Génesis 26

So Isaac taỹa ye Gerar

1Qaq se'eso na'a'q, huo'o so lta'araic nqouaxa, 'enauac se'eso 'alhua, qaq 'eeta'am so nqouaxa som na'a'q co'ollaq ñaq nca'altauec so Abraham. Ỹoqo'oye so Isaac, taỹa ye Gerar, yem netaña so Abimelec, maye nta'a ye Filistea. 2Qaq huaña yemaye, nache Ñim Nataxala' nachaxana somaye, nache 'enapega, 'eeta':

«Saishet qome da 'aỹa ye Egipto. Nacherata da qonaña qome cam 'alhua maye 'am samaxalec da qonaña, 3qaq nagui, qalaq no'on da nache qonetaña ne'ena 'alhua. Aỹem 'am soota'aguet qome, qataq 'am sanem da ichoxonnataxanaxa, cha'aye 'am, qataq ca 'am chegoxoguetpi, sanem qome 'enauac ne'ena 'alhua. Qaq yaqto' sepacchigui dam sachaxanapeguem co'ollaxa so 'arta'a Abraham. 4Qaq so'ot qome da ỹataqta qalota, ca 'am chegoxoguetpi, 'eeta'am ana huaqaañipi maye neto'ot na piguem, qataq sanem qome camayepi, 'enauac ne'ena 'alhua. Qaq nataqa'en nam ỹotta'a't shiỹaxauapi maye netalec ana 'alhua, huo'o qome da nchoxonnataguec, chegoqchigui cam 'am chegoxoguetpi, 5cha'aye so Abraham ỹataqta aỹem ỹalaxaguet co'ollaxa, qataq ipacchigui na ỹa'aqtacpi, ỹamaxasoxonaxacpi, na iqataxacpi, qataq na ỹapaxaguenataxanaxacpi.»

6Qaq huaña nache so Isaac, naña co'ollaxa ye Gerar, 7Qaq som netaña yi'iye 'alhua, co'ollaq inat somaye da denataxaateguec aso Rebeca, nache so Isaac, huo'o da lcolanaxa da ỹa'axat da lhua asomaye, nache da'aqtaxanem somayepi, da 'eetega lqaỹa asomaye. Qaq aso Rebeca ye ỹataqta 'onaxai, qaq nachera da huo'omshe so Isaac, lhuennataxac co'ollaxa da som ỹalleppi maye lma' yi'iye 'alhua, ishet da ỹalauat souaxat asomaye.

8Qaq so mashe qaỹoqteguelo soua na'axa'te da netaña se'eso 'alhua. Qaq huo'o so na'a'q, nache so Abimelec, ỹalletaviigui som nalloxoqui, nache ilota'a so Isaac, da nqapaltague' aso lhua Rebeca. 9Qaq huaña nache damaxasoxoneuga so Isaac, nache 'enapego', 'eeta':

«¿Qache 'arhua peta'a aramaye?, qaq ¿ta'ainco' ye qonetega 'arqaỹa?»

Nache so Isaac 'enapeco':

«Qomye aỹem tachigui iuel da aỹem qaỹalauat souaxat aramaye.»

10Qalaxaye so Abimelec, 'enapeco':

«¿Ta'ainco' ye qomi' 'auo'oteque de'era? Cha'aye da shenaqta saxanaqca qapio'olec, qaq huo'o ca lauañi' aram 'arhua, qaq 'am choche 'auauota'a ctaxa ca qarasouaxashet.»

11Qaq huaña, nache so Abimelec 'enapega 'enauac so lauo' le'ecpi, 'eeta':

«Da huo'otaq huo'o ca sa ỹalemaxat de'era ỹale, huo'otaq ara lhua, nache camaye qaỹalauat qome.»

12Qaq so Isaac, ỹauo'o co'ollaxa so lañiguishec huaña yemaye se'eso vi'i, qaq ỹataqta 'onaxaic, qataq qalota na ala so lañiguishec, cha'aye Ñim Nataxala', ỹaalec da lchoxonnataxanaxa somaye. 13Qaq somaye ivira'a da ỹataqta sallaxanec, qataq ỹataqta qalota so lalamaxatpi. 14Ỹataqta qalota aso lalo qaguetapi, qataq huacapi, qataq so lamaxashecpi, qaq ỹoqo'oye so filisteopi, huo'o da lquiỹaxa co'ollaxa somaye. 15Qaq co'ollaq ña nca'altauec so lta'a Abraham, nache so lamaxashecpi so Abraham, nshe' co'ollaxa aso ñi'illoxoquipi, qalaxaye so filisteopi ỹapogongui asomayepi na 'alhua. 16Qaq huaña, nache so Abimelec 'enapego' so Isaac, 'eeta':

«Qoca'aisalo qome qomi', cha'aye mashe 'avita da 'am sallaxanec, qomi' 'anapacaleguete.»

