Génesis 42

Soua lqaỹa't so José taỹa ye Egipto

1Qaq so Jacob co'ollaq la'axaỹaxac da ye Egipto huo'o na trigo, nache 'enapegalo' soua llalqa, 'eeta':

«¿Negue't cam qauo'ocheetac da choche qanloita'a't? 2Ye aỹem qaỹa'aqtaxaatapeguem da ye Egipto huo'o na trigo. Ña qanqo'oñiỹactaxa yemaye, nache qausheenaxañiỹa ca qonoq trigo, yaqto' nache 'eetai' da ñeca'alaqtauec.»

3Qaq huaña nache je'c soua diez maye lqaỹa't so José, nqo'oora ye Egipto da desheenaxaraique na trigo. 4Qaq so Jacob qalaq sa ỹashen co'ollaxa da jec so Benjamín, som lqaỹa so José, cha'aye tachiguio' lauel da huo'otaq huo'o ca huaigui sa ỹaỹamaxañi somaye. 5Nache soua llalqa so Israel, huo'o so nnaictague' laỹepi maye nataqa'en jec da nmen, cha'aye 'enauac ye 'alhua Canaán huo'o so nqouaxa.

6Qaq so José nacheso som ilotague' co'ollaxa yi'iye 'alhua, qataq nacheso so imeetacot na trigo 'enauac na shiỹaxauapi maye chegaqa'alo naua lỹa't nma'ate. Qaq soua lqaỹa't co'ollaq nvildeua'a somaye, nache ỹa'alyiñi naua l-llecte, qataq iviraxata'agueta naua lata'pi na 'alhua. 7Qaq so José co'ollaq choche ila'alo soua lqaỹa't nache ỹauatto'n, qalaxaye ỹauota'a da 'eco' sa ỹauatto'n, nache sa ichera'ape co'ollaq inatta'ape, 'eeta':

«¡Qami'! ¿Hua'ague ca qauachegoqỹa'ague?»

Nache soomaye 'ena'apo':

«Qomi' sachegoxosoqta'a ye 'alhua Canaán, qaq ñanaguenaq da sesheenaxanaxa na trigo.»

8Qaq na'aictaxa da so José ỹauatto'n soua lqaỹa't, qalaxaye soomaye saishet da ỹauatto'n somaye. 9Qaq huaña nache so José, tachigui lauel so lchoxonaxacpi co'ollaq dechoxootegalo soomaye, nache 'enapegalo 'eeta':

«Qami' choche qami' nmeenaxanaxanaqa. Yo'oqta da choche qanmeenaxañiỹa ne'ena 'alhua da chaq hua'ague cam saishet da qanpaxattalec.»

10Qalaxaye soomaye 'ena'apo':

«¡'A'i, 'am qarataxala'! Qomi' maye qomi' 'aramaxa'she, ñanaguenaq da sesheenaxanaxa na trigo. 11Qaq 'enauaque qomi' da 'oonolec ñi qarta'a, qataq qomi' no'on da qarataxac. Qaq sa ỹauano' da choche qomi' nmeenaxanaxanaqa.»

12Nache so José 'enapeco':

«'A'i, saishet da qami' 'eesora. Qami' yo'oqta da choche qanmeenaxañiỹa ne'ena 'alhua da chaq hua'ague cam saishet da qanpaxattalec.»

13Qalaxaye soomaye 'ena'apo':

«Qomi' maye qomi' 'aramaxa'she, qomi' doce nqaỹa't, 'oonolec ñi qarta'a, qaq sonaqtaña ye 'alhua Canaán. Qaq ca qarqaỹa na'asa no'ona'aguet ca qarta'a. Qaq cam lỹa qalaq mashe saishet da qomi' hueta'agueta.»

