Efesios 4
4
So Saqcha'a Na'añaxac Qui'itta qomi' ỹauaxaỹaxana't
1Qaq ỹoqo'oye aỹem, maye aỹem qaicoñettai' souaxat da so'onataxaatacot So Cristo, nagui qami' ñachoxoreetoiguilo da ỹataqta qoquiitegue da lataxac nam qaiỹaxanapi maye 'eeta'ama qami', da ỹalegoigui qanqa'en nam lalamaxatpi Ñim Lo'onatac 'Enauacna. 2Ỹataqta qami' huesote' qataq qami' choxonnataxanaxaiqa, qataq qami' hualaxauaiqa, qataq ñi 'oonolec da qoñiita ỹataqta ỹauotec ca lỹa qataq itauan. 3Qataq qanpogoxoiñiỹapegue' da qaulaquiitapiguiñi yaqto' So Saqcha'a Na'añaxac Qui'itta qami' ỹauaxaỹaxana't. 4Ỹataqta 'eesa da 'oonolec da no'ocỹaxac, qataq 'oonolec So Saqcha'a Na'añaxac Qui'itta. Cha'aye Ñim Lo'onatac 'Enauacna qami' iỹaxanalo co'ollaxa, da yaqto' 'oonolec naqa'en da qanaquitaxaqui. 5Qataq 'oonolec Ñim Nataxala', qataq 'oonolec da npi'iỹaxac qataq 'oonolec da nachelaxanataxanaxac, 6qataq 'oonolec Ñim Lo'onatac 'Enauacna, Ñim 'enauac Qarta'a. Ñimaye ilotague' 'enauacna, qataq do'onataxaatapoigui 'enauac da shenaqta, qataq 'enauac qomi' hueta'agueta.
7Qalaxaye ñi 'oonolec da shenaqta ỹaconeguet ca lachetaqtaxanaxat So Cristo, qaq camaye ipacchigui cam tateua'a lo'onataxanaxac maye ỹanem Somaye. 8Cha'aye naua ñiyigui'she maye huetaleguete ana nere maye huetalec na la'aqtacpi Ñim Lo'onatac 'Enauacna, 'eeta':
«Somaye co'ollaq taigue da piguem,
nache qalota so ỹauec lcoñeteguishecpi.#4.8 Lcoñeteguishecpi: Peta'a so namaxashec Pablo 'eetega nam ipa'agueetacpi So Cristo.
Ime, nache ỹanem na lachetaqtaxanaxatpi na shiỹaxauapi.»
9Qaq ¿hua'ague ca 'eetec ca naigui de'era na'aqtac maye 'eeta': «taigue da piguem»? Qomye, damaye naigui da Somaye ỹa'auaxaañi co'ollaxa da naỹa ana 'alhua. 10Qaq som naỹa co'ollaq ana 'alhua, nacheso co'ollaxa som taigue da piguem da yaqto' imattalec 'enauacna. 11Ime, nache ỹanem ca nme ñi 'oonolec na shiỹaxauapi. Nache huo'o na lamaxashecpi naqa'en Somaye, qataq huo'o na la'aqtaxanaxanecpi qataq huo'o na lataxala'pi naqa'en na 'amqaanataxanaxaicpi, qataq na napaxaguenataxanaqpi. 12Qaq 'era da 'eetec co'ollaq iqataxanai' da llec naqa'en na 'amqaanataxanaxaicpi, yaqto' ñi 'oonolec ỹo'ot ca lo'onataxanaxac, da yaqto' nquictasheguem da lo'ocỹaxac So Cristo, 13choche ivitta'a da 'enauac qomi' 'amqaanataxanaxaicpi ỹataqta na'atta't da qarpi'iỹaxac qataq da qarauattonaxanaxac da sauattonaqta So Llalec Ñim Lo'onatac 'Enauacna. Huaña, nache shenaqta'am ca shiỹaxaua maye ỹataqta saq nogotolec, cha'aye ỹataqta semataqta't da llaxa So Cristo. 14Nache saishet qome da shenaqta'am ca nogotolec maye qaica ca lqalaic da qaỹashaxanec da lhuennataxac, qataq saqalaq da qaỹatenachet da qairolec da napaxaguenataxanaxac maye saq 'en, maye lapaxaguenataxanaxac na shiỹaxauapi maye sa nqalaate' da latenataxanaxac maye quetague' da lsomaxac. 15Chaqrato' da naua qara'aqtaqa qalaq ỹataqta 'eesora, qataq qomi' soxoraiqa, qataq ỹataqta nquictasheguem da no'on qarataxac, cha'aye ña'araqtaua'a So Cristo maye nacheso so Lataxala' na 'amqaanataxanaxaicpi. 16Qaq nacheso So Cristo som na'atta'a't naqa'en na 'amqaanataxanaxaicpi, qaq ỹoqo'oye ñi 'oonolec ne'ena na'atta'a'tpi ỹataqta cam lo'onataxanaxac, qataq 'enauac namayepi nacoota't yaqto' na 'amqaanataxanaxaicpi nquictasheguem da lañaxataxac qataq da la'añaxac souaxat da lsoxoyec.