17Nache so Isaac jec, nache nqo'ona ye ca'amegue maye huaigui ye Gerar, nache naña yemaye. 18Qaq huaña, nache qaltaq ỹauaangui aso ñi'illoxoquipi, maye nshere co'ollaq ñaq nca'altauec so lta'a, asom ỹapogongui som filisteopi, co'ollaq mashe ileu so lta'a somaye. Qataq nache ipagaqchiichigui som le'enaxat maye ỹanagui co'ollaxa so Abraham. 19Qaq huo'o so na'a'q, nache so lamaxashecpi so Isaac, nshettac aso ñi'illoxoqui se'eso ca'amegue, nache nsheralec so la'auaxac so 'etaxat. 20Qalaxaye so qagueta lo'opi, maye hueta'a so ca'amegue ye Gerar, delogui' co'ollaxa som qagueta lo'opi, maye ilotague' aso qaguetapi maye lalopi so Isaac, cha'aye somayepi 'eetega da maiche lalamaxat se'eso 'etaxat. Qaq ỹoqo'oye so Isaac ỹanagui asa'aso ñi'illoxoqui da le'enaxat «Loquiaqa'», cha'aye huaña da qailoctapigui asomaye. 21Qaq ime, nache so lamaxashecpi qaltaq nshe' aso lỹa ñi'illoxoqui. Qalaxaye qaltaq qailoctapigui asomaye, nache asa'aso nshere, so Isaac ỹanagui da le'enaxat «Pa'aguenaqa'.»

22Nache so Isaac, ca'ai yi'iye da taỹa so qaỹoqta 'alhua, qaq huaña, nache qaltaq nshe' aso lỹa ñi'illoxoqui. Qaq cha'aye saishet da qailoquigui asomaye, nache so Isaac, ỹanagui da le'enaxat, «Huesochiguiñi», cha'aye somaye, 'enapec: Nagui Ñim Nataxala', qomi' ỹanema da qomi' huesochiyiñi, da yaqto' ñequigaqtasheguem da souaqta'a ne'ena 'alhua.

23Qaq so Isaac, nache chegoqchiguiña yemaye co'ollaq nqo'ona ye Berseba. 24Qaq nacheso, se'eso pe da Ñim Nataxala', nachaxana somaye, nache 'enapega, 'eeta':

«Aỹem, nachaỹem Natamnaxala' so 'arta'a Abraham.

Saishet qome da 'añi'i, aỹem 'am soota'aguet.

Qaq souaxat so ỹamaxashec Abraham,

nache 'am saalec qome da ichoxonnataxanaxa,

qataq qalota ñaqa'en ca 'am chegoxoguetpi.»

25Qaq huaña, nache so Isaac, ỹo'ot aso lca'atoxonaxalate, nache iỹaxana da le'enaxat Ñim Nataxala'. Qaq somaye nache nalec se'eso 'alhua, nache som lamaxashecpi, nshe' aso ñi'illoxoqui.

So Isaac naỹamaxate' so Abimelec

26Qaq huo'o so na'a'q nache so Abimelec chegoqchiguiña ye Gerar da nqo'ona so Isaac da detaxaỹapegue'. Qaq nnaictague' so nauochaxaua le'enaxat Ajuzat qataq Ficol som lataxala' so nalleppi somaye. 27Nache so Isaac 'enapegalo soomaye, 'eeta':

«¿Ta'ainco' da aỹem qauanaita'a? Ye qami' mashe aỹem sa qauauoi, qataq ivira'a da aỹem qauo'oyiỹauec da sheca'ai ye qana'alhuai.»

28Nache soomaye 'ena'apo':

«Qomi' selaqa'a da Ñim Nataxala' 'am hueta'aguet, nache qomi' tachigui qarhuel da 'am ñeca'ataxa da 'am ñaỹamaxataxai'. Qaq que'eca qanaỹamaxataxac qome, 'eeta': 29'Am qome, saishet da qomi' 'auo'oteque ca saỹaỹamaxañi, cha'aye qomi' saishet co'ollaxa da 'am sa salemaxataq. Maye nacherata da 'am saỹamaxataqta, qataq co'ollaq 'am ñiquinaqtague' qalaq 'auachetec da 'al-lagaxayec, qaq nagui Ñim Nataxala' 'am ỹanem da lchoxonnataxanaxa.»

30Qaq huaña nache so Isaac ỹo'ot so lta'araic lquia'axac, nache soomaye deque'eta'ape qataq nỹomta'ape. 31Qaq so nte'etom so lỹa na'a'q nache ñiyishegue'm, nache ñi 'oonolec soomaye ỹanot da la'aqtac so lỹa. Qaq ime, nache so Isaac nquineto, nache soomaye je'c, qalaxaye ỹachetrec da l-lagaxaye'c.

32Qaq nacheso se'eso na'a'q, da so lamaxashecpi so Isaac ndoua'a somaye da la'axaỹaxac, da somayepi mashe iviyiña so 'etaxat aso nshere maye nshettac. 33Nache so Isaac ỹanagui da le'enaxat «Sebá» asa'aso nshere. Qaq ỹoqo'oye nachera da huo'omshe qoỹanagui da Berseba yi'iye huaqta'a't nỹecpi, choche ivitta'a nagui.

34Qaq so Esaú co'ollaq ivi' soua cuarenta vi'iye da nachaalataxac, nache huaroneguet aso Judit asom llale so Beri maye hitiita. Qataq nataqa'en huaroneguet aso Basemat asom llale so Elón maye nataqa'en hitiita. 35Qaq se'esoua dos 'alo, soomaye ỹataqta ỹo'ot da nqui'ic so Isaac qataq aso Rebeca.

Currently Selected:

Génesis 26: LÑLE13

Highlight

Copy