Éxodo 3

Ñim Lo'onatac 'Enauacna iỹaxana so Moisés

1Huo'o so na'a'q nache so Moisés ilotague' aso lalo qaguetapi so lacho' Jetro, maye ntaxaỹaxanaxanec ye Madián. Nache so Moisés ỹo'orelec aso qagueta da taỹa ye toolec 'alhua, qaq nache ivitta'a añi qasoxonaxa maye le'enaxat Horeb maye lalamaqte Ñim Lo'onatac 'Enauacna. 2Qaq huaña, nache Ñim Lo'onatac 'Enauacna nachaxana so Moisés, huetaigui so le'eraxa so norec maye huetaigui asotai' qo'oipaqole maye huo'o ana le. Nache so Moisés ichemaxata asomaye. Huaña, nache nanoma da 'ettaigui asomaye qalaxaye saishet da ỹavic. 3Nache deuennataxaatac, 'eeta': «¡Ỹataqta qaica ca 'eeta'am dattaxa! Ña semeenaxano' chaq ta'ainec ye saishet da ỹavic ara'ara qo'oipaqole.»

4Qaq Ñim Nataxala' co'ollaq ila'aguet so Moisés da nquigueua'a da ỹauotaique imeten asomaye, nache deỹaxan, chemaqtoigui asa'aso qo'oipaqole, 'eeta':

«¡Moisés! ¡Moisés!»

Nache so Moisés ỹasat, 'eeta':

«Aja', nachaỹem.»

5Nache Ñim Lo'onatac 'Enauacna 'enapeco':

«Saishet da 'anquigueuo. Qataq 'anqa't naua 'arapela'ate, cha'aye nam 'alhua maye 'auapetalec, namaye ỹataqta qui'itta.»

6Nataqa'en 'enapega, 'eeta':

«Aỹem maye Nachaỹem Natamnaxala' soua hua'au' 'arta'al. Nachaỹem Natamnaxala' so Abraham, Isaac qataq so Jacob.»

Nache so Moisés, ỹapogui na lashec cha'aye ỹataqta huo'o da lcolanaxa da ỹamato'ot Ñim Lo'onatac 'Enauacna. 7Qalaxaye Ñim Nataxala', nache queta da 'eetega, 'eeta':

«Aỹem ỹataqta semeteetac da nque'eenaxac ye nhuo' le'ecpi maye ỹalamaxatpi maye netaña ye Egipto, qataq sa'aqtega da lta'araic laquicoxo souaxat yem alleppi maye qaipataxalec da ilotague' yemayepi. Qataq ỹataqta sauattota de'era nque'eenaxac. 8Ỹoqo'oye Aỹem ñanac da ñeca'alaxateeguesop da lamaxasoxonaxac ye Egipto le'ecpi. Ñeqateeguesop yi'iye 'alhua. Ime, qaq sauega ye 'alhua maye ỹataqta 'onaxaic, qataq sa qoue na nallec. Yemaye nacheye ye na'alhua na cananeopi, hitiitapi, amorreopi, ferezeopi, heveopi qataq na jebuseopi. 9Qaq Aỹem sa'aqtega da lachetataic ye Israel le'ecpi, nataqa'en sauaachigui da ye Egipto le'ecpi ỹataqta qaica ca lyacnataxanaxac yemayepi. 10Qaq ỹoqo'oye qojec qome, aỹem, 'am samaxa ñi faraón da yaqto' 'anqateeguesop ye Egipto yem ỹalamaxatpi, maye llalaqpi so Israel.»

11Qalaxaye so Moisés 'enapego' Ñim Lo'onatac 'Enauacna, 'eeta':

«¿Negue't aỹem, da yaqto' ñachaateua'a ñi faraón da yaqto' ñeqateeguesop ye Egipto ye Israel llalaqpi?»

