Éxodo 1
1
Israendeccu Egiptoni vana'jen'cho
1Vandeccu tsu Jacobi'ccu Egiptoni ji'cho israendeccumbe inise. Nane poiyi'cco tsu tise'pa pushe, tise'pa dushundeccui'ccu Egiptoni ji'fa: 2Rubén, Simeón, Leví, Judá, 3Isacar, Zabulón, Benjamín, 4Dan, Neftalí, Gad toya'caen Aser. 5Tsa'caen ji