da taỹa'ague qalaq hua'auta'ague da nalolaxa maye dalaataxanapec,
qaq da chegaqa'ague qalaq no'onaña ana 'eeta'am ana poqo na le'eraxa.
6Qaq da vi'iiguet nache ỹataqta cholaxan ana 'alhua,
qaq da demeenaxan, nache ỹataqta ñi'i na ỹotta'a't shiỹaxauapi.
Qataq hua'axañi ana togoshaapec qasoxonaxapi,
qataq dacagueñi ana togoshaapec lcomaraxalatepi,
qalaxaye nam llecpi Ñim Lo'onatac 'Enauacna namayepi chochaq tatec.
7Qaq aỹem sauaachigui na shiỹaxauapi maye lma' ye Cusán,
da ỹataqta lta'araic da lachetataic,
qataq na lma' ye Madián ỹataqta iviloxolaqchet da lcolanaxa.
8'Am Nataxala' ¿peta'a 'aualemataỹa nam talapi?
Qalqo' ¿'aunotega peta'a anam auaxaipi?
¿Ỹoqo'oye qonelec nam 'arelo caaỹo,
qataq qoñiguingui anam 'aigona maye huegaxanaxai?
9Qataq mashe 'auqataxaatai' nam 'archecnec,
qataq lhuotta 'anqa'en anam 'archecnapi.
Qataq 'auo'ogoxona na talapi da 'auauategue nam ñecpi ana 'alhua.
10Qaq ana qasoxonaxapi, qalaq cholaxan da 'am ila'a,
qaq na piguem qalaq namaq na ỹataqta lta'araic auot,
qaq aso qaỹoqchiguingui auaxai qalaq ỹataqta dauaxan,
souaxat da ỹataqta qaỹoqotcheguemegue ana lapaxa.
11Qaq añi nala', qataq ñi ca'agoxoic qalaq vi'iigueta,
da ila'aguet na le'eraxa ana 'archecnapi, qataq na lqashelgaxa ana 'arataquiaxai.
12Qaq da huo'o da 'aralemataic, qalaq 'auqueuolec 'enauac ana 'alhua,
qataq da huo'o da 'arayeloxo, nache 'auapigui nam ỹotta'a't shiỹaxauapi. 13'Am 'auanac da 'autauan nam 'aralamaxat nhuo' le'ecpi,
qataq so nta'a maye maiche 'arca'aguishec.
Qataq 'aulaxachigui so lauo' lapo' som qauemaic,
qataq yo'oqchiguiña 'anqa'en, so coma' maye lo'oxonaxala' so lma'.
14Qataq 'aualauat so lataxala', 'aurolec aso maiche lchecna,
co'ollaq som nalleppi 'eeta'am na la'at lta'araic,
da ilagaxattac nam qaica ca iueelec, da yaqto' sa qananoma da ilaxachigui.
15Qataq qonetalec na 'arelo caipi da qoquetalec ana auaxai,
nam ỹataqta qalochiguiñi qataq qaỹoqchiguingui 'etaxat.
16Qaq co'ollaq sa'axaỹa 'enauac de'era nache ỹataqta she'e,
qataq ỹataqta iviloxo'l naua ỹa'aqtaqa,
qataq ỹataqta sa da'añiiguelo naua ichel,
qataq 'enauac da ỹo'ocỹaxac deqat da la'añaxac.
Qalaq nache 'ena'am aỹem she'emaqtac qome da seuata'aguet ca na'a'q,
da Ñim Nataxala' ỹo'otec ca lachetataic, nam qomi' ique'eteeta'ape.
17Qaq na'aictaxa qome da saishet da dasovi ana higos,
qataq da qaca aca ala ana uva, qataq da qaca aca ala ana olivo,
qataq da saq ñaxat nam qoỹaalec na nanaxanaqa'pi,
qataq da qui'itchigui ana laỹe' ana qaguetapi, qataq da qui'itchigui ana laỹe' anam huacapi,
18qalaq ñaqaiyeta aỹem sho'oxoreetac qome Ñim Nataxala',
qataq sho'oxoreetac Ñim Lo'onatac 'Enauacna maye ica'alaxaqui.
19Cha'aye Ñim Nataxala', aỹem ỹanem da ỹa'añaxac,
qataq sa ilaua'aguelo naqa'en naua ỹapia'ate 'eeta'am aca ñi'imshe,
qataq aỹem ỹaviguisheguema yem ỹataqta qaỹoqotcheguema.»
Currently Selected:
Habacuc 3: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