Da dalaxaic nachaalataxac nam quetague' So Cristo
17Qaq cha'aye aỹem ña'attaua'a So Qarataxala', ỹoqo'oye qami' shenapegalo qataq qami' seqatalo da saishet da qoñiita'am da lataxac nam saishet da ỹauatton Ñim Lo'onatac 'Enauacna, cha'aye namayepi quetegueto naua qauema lhuennataxaco maye qaica ca naiguilo. 18Namayepi ỹataqta 'enaqaicpi qataq qaramchigui da lquiyaqteỹaxac qataq qaica ca lauattonaxanaxac, ỹoqo'oye namayepi saishet da ntootapeguec da achaalataxac maye chegoqo'ot Ñim Lo'onatac 'Enauacna. 19Qataq namayepi ỹataqta imauec da deqat so lcoxo, nache nañaneguet na lamanaxanaqtaiguesat. Qataq nqopita da ỹo'ot 'enauac na ỹotta'a't lataxaguesat maye deshepaxanaqtaxan. 20Qalaxaye qami' saishet da qanapaxaguenataguiiqui de'era da qoquiitague' So Cristo, 21cha'aye qami' qaua'aqaichigui da na'aqtaxanaxac maye ỹa'axat Somaye qataq qauaỹaañi da qoviitaigui da lamaxasoxonaxac qataq qoquiitague' da 'eesa, maye qami' ỹapaxagueneque Somaye. 22Qaq ỹoqo'oye 'onaxaic da saishet da qoviitaigui huo'otaq qavi'eguelaqaỹa da togoshec qarataxaqui, dam qauem lqopitaxanaqtaic co'ollaxa da qarapachiỹaxaqui maye ỹauectac da qanachaalataxaqui. 23-24Qataq qami' iuen da ỹataqta qanaralaxache imauec da qarhuennataqai qataq ỹataqta qami' 'eesora qataq ỹataqta qami' qui'itte', yaqto' ipacchigui da lataxac ca shiỹaxaua maye Ñim Lo'onatac 'Enauacna ỹe'eguelaxalec da ỹo'ot da yaqto' 'eeta'am Ñimaye.
25Qaq ỹoqo'oye ñi 'oonolec saishet da ỹatenachettac ca lỹa. Cha'aye 'enauac qomi' ña'araqtaua'a da 'oonolec no'ocỹaxac. Ỹoqo'oye ñi 'oonolec da qoñiita ỹataqta 'eesa qome da huo'o ca la'aqtac.
26Qaq da huo'otaq qaualematai, qalaq saishet da qanashiñiiuo da ỹo'ot ca qarasouaxashechi. Qataq de'era qaralemataiqui saishet da imauec ca 'oonolec na'a'q, 27qataq saishet qome da qauauo'oi ca llegueuo so pa'aguenataxanaxaic.
28Qaq cam decachetapec co'ollaxa, qalaq no'on da ỹaxaañi nagui da lcachaxac. Chaqrato' da do'onataxan, ỹo'ottac ca maiche lalamaxat lo'onatac, yaqto' ishet da itauan cam huo'o da lhuenaxanaxa.
29Qataq saishet da qauema naua qara'aqtaqalli'. Chaqrata da qano'onaxache' naua qara'aqtaqalli', yaqto' ishet da nquiguisheguem, qataq huo'o da na'achecỹaxac cam qami' na'axaỹaxaategalo. 30Qataq saishet qome da qauaquicoqchichi So Saqcha'a Na'añaxac Qui'itta maye chegoqo'ot Ñim Lo'onatac 'Enauacna. Cha'aye somaye nacheso so chegoqchigui da qami' qaỹa'a'n, da yaqto' qami' lalamaqa'ate Ñim Lo'onatac 'Enauacna, yaqto' qami' ỹataqtegueta naqa'en Ñimaye, qom ivita que'eca na'a'q qom ỹoqta ima da qami' isoueeguesopa da ñe'etaxaloxo.
31Qaỹa'axañiiuec qome da qaraquicoqoi qataq da qaralemataiqui. Qataq saishet da qaua'alqaitai' qataq saishet da qasheuñiitac ca qarỹai. Qataq qaỹa'axañiiñi da qauo'ocheetac na qauem. 32Chaqrato' da qami' soxoraiqa, qataq qami' choxonnataxanaxaiqa, ñi 'oonolec ỹataqta ichoxoren ca lỹa da huo'o ca ỹasouaxat, 'eeta'am Ñim Lo'onatac 'Enauacna da qami' ichoxore'n chegoqchigui naqa'en So Cristo.
Currently Selected:
Efesios 4: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.