14Qalaxaye so José qaltaq 'enapegalo soomaye, 'eeta':

«¡Qaq 'eesa qone' dam shenapec! Da qami', choche qami' nmeenaxanaxanaqa, 15Qaq nagui qami' she'eguena'q: aỹem san da ỹa'aqtac chegoqchigui ñi faraón da qami' shenapegalo, da saishet da qoquiỹa'ai ne'ena nato' qom nvi' cam qarqaỹai na'asa. 16Qaq jec qome ca 'oonolec da qoñiita da ỹe'eguena'a camaye. Qaq naua lỹa't qalaq no'oirañi da qaicoñe't, yaqto' ishet da saỹaanaq da ỹoqta 'eesa dam qara'aqtaqui. Qaq qom saishet da 'en, nache ỹoqta 'eesa da choche qami' nmeenaxanaxanaqa. ¡Qaq de'era ỹa'aqtac chegoqchigui ñi faraón!»

17Nache so José icoñe't 'enauaque soomaye, ivittrec soua tres na'axa'te. 18Qaq so na'a'q tres, nache 'enapegalo' soomaye, 'eeta':

«Aỹem huo'o da icolanaxa Ñim Lo'onatac 'Enauacna. Qaq ỹoqo'oye no'on da qauo'oche da ỹa'aqtac yaqto' qarca'alleeuec: 19da ỹoqta 'eesa da no'on da qarataxaqui, nache qano'onaxachiỹaigui añi ncoñetaxanaxaqui ca 'oonolec qarqaỹai. Qaq naua lỹa't qalaq je'c qome da ira'a na trigo ca llalaqpi, yaqto' deque'e. 20Qaq ime qome, nache qanaviqui ca qarqaỹai na'asa, yaqto' saỹaanaq da ỹoqta 'eesa da qara'aqtaqui. Qaq qom saq 'en, nache qami' qaullivi.»

Qaq soomaye ỹasa't, 21qalaxaye detaqtega't co'ollaxa soomaye, nache 'eetra':

«Ỹoqta 'eesa da ỹataqta sa ỹaỹamaxañi da so'otaxac so qarqaỹa, cha'aye somaye co'ollaq qomi' nachoxoreetapoiguilo da sechoxorenaq, qalaq qomi' saishet da sechoxorenaq, na'aictaxa da seloqtagui da huo'o da lhuogoxo. Qaq ỹoqo'oye nagui qaltaq qomi' taleguete de'era nhuogoxo.»

22Nache so Rubén 'enapeco':

«Aỹem qami' sheetegalo mque' caillaye da saishet da huo'o ca qoñiỹa'ac so nsoqolec, qalaxaye qami' saishet da aỹem qaualaqaiguet. Qaq nagui iuen da qomi' sesheetenaq da l-leuaxa somaye.»

23Qaq soomaye saỹaỹate'n co'ollaxa da so José ỹaỹate'n naua la'aqtaqa, cha'aye so José ỹauota'a so ltaxaỹaxanaxanec co'ollaq detaqtegueto soomaye. 24Nache so José ca'aisalo co'ollaxa soomaye, nache nỹeetac. Qaq co'ollaq ñe'eguelaxa so huetra'a soomaye, nache iỹotauga so Simeón, nache ỹauaachigui naqa'en soomaye co'ollaq damaxasoxoolec da qaicoñe'. 25Qaq ime co'ollaxa, nache damaxasoxoolec da qaiỹoxoguilo na trigo soua lachoxonaxaqui', qataq da qaỹe'eguelaxatot ñi 'oonolec aso maiche alom, qaỹachanguilo soua lachoxonaxaqui', qataq damaxasoxoolec da qoỹanema soomaye ca aloq da huangui na nqa'aic. Qaq 'era da qoỹeetec. 26Qaq huaña, nache soomaye ỹachaleguete soua lalo 'ashena so trigo, nache je'c da ỹe'eguela'q.

