Gálatas 2
2
So Pablo qataq soua lỹa't namaxa'she
1-2Qaq co'ollaq mashe inoxoore'c soua catorce vi'iye, nache Ñim Lo'onatac 'Enauacna ỹauo'o da ỹauanaqchec, da aỹem iuen da saigue da Jerusalén. Se'eso na'a'q aỹem ñenaicapegueto soua Bernabé qataq Tito. Qaq co'ollaq huaña ye Jerusalén, nache sataxaguet so 'amqaanataxanaxaicpi, nache sa'aqtaxanaqteguem de'era na'aqtaxanaxac maye sa'aqtaxanaqteguem nam saishet da judiopi. Qaq co'ollaq ime de'era, nache ñeroqteetec so lataxala'pi na 'amqaanataxanaxaicpi da sataiguet, cha'aye sa saỹamaxaren da qaica ca naigui nam mashe semat ỹo'onatacpi qataq nam ñaq so'ottac nagui. 3Qaq somayepi saishet da huo'o ca ỹamaqtalec da ỹauo'o ca na'anaxat na lo'oc,#2.3 Na'anaxat na lo'oc (circuncisión): Qaimeten ye Romanos 2.25. ivira'a so Tito maye saishet da judío le'ec. 4Qaq so'otaq se'eso qartaxaỹaxac, cha'aye huo'o na nqañoxottañi da ỹalectaigui na 'amqaanataxanaxaicpi da choche qomi' nauaata'ape. Qaq ne'ena tenataxanaxaicpi maye 'eetega da quetague' So Qarataxala', namayepi nachaqrata da huotaique da deuotaxanec da huesochiguiñi qarataxac maye chegoqo'ot So Cristo, nache qomi' ỹamaqaleguete da so'otaq nam namaxasoxonaxacpi maye lalamaxat nam judiopi. 5Qalaxaye qomi' saishet da huo'o ca huaña da qolaxague namayepi. Cha'aye sauoqtaique da qami' qoquiitegue qataq qaualaqaiguet da ỹataqta 'eesa na'aqtaxanaxac maye chegaqaigui da no'on na'axaỹaxac. 6Qaq se'esoua maye na 'amqaanataxanaxaicpi ỹataqta ỹauattoote' da nataxala'ate, soomaye saishet da huo'o ca dalaxaic da iqotteereuo de'era na'aqtaxanaxac maye sa'axattac. Qataq saq shectega da ỹoqta 'eesa da nataxala'pi huo'otaq saishet, cha'aye Ñim Lo'onatac 'Enauacna saishet da ilotagui ca yo'oqchigui lataxac ca shiỹaxaua. 7Nachaqrata da soomaye ỹaỹateete' da so Pedro qaipataxalec da ỹa'axatem da no'on na'axaỹaxac na judiopi qaq aỹem, qalaq aỹem qaipataxalec da sa'axatem nam saishet da judiopi. 8Qaq nacheñi Ñim Lo'onatac 'Enauacna Ñim lamaxashec so Pedro da da'aqtaxanem na judiopi, qaq aỹem qalaxaye aỹem ỹamaxa na saishet da judiopi.
9Qaq ỹoqo'oye so Santiago, Pedro, qataq so Juan maye nataxala'ate qataq 'amaqtaqaiqa, soomaye ỹauattoote' da nacheñi Ñim Lo'onatac 'Enauacna Ñim aỹem tatelec naqa'en de'era no'onataxanaxac. Qaq ỹoqo'oye ñaỹamaxannaqchigui da so Bernabé qataq aỹem sa'aqtaxanaxam da no'on na'axaỹaxac nam saishet da judiopi, qaq soomaye da'aqtaxanem nam maiche lalamaxat lauo' le'ecpi. Ime, nache ñequinaxato, qaq de'era qanquinaxac naigui da soomaye ỹataqta ỹaỹamaxareete' de'era. 10Qaq nachaqrata da qomi' iỹaxanoto da seuennataqa'a da setauanaq na choxoraqpi maye 'amqaanataxanaxaicpi ye Jerusalén. Qaq damaye nachera ñepogoxoinaqtapegue' da so'otaq.
