Habacuc 1
1
1Qaq 'era da na'aqtaxanaxac maye Ñim Nataxala', ỹanem co'ollaxa som na'aqtaxanaxanec Habacuc.
Da nachoxoc so Habacuc
2'Am Nataxala', ¿chaq tachiguiña qome da iỹaxanaxac
da 'am seỹaxaatecot da aỹem 'autauan, ye ỹataqta aỹem saq 'aua'axaỹa?
¿Chaq tachiguiña qome da ñachoxonnaxac
souaxat da ỹataqta qaica ca qairen,
ye 'am saishet da 'auanac da qomi' 'anca'alaxatrec?
3¿Ta'ainco' da sauaachigui 'anqa'en da lta'araic nachetataic qataq na qauemsat?
Aỹem semeteetac da qaica ca qairen, qataq nam qailaxachiguipi,
qataq vichiguiñalo da cotaxac qataq da loquiaxac.
4Cha'aye sa qaipaguelec na nqataxacpi,
qataq da huo'o na qanmit, qalaq sa qaipaguelec da 'eesa lataxac,
nam qauemaicpi qalaq ỹataqta sa iren nam no'on da lataxac,
qataq qaỹashaxanec dam ỹataqta nalochiguiñi lataxac.
Da lasataxac Ñim Nataxala'
5«Ñaq qaumichiñi qome na ỹotta'a't shiỹaxauapi,
ñaq qaumichiñi nache huo'o qome da qara'aalaqai,
cha'aye huo'o qome ca so'ot ne'enaua na'axa'te maye qoviitaiguilo,
maye saishet da qaua'amaqchiñi da huo'o ca qami' da'aqtaxanema.
6Cha'aye nachaañi ñaqa'en qome na caldea le'ecpi,
nam nhuo' le'ecpi maye qaica ca iren qataq imata da queuoteguelec nam 'alhuapi,
da yaqto' deuotaxanec nam 'alhuapi da ỹauo'o lalamaxat.
7Qaq namayepi ỹataqta chaqaicpi qataq ñi'iỹaxatpi,
cha'aye saishet da ỹo'ot cam lỹa nqataxac,
nacherata da quetalec na maiche lalamaxat nqataxacpi.
8Qaq ana naloxo na lalo caipi qalaq napacalec ana naloxo ca quiyoc,
qataq napacalec da lchec na qa'alaqpi maye huetauga na toolec 'alhua,
qataq nam nalleppi maye netalec na caipi ỹataqta nquictauec,
nache da ñaq qaỹoqta qalaq ỹataqta ỹachegoxotañi na lalo caipi da nalat,
'eeta'am ca qoỹo lo'o' da decanaxan da yaqto' huo'o ca loxonec.
9Cha'aye 'enauac namayepi anac da ỹataqta qaica ca iren,
qaq da taỹa'ague namayepi qalaq ỹataqta qañi'iỹa,
nache namayepi ỹataqta qalota na loxonecpi, 'eeta'am na lsoche ca delec maye huaña na loigue aso auaxai.
10Nache ỹataqta ỹa'ashaxanai' na nta'alpi qataq na 'amaqtaqaicpi,
qataq ỹe'enai' na npaqtaxanaxatpi nache ỹo'ot na lliguisheguempi,
da yaqto' huenoxotaua'a da deuotaxanec.
11Qaq huaña nache 'eeta'am ca la'at lta'araic nache huo'o qome da lasouaxashet,
souaxat da 'eetega natamnaxala' da maiche lalamaxat la'añaxac».
Da lỹa nachoxoc so Habacuc
12'Am Nataxala', ¿saisheto' da nache qonetai' da 'anca'altauec,
'Am Ñatamnaxala' maye Qui'itta qataq sa 'ameuo?
'Am Nataxala' maye 'am ipaqtaxanaxat 'am 'aỹa'anem co'ollaxa
da la'añaxac nam caldea le'ecpi,
da yaqto' namayepi ỹacoolec da ỹo'ot da 'arhuaxanaxanaxac.
13'Am, ỹataqta qui'itta da 'armeenaxanaxac,
nache saishet da 'ameteetac nam qauem,
huo'otaq da 'ameteetac da ñe'etaxaloxo,
¿ta'ainco' da choche 'ameteetac nam laataxanaxaicpi,
qataq da choche 'añe'emaxat da nam qauemaicpi
ilaxachigui nam no'on da lataxac?
14Qataq ¿ta'ainco' da 'eco' nỹaq auaxai le'ecpi 'anqa'en na shiỹaxauapi,
qataq 'eeta'am nam shiguiỹacpi maye qaica ca ilo'ogue?
15Nache na caldea le'ecpi loxonec na ỹotta'a't shiỹaxauapi,
'eeta'am cam ỹa'acoxoic da loxonec ca nỹaqpi
da ỹauota'a aca lqoina qataq ca laleguec,
qaq da ilalec da lapoota'a't, nache ỹataqta nlaqchigui da ntonaxac.
16Qaq ỹoqo'oye namayepi ỹataqta ỹo'oxoren na laleguecpi qataq ana lqoinapi,
nache ỹanot nam lachetaqtaxanaxat qataq ỹavigaxat na nchenaxanaxat da ỹo'oxoren namayepi,
cha'aye nache chegoqchigui namayepi da sa qoue da lquia'axac namayepi.
17Qaq ¿peta'a nache queto'ot na caldea le'ecpi
da qomi' irotegueleguete nam laleguecpi?
qaq ¿nache queto'ot peta'a da sa ichoxonnai' da ỹalauattac nam shiỹaxauapi?
Currently Selected:
Habacuc 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