27Qaq co'ollaq ivitra so 'alhua maye huaña da nmatre'c se'eso pe, nache so 'oonolec soomaye ỹauaangui so lachoxonaxaqui da yaqto' iquia'axan so lalo 'ashena, nache ilalec aso maiche alom da huetangui na alap so lachoxonaxaqui. 28Qaq huaña nache da'aqtaxanema soua lqaỹa't, 'eeta':

«¡Ña qauloỹa ana aỹom aỹem qaỹe'eguelaxatot! ¡'Ana, huetangui na alap na ỹachoxonaxaqui!»

Nache 'enauaque soomaye ỹataqta ñi'i', iviloxolaqchet da lcolanaxa, nache detaqtega'to', 'eetra':

«¿Negue'to' da, dam qomi' ỹo'oteque Ñim Lo'onatac 'Enauacna?»

29Qaq co'ollaq ivitra ye 'alhua Canaán, nache da'aqtaxaarem so lta'a Jacob 'enauac dam hueraiguilo soomaye, 'eetra':

30«Ñim ỹale maye ilotague' yi'iye 'alhua, ỹataqta qomi' sa ichera'ape cail qomi' detaxaỹoto, qataq 'eetega ñeqo'onaxa ye na'alhua da choche qomi' nmeenaxanaxanaqa. 31Qalaxaye qomi' sa'aqtaxanaqteguem ñimaye da qomi' no'on da qarataxac, qataq saỹauano' da qomi' nmeenaxanaxanaqa. 32Qataq sa'aqtaxanaqtapeguem da qomi' doce nqaỹa't, maye 'oonolec ñi qarta'a, qataq 'oonolec so mashe saishet da qomi' ỹalectaiguilo, qaq ñim na'asa qalaq 'am no'ona'aguet ne'ena Canaán. 33Nache ñimaye qomi' 'enapegalo, 'eeta': Hua', da yaqto' saỹaten da qami' 'eesora da no'on da qarataxaqui, nache no'on da qano'onaxachiỹañi ca 'oonolec qarqaỹai. Qaq qami' qalaq qoqui qome, qauache na trigo da yaqto' deque'e ca qaỹa'alquipi. 34Qalaxaye qom qañe'eguelaqai, nache aỹem qanaviquiỹa ca qarqaỹai na'asa. Yaqto' saỹaten da 'eesa da no'on da qarataxaqui, qaq saishet da choche qami' nmeenaxanaxanaqa. Qaq huaña qome, nache aỹem saxanec ñi lỹa qarqaỹai, nache qami' huesochiyiñi qome da qauconñeeteguelec ne'ena 'alhua.»

35Qaq soomaye co'ollaq mashe iqui'itaxattapiguilo soua lachoxonaxaqui', nache ilaleguete soua laỹe'tole aso maiche alom, huetagui ñi 'oonolec soua lachoxonaxaqui', nache soomaye qataq so lta'a' ỹataqta huo'o da lcolanaqa'. 36Qaq huaña, nache so Jacob 'enapegalo soua llalqa, 'eeta':

«Qami' mashe huotaique da qaica qanqa'eñi ca ỹalec. So José mashe saishet da qomi' ỹalectaiguilo, qataq ca Simeón. ¡Qaq nagui qataq huotaique da qauotaxañic ñi Benjamín! ¡Qaq de'era qauem 'enauac da aỹem tateguelec!»

37Nache so Rubén 'enapego' so lta'a, 'eeta':

«No'on da 'auasheeta ñi Benjamín, qaq aỹem maiche selo'ogue qome. Qaq da huo'otaq saishet da 'am ñe'eguelaxata, nache 'am ishet qome da 'aualaua't ñeua dos ỹalqa.»

38Qalaxaye so Jacob 'enapeco':

«Ñi ỹalec saishet da qami' ca'ateguelo. Cha'aye so lqaỹa José mashe ileu, qaq chaqñeta ñimaye da no'onañi. Qaq ñimaye da huo'o ca huaigui qauem da qoyecỹaxaqui, nache qami' qarasouaxashechi qome da ne'ena ỹa'axaiquiolec ilem da laquicoxo.»

Currently Selected:

Génesis 42: LÑLE13

Highlight

Copy