Deuteronómio 32
32
1'Am piguem, ña 'ana'axaỹaxaañi, cha'aye setaqa,
'am 'alhua, ñaq 'ana'axaỹaxanalo naua ỹa'aqtaqa.
2Ne'ena ỹapaxaguenataxanaxac, 'eeta'am qome ca 'auot da anactañi,
qaq na ỹa'aqtacpi qalaq 'eeta'am qome ca 'aỹa,
qataq 'eeta'am ca loiquiaxa da talec ca 'auaqpi,
qataq 'eeta'am aca llo'oxo ca 'etaxat da talec aca huoue.
3Aỹem sa'axattac qome da le'enaxat Ñim Nataxala':
¡qauauattoñiita qome da la'amaqchec Ñim Qanatamnaxala'!
4Ñimaye qomi' npaxattaleguete, na lo'onatacpi qalaq ỹaỹamaqchiguiñi,
qataq na ỹo'otpi qalaq nalochiguiñi.
Ñim Lo'onatac 'Enauacna ỹataqta 'eesa da lataxac,
qataq saishet da ỹo'ot ca sa ỹaỹamaxañi,
¡Ñimaye ỹataqta ỹaỹamaqchiguiñi qataq nalochiguiñi da lataxac!
5Qami' shiỹaxauapi qauemaicpi qataq 'etaxaloxoicpi
maye qaunogoqchichi Ñim Lo'onatac 'Enauacna,
Ñimaye qami' da'agueleguete, nache saishet da qami' llalaqpi,
cha'aye qami' qauemaicpi qataq 'etaxaloxoicpi.
6¿Peta'a nachera da 'eetec da qaushiichiñi Ñim Nataxala'?
Qami' nhuo' le'ecpi maye qaica ca qaraỹaanataxanaxaqui
qataq qaica ca qauaỹaañiỹapec,
¿peta'a sa nacheñi ñimaye da qarta'ai, maye qami' lo'onataqa?
¡Ñimaye qami' lo'onataqa qataq ỹo'ot da qanachaalataxaqui!
7'Auennate qome da 'auachegoqta'ague,
'antoueeta'ac qome soua hua'au' vi'iye,
ñaq 'anat ca 'arta'a da yaqto' 'am da'aqtaxanem,
qataq na nqueroxonecpi da yaqto' ỹa'axat.
8Huo'o so na'a'q da Ñim Qaỹoqotcheguemec,
icolaxachigui na nhuo' le'ecpi,
qataq na ỹotta'a't shiỹaxauapi,
qataq ỹauo'oi naua loga'te naua lma'ate na nhuo' le'ecpi,
qalaxaye naloqchiichigui ye lcata na llalaqpi so Israel.
9Cha'aye na iỹotaugapi Ñim Nataxala',
nachena nam nalamaxat nhuo' le'ecpi,
maye chegoxoguetpi so Jacob.
10Nam ilalec co'ollaq netalec ye toolec 'alhua,
yem 'alhua maye deqaqta souaxat so la'at lta'araic,
qaq Ñimaye nache nsoxola't, qataq ỹapaxaguen,
qataq ilo'ogue 'eeta'ama naua la'ai llale da ỹataqta ntela'alo.
11'Eeta'am ca huole da huaỹoteguelec ca lpata'c,
ỹayeeta'a da huaỹoi' caua llalqa,
ime nache ipegueere'c naua laua't,
da yaqto' ỹacheleguete da ỹache' caamaye.
12Ñim Nataxala' qami' ỹauecta'agueta co'ollaxa,
¡nache qaica ca ỹaqa'a atamnaxala' da itauan Ñimaye!
13Nache qami' ỹaviguishiguemalo
ye ỹataqta qaỹoqotcheguema 'alhua.
Qataq qami' iquia'axaneque aso no'onaxa lashe qo'oipaq ala,
qataq so te'esaq lli'i maye npaxanec chegaqaigui so coma',
qataq so aceite maye ỹachegoxotaigui aso coma',
14qataq qollequiitac naqa'en so huaca lche',
qataq so isaxa't lche' ana qagueta,
qataq so ỹataqta chaxaraic lapat so qagueta llalec,
so qagueta qataq so quetaq lhuaraic maye huaña ye Basán,
qataq qollequiitac so ỹataqta no'on ala so trigo,
qataq qanỹomiitapigui so ỹataqta no'on lataxa maye lli'i aso uva.
15Qalaxaye co'ollaq mashe qaica ca iueetaique na Israel le'ecpi,
nache dataỹa'aguet Ñim Lo'onatac 'Enauacna maye lo'onatac namayepi,
qataq ỹo'otan naxa Ñim npaxattalec qataq lca'alaxaqui namayepi.
16Nache ỹo'ot naxa da lca'alaxanaxac qataq da layeloxo Ñim Nataxala',
souaxat da natamnot na ỹataqta qaiqaiga atamnaxala'pi,
17qataq da ỹanot na lachetaqtaxanaxat na saqcha'a qauemaicpi lma'na,
nam atamnaxala'pi maye saq'en,
qataq sa ỹauanapega co'ollaxa,
nam dalaxaic atamnaxala'pi, qataq ñaq cheta'ague da yo'oq,
maye so lta'alpi namayepi, saishet co'ollaxa da ỹo'oxoreetac.
