Génesis 40

So José ỹa'axategue da naigui soua dos nchoxonaxaco

1Qaq co'ollaq mashe qaỹoqtegue de'era, nache soua lamaxa'she so nta'a, som ỹomaxaqui lo'o, qataq som nauole lo'o, soomaye npa'agueneto co'ollaxa so na'aco't som nta'a ye Egipto. 2Qaq somaye nache dalemataỹalo co'ollaxa soua dos ltau'. Qaq soomaye nachesoua som lataxala'ate so ỹomaxaqui lo'opi, qataq som nauole lo'opi, 3nache icoñe't soomaye, ỹamaxalo so lma' som ilotague' so nhuataxauapi so nta'a, maye naña aso ncoñetaxanaxaqui. Qaq asomaye nachaso aso netaigui so José da qaicoñettai'. 4Nache se'eso lataxala' so nhuataxauapi so nta'a, ipataxalec co'ollaxa so José da ilo'oguelo se'esoua dos ltau' so nta'a, nache soomaye ỹataqta qaỹoqteguelo soua na'axa'te da netraigui aso ncoñetaxanaxaqui.

5Qaq huo'o so pe, nache se'esoua dos ncoñetegui'she, som ỹomaxaqui lo'o qataq so nauole lo'o, soomaye huo'o so lchoxonaxa'c, qaq ñi 'oonolec se'esoua nchoxonaxaco, huo'o da naigui. 6Qaq som nte'etom co'ollaq so José demeenaxaneua'alo soomaye, nache ilaleguete da ỹataqta huo'o da laquicoqo'. 7Nache inatta'ape, 'eeta':

«¿Ta'ainco' nagui da daquicota dam qarashecquiaxaqui?»

8Nache soomaye 'ena'apo':

«Qomye huo'o so qarchoxonaxac, qalaxaye qaica ca qomi' da'aqtaxanema ca naigui.»

Nache so José 'enapeco':

«¿Peta'a sa nacheño' Ñim Lo'onatac 'Enauacna ñim ishet da ỹa'axat ca naigui ca nchoxonaxac? Ñaq aỹem qaua'aqtaxañim nagui, cam qauchoxoñiitega.»

9Qaq huaña nache so lataxala' so ỹomaxaqui lo'opi, da'aqtaxanem so José so lchoxonaxac, 'eeta':

«Aỹem sechoxootega da satato'ot aso uva lcheyec, 10qaq asomaye tres soua lcoue. Qaq asa'aso uva lcheyec ñaxatec ana laue, nache huo'o aso lauoxo. Qaq aso lauoxo nañigui aso mashe ỹe uva ala. 11Qaq aỹem lloxoche ñasoqta'a aso nỹomaxaqui ñi faraón. Nache sacona asa'aso uva ala, nache ñelom da selomaxaangui aso ỹomaxaqui. Qaq ime, nache sanem aso ỹomaxaqui ñi faraón.»

12Nache so José 'enapeco':

«Se'eso 'archoxonaxac, 'eeta' da naigui: soua tres lcoue aso uva lcheyec, soomaye naiguilo caua tres na'axa'te. 13Qaq qom inoxoorec caua tres na'axa'te nache ñi faraón qaltaq nmit qome so 'arasouaxashet. Qaq ime qome, nache qaltaq 'am ỹe'eguelaxatem da 'aro'onataxanaxac co'ollaxa. Qaq huaña nache qaltaq 'aupacta da 'aỹa'aatapeguem aca nỹomaxaqui ñi faraón, 'eeta'am so hua'autec 'aro'onataxanaxac. 14Qaq qom ipacchigui de'era, qaq no'on da aỹem 'auennata'a qome, nache aỹem 'anqouaguec qome da qonapega ñi faraón, da ñaq aỹem nqateeguesop ne'ena soota'a. ¡Ñaq aỹem 'anqouaguec qome! 15Cha'aye aỹem choche aỹem qaicachiỹa co'ollaxa, aỹem qaỹachegoxotchiguiña ye na'alhua na hebreopi, qaq ne'ena soota'a qaica ca so'ot saỹaỹamaxañi da yaqto' aỹem qoỹaataigui ana ncoñetaxanaxaqui.»

16Qaq so lataxala' so nauole lo'opi co'ollaq ila'a da so José ỹaỹamaqchiguiñi so la'aqtaxanaxac da ỹa'axat da naigui so nchoxonaxac, nache somaye 'enapeco':

«Aỹem nataqa'en huo'o so ichoxonaxac, sechoxootegalo soua tres npaqtal maye laỹe' ana nauole, netaleguete na iqaic. 17Qaq aso pa'atcheguem npaqta maye laỹe' aso nauole, asomaye nlaqchigui aso ỹotta'a't pastelpi maye qaỹauotaique lqo ñi faraón, qalaxaye anac so maỹopi nache lloxoche chec aso huetagui aso npaqta maye nauole laỹe', maye netalec na iqaic.»

18Qaq huaña nache so José 'enapeco':

«Som 'archoxonaxac, 'eeta' da naigui: soua tres npaqtal maye laỹe' ana nauole, soomaye naiguilo caua tres na'axa'te, 19qaq qom inoxoorec caua tres na'axa'te, nache ñi faraón qaltaq nmit qome so 'arasouaxashet, qaq qom ime, nache 'am damaxasoxoolec da 'am qaicoñerasheguemec aca qo'oipaq, nache anac qome na maỹopi da chec na 'arapat.»

20Qaq co'ollaq mashe ivita so na'a'q tres, maye laloxoqui som lañoxoc so faraón, nache ỹo'ot so lta'araic lquia'axac da dequi'iỹa'ai' 'enauac so ltauapi. Qaq so faraón co'ollaq ña datataigui so lquia'axauapi, nache damaxasoxoolec da qanqateeguesopa aso ncoñetaxanaxaqui so lataxala' so ỹomaxaqui lo'opi, qataq so lataxala' so nauole lo'opi. 21Qaq som lataxala' som ỹomaxaqui lo'opi qalaq ỹe'eguelaxatem da lo'onataxanaxac co'ollaxa, nache somaye qaltaq ipactegue da ỹaatapeguem aso nỹomaxaqui so faraón, 'eeta'am so hua'autec lo'onataxanaxac. 22Qaq so lataxala' so nauole lo'opi, qalaq damaxasoxoolec da qaicoñerasheguem, qaq nache ipacchigui da la'aqtaxanaxac co'ollaxa so José. 23Qalaxaye so lataxala' so ỹomaxaqui lo'opi, saishet da tagui lauel so José.

Currently Selected:

Génesis 40: LÑLE13

Highlight

Copy