12Nache Ñim Lo'onatac 'Enauacna, 'enapeco':

«Aỹem 'am soota'aguet qome. Qaq 'era qome da la'anaxat da ỹoqta 'eesa da 'am samaq, 'eeta': ‹qom ivita da 'anqateeguesop ye Egipto yem ỹalamaxatpi, nache 'enauac da qoñeeta aỹem qanatamñiỹot da huaña ne'ena qaỹoqotcheguemec 'alhua.›»

13Qalaxaye so Moisés qaltaq 'enapego' Ñim Lo'onatac 'Enauacna, 'eeta':

«Damaye ỹataqta seqalana'a, da aỹem shenapega ye Israel le'ecpi da sheeta': ‹Ñim Lo'onatac 'Enauacna maye Natamnaxala' soua hua'au' qarta'alli' aỹem namaxalo qami'›, qaq da huo'otaq aỹem inat da 'eeta': ‹¿Qaq 'eetec ca le'enaxat camaxa? Nache ¿ca sheetec ca ỹa'aqtac?›»

14Nache Ñim Lo'onatac 'Enauacna 'enapego' so Moisés, 'eeta':

«Aỹem maye nache 'eetai' da qami' soota'agueta.» Qaq 'era qome da 'ara'aqtac da qonapega ye Israel le'ecpi, qoneta': «Ñim nache 'eetai' da qomi' hueta'agueta, aỹem namaxalo qami'.»

15Ñim Lo'onatac 'Enauacna nataqa'en 'enapega so Moisés, 'eeta':

«Qonapega qome ye llalaqpi so Israel, qoneta': ‹Ñim Nataxala', Ñim Natamnaxala' soua hua'au' qarta'alli' Abraham, Isaac qataq Jacob, Ñimaye aỹem namaxalo qami'.› Qaq 'era da ỹe'enaxat maye chochaq tatec, qataq 'era da ỹe'enaxat maye qaica ca loga't.» 16Qaq 'am, qojec qome, nache 'alaỹona't ca lqueroxonecpi ye Israel le'ecpi. Ime, qaq qonapega, qoneta': «Ñim Nataxala', Ñim Natamnaxala' som hua'au' qarta'alli' aỹem namaxalo qami'. Ñim Natamnaxala' so Abraham, Isaac qataq Jacob, Ñimaye aỹem nachaxana. Qaq aỹem da'aqtaxanem da Ñimaye 'eetega maiche qami' huapegueto, cha'aye ilota'a da saishet da qami' iyacna'ape na Egipto le'ecpi. 17Nataqa'en aỹem da'aqtaxanem da ỹauotaique da qami' nca'alaxateeguesopa da qanque'eenaxaqui ne'ena qoviita'a Egipto, qataq qami' ỹauegalo yem na'alhua ye cananeopi, hitiitapi, amorreopi, ferezeopi, heveopi qataq ye jebuseopi. Yem 'alhua maye sa qoue na qanallec.»

18Qaq cam nqueroxonecpi ỹataqta 'am ỹalaxaguet qome. Nache 'am, 'annaicapegue' qome da 'anqo'oneua'a ñim nta'a maye ilotague' ye netaña ye Egipto da qonapega, qoneta': «Ñim Nataxala' maye Natamnaxala' na hebreopi, Ñimaye qomi' nỹaxanalo. Qaq ỹoqo'oye no'on da qomi' 'aua'aqta'alo da ñeqo'onaxa ye toolec 'alhua, qaq yemaye ivi' caua tres na'axa'te nache sevitaxa, da yaqto' savigaxataq aca qarachetaqtaxanaqte da sanaqot Ñim Lo'onatac 'Enauacna maye Nataxala'. 19Qalaxaye aỹem saỹateeta da ñim nta'a maye ilotague' ye netaña ye Egipto saishet qome da choche qami' ỹaxaarec, nato' qom serolec da ỹataqta lta'araic ỹa'añaxac. 20Qaq ỹoqo'oye aỹem sachaxana qome da ỹa'añaxac, salaatec qome da nleuaxa ye Egipto le'ecpi qataq 'enauac nam ishet da de'elaqtaxan. Qaq qom ime, nache ñi faraón ishet da qami' ỹasheetrec. 21Qaq aỹem qome nataqa'en sanem yi'iye ỹalamaxatpi, da yaqto' ye Egipto le'ecpi ỹataqta ichoxoren yemayepi, yaqto' qami' qom ivita da qoqui, qalaq saishet da qui'itchiguilo naua qarhuaxayilli'. 22Nache añi 'oonole 'alo iỹaxanot aca lauoreua, huo'otaq aca camachaqca 'alo da huo'otaq netaña ca lma', iỹaxanaique ca no'on nogoxoshetpi maye chegaqaigui na lcat plata qataq oro, nataqa'en nam qanapogoñapi, npotopi, nam ishet da napogoña qanqa'eñi na qaỹa'alquipi, qaq ỹataqta qanhuoyeeta qome 'enauac yem Egipto le'ecpi.»

Currently Selected:

Éxodo 3: LÑLE13

Highlight

Copy