18'Am Israel, 'aucoua'ai co'ollaxa Ñim 'Arta'a maye 'am ntela'a,
'aucoua'ai Ñim Lo'onatac 'Enauacna maye 'am ỹanem da 'anachaalataxac.
19Qaq co'ollaq ila'a de'era Ñim Nataxala' nache dalemata,
nache sa nasheneguet co'ollaxa na 'aỹa'alaqpi qataq na 'aỹa'alpi,
20nache, 'eeta': Aỹem sero'oguet qome na ilaq namayepi,
¡qaq chaq hua'ague qome ca dataigue!
Ye ỹataqta 'eesa da qauemaicpi ne'ena shiỹaxauapi,
ñalaqpi maye saishet da qaipi'iỹa'a.
21Namayepi ichoxoteua'a da seca'alaxan souaxat na atamnaxala'pi maye saq'en,
qataq aỹem ỹayeloqchet souaxat na natamnaxala'pi,
¡qalaxaye aỹem nataqa'en sanem qome namayepi
da deca'alaxana ca ỹaqa'a shiỹaxauapi,
qataq denoỹa ñaqa'en ca shiỹaxauapi maye qaica ca ỹaỹaanapec!
22Qaq da ỹayeloxo ỹataqta 'eroigui 'eeta'am ca norec,
nache iviraña da ỹavigaxat ca qaỹoqchiguiña pa'aguiñi ana 'alhua.
Qataq ỹavigaxatta na 'alhua qataq ana ala ana qo'oipaqpi,
qataq ivira'a na ỹa'añaxattañi ana qasoxonaxapi.
23Qataq talec qome ñaqa'en 'enauac na qauempi,
qataq talec qome ñaqa'en ana ichecnapi,
24qataq ilem qome ñaqa'en ca nqouaxa,
qataq huec ca napaxa, nache ilarec ñaqa'en na le'eraxa,
qataq naguelec ñaqa'en ca shiguiỹac maye dequi'iỹapec,
qataq ca na'araxanaq maye qanlem na lshenataxanaxa.
25Qataq huangui qanqa'en ca nqa'aic da qaỹalauat na llalaqpi qairolec ca ỹeelonec,
qataq da hueta'a ca lma' qalaq ỹe'elaqtapigui',
qaq na nsoxoppi qataq na qa'ampi qalaq ileu,
qataq na ñaq lleptacpi qataq na mashe ỹa'axaiquipi.
26Qaq Aỹem iuennataxa co'ollaxa da selagaxattac namayepi,
qataq ỹataqta sapalaxat namayepi ana 'alhua,
27qalaxaye shi'iỹa'aguet da le'enaxanaxac na ñepa'aguenaxauapi,
cha'aye da saishet da ỹaỹateeteguet de'era namayepi,
nache, 'eeta': Saishet da nacheñi Ñim Nataxala' ñim ỹo'ot de'era,
qomi' maye so'otaq damaye sauoqta'a da maiche qara'añaxac.
28Na Israel le'ecpi, namayepi mashe sa naỹaten,
¡qataq qaica ca laỹaanataxanaxac!
29Namayepi taxa da huo'o ca laỹaanec, qataq dauattonaxan,
nache ỹaỹaten chaq negue't ca taỹa'a.
30¿Ca 'eeteco' ca 'oonolec ỹale
da ỹo'orauec ca mil alleppi?
¿Huo'otaq caua dos ỹale't da datauec
naqa'en ca diez mil alleppi?
¡Da saishet da nacheñi Ñim Nataxala'
da ỹaneguet namayepi ca mpa'aguenaxauapi!
31Qataq na qampa'aguenaxauapi ỹaỹaten
da cam npaxattalec namayepi
saishet da 'eeta'am Ñim qomi' npaxattaleguete.
32Cha'aye namayepi 'eeta'am co'ollaxa
so shiỹaxauapi maye lma' ye Sodoma qataq ye Gomorra,
namayepi 'eeta'am aca uva maye ñe'eua qataq qanlem,
33qataq na chegaqaigui lataxa
qalaq 'eeta'am ca na'araxanaq lshenataxanaxa maye dalaataxan.
34«Qaq 'enauac ne'ena choche saỹamaxattac,
'eeta'am da saỹamaxattac ca isallaxa,
35Yaqto' lleuotta'a ca na'a'q da sepalaique ivi',
nache sauo'o ca nhuaxanaguec,
da ivita ca laloqo' da huañi namayepi.
Qaq mashe yaqta'a da nlachiguiñi,
¡mashe sa qaỹapeque ye laloqo' namayepi!
36Ñim Nataxala' deloclec qome na lalamaxat nhuo' le'ecpi,
da ila'a da mashe qaica ca la'añaxac,
nache Ñim Nataxala' choche ichoxoren qome ne'ena lamaxashecpi,
qom ila'a da mashe imeuo, cam huo'o da la'añaxac.