So Pablo dataỹa'aguet so Pedro co'ollaq huaña ye nỹecpi ye Antioquía
11So Pedro co'ollaq nvita ye nỹecpi ye Antioquía, huaña, nache ỹataqta sataỹa'aguet, nache sheetega cha'aye sa ỹaỹamaxañi da ỹo'ottac. 12Cha'aye co'ollaq saxanaxa da nvi' so judiopi maye lamaxashecpi so Santiago, nache so Pedro dequi'iỹa'ai' naxa na 'amqaanataxanaxaicpi maye saishet da judiopi, qalaxaye co'ollaq nvi' na judiopi, nache somaye ỹaxaañi da dequi'iỹa'ai' namayepi, cha'aye huo'o da lcolanaxa. 13Huaña, nache na laỹepi judiopi, ỹe'enaxat da lataxac somaye. Qaq ivira'a so Bernabé ỹa'amaqten de'era. 14¡Qaq de'era nataxac, damaye ỹataqta dataỹa'aguet da 'eesa na'aqtaxanaxac maye no'on na'axaỹaxac! Qaq ỹoqo'oye setaxaỹapegue' so Pedro, ỹauaachigui ñaqa'en na 'amqaanataxanaxaicpi maye lma' ye Antioquía, nache sheetega somaye, sheeta': «'Am, maye 'am judío le'ec, da 'arataxac ỹataqta 'ena'am da saishet da 'am judío le'ec. Qalaq ¿ta'ainco' qone' da 'auamaxalec nam saishet da judiopi da ỹe'enaxat da lataxac na judiopi?»
Da nca'alaxa chegoqchigui da qaipi'iỹa'a So Jesucristo
15'Enauac da shenaqta, qomi' judiopi, chegoqchiguiña co'ollaq nañiguiñi ñi 'oonolec, qaq saishet da shenaqta'am nam 'etaxaloxoicpi maye saishet da judiopi. 16Qalaxaye qomi' ỹataqta saỹaanaqta da Ñim Lo'onatac 'Enauacna ỹaconeguet cam ỹataqta huo'o da lpi'iỹaxac So Jesucristo, qaq qaica ca nca'alec da chegoqchigui da ỹalaxaguet na namaxasoxonaxacpi. Qaq ỹoqo'oye qomi' sa'amaqtenaq So Jesucristo, da yaqto' ishet da qomi' ỹaỹamaxareete' Ñim Lo'onatac 'Enauacna souaxat de'era qarpi'iỹaxac Ñimaye. Cha'aye saishet da huo'o ca ỹaỹamaxareeta Ñim Lo'onatac 'Enauacna souaxat da ỹo'ottac na namaxasoxonaxacpi.
17Qaq ỹoqo'oye qomi' sauoqtaique da Ñim Lo'onatac 'Enauacna qomi' ỹaconegueta chegoqchigui So Jesucristo. Qalaxaye da so'otaq de'era, nache selaqalec da nataqa'en qomi' 'etaxaloxoiqa shenaqta'am na laỹepi shiỹaxauapi, qaq ¿qarhuennataxac peta'a da So Cristo qomi' 'etaxaloxoiqa naqa'en? ¡'A'i, saishet! 18Cha'aye da aỹem shenapec da na namaxasoxonaxacpi qaica ca naigui, qalaxaye ime qaltaq she'eguelaxa da salaxalec, nache sachaxan da aỹem ỹataqta sesomapec. 19Qaq souaxat na namaxasoxonaxacpi, nache aỹem 'eeta'am da seleu. Qalaxaye nagui, ¡aỹem ñeca'alec da yaqto' so'onataxanot Ñim Lo'onatac 'Enauacna! 20Cha'aye aỹem sogote nataqa'en da seleu, iỹatcheguem So Cristo co'ollaq qaiuaxaneguet so npe'enaxaqui. Qaq ỹoqo'oye nagui saishet da maiche ỹalamaxat da ñachaalataxac, cha'aye nacheso So Jesucristo som aỹem nachattaigui. Qaq nagui ñeca'altauec souaxat da ipi'iỹaxac som Llalec Ñim Lo'onatac 'Enauacna, cha'aye Somaye aỹem ỹauotec qataq nañaneguet da l-leuaxa da yaqto' aỹem nca'alaxatec. 21Qaq ỹoqo'oye saishet da semaqa'aguet da lauotaxanaqtaic Ñim Lo'onatac 'Enauacna. Cha'ayectaxa da qomi' ỹaconegueta souaxat da salaxasoxoguet nam namaxasoxonaxacpi, nache qaicactaxa ca naigui da l-leuaxa So Cristo.
Currently Selected:
Gálatas 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