37Qaq huaña, nache 'eeta': ¿Neta'ague ca natamnaxala'pi
maye npaxattalec naxa namayepi
38cam chectac naxa na lcheta ana lachetaqtaxanaqtepi
qataq nỹomtapigui na lachetaqtaxanaxat lataxa namayepi?
¡Ñaq ñisheguem taxa da itauan namayepi!
¡Qataq anac taxa da npaxaalec namayepi!
39Ña qauloỹa nagui da nachaỹemta Atamnaxala',
qaica ca lỹa atamnaxala' da aỹem 'eeta'am.
Cha'aye Aỹem san da nca'alaxa qataq so'ot da nleuaxa,
qataq so'ot ca nque'emaxa qataq ishet da ñataren.
Qataq qaica ca ỹet da la'añaxa'c naua ihuaxaye.
40Aỹem sachaxaayisheguema
na piguem naua ihua'q da san da ỹa'aqtac,
nache sheeta': ¡Aỹem maye nache sheetai' qaica ca ỹoga't!
41Qaq qom sequeuoc ca ỹataqta qashelec ỹainec,
nache da ihuaqỹaxac ỹacoolec da ỹo'ot ca ỹaỹamaqchiguiñi lataxac,
¡nache sepalaique ivi' da so'ot da nhuaxanaguec na ñepa'aguenaxauapi!
nache so'otec da 'itchiguiñi nhuaxanaguec na aỹem nquiỹategapi.
42Aca ichecnapi qalaq huagui qome ñaqa'en
na ltago'q ca que'emaxaicpi qataq ca noxonecpi,
qataq ca ỹainec nmichiguiñi naqa'en namayepi,
¡qataq ca lataxala'pi na qampa'aguenaxauapi!»
43¡Qaq qami' ỹotta'a't shiỹaxauapi
qauanaqui qome da qaualliquiiua'a da ntonaxac
na nhuo' le'ecpi maye lalamaxat Ñim Nataxala'!
¡Ñimaye ipalaique lvi' da l-leuaxa na lamaxashecpi,
nache Ñim Nataxala' qom mashe ỹauo'o lvi'
souaxat na mpa'aguenaxauapi,
nache ỹapalaxat qome na nasouaxashetpi yi'iye 'alhua
qataq na lalamaxatpi nhuo' le'ecpi!
44Nache so Moisés, nnaictague' co'ollaxa so Josué, maye llalec so Nun, da tareuga so Israel le'ecpi, nache hua'aqchigui naqa'en 'enauac nam na'aqtacpi se'eso no'onec, qataq ỹachegoxotchiguiña so hua'auchiguiñi nerec nache ivitta'a da ivirec. 45Qaq co'ollaq ime, nache 'enapega co'ollaxa 'enauac so Israel le'ecpi, 'eeta': 46«Ỹataqta qauennataxañiilec qome 'enauac ne'ena qami' sa'aqtaxaateguema, qataq qauamaqailec na qoyalquipi da ỹataqta ỹo'ot qome 'enauac ne'ena napaxaguenataxanaxacpi. 47Cha'aye saishet da chocheyetto ne'ena na'aqtacpi, ne'ena nqataxac namaye nca'alaxa, cha'aye chegoqchigui da logoraic da qanachaalataxaqui da qoñiitalec yi'iye 'alhua maye hua'ategue da le'ego ye tala Jordán, maye qaralamaxache qome.»
Ñim Nataxala' choche ỹachaxana so Moisés ye 'alhua
48Qaq se'eso na'a'q, Ñim Nataxala' 'enapega co'ollaxa so Moisés, 'eeta':
49«'Asheguema qome aye qasoxonaxapi ye Abarín, nache 'anotsheguema añi qasoxonaxa Nebo, yem huaigui ye na'alhua ye moabiitapi, maye datatta ye Jericó, nache 'auallelec qome ye 'alhua Canaán, maye sanem qome da lalamaxat ñaqa'en na Israel le'ecpi. 50Qaq aña'añi qasoxonaxa Nebo, nache huaña qome da 'aleu, nache 'anauane' qome som hua'aupi maye maiche 'arhuo' le'ecpi, 'eeta'am da 'eetec so 'arqaỹa Aarón, maye ileu co'ollaxa hualec añi qasoxonaxa Hor, huaña nache nauane' som hua'au lta'alpi. 51Qaq 'era da 'eetec qome, cha'aye qami' ỹauaachiguilo co'ollaxa 'enauac na Israel le'ecpi, co'ollaq qoviita'a ye huaña na npaxaatasheguem 'etaxat ye Meribá Cadés, yem toolec 'alhua ye Sin, co'ollaq qaica ca 'enec qanqa'eñi Aỹem. 52Qaq ỹoqo'oye, choche 'auallelec ñaqa'en qome yi'iye 'alhua, maye sanem na llalaqpi so Israel, qalaxaye saishet da 'aunoxoneua'a qome yemaye.»
Currently Selected:
Deuteronómio 32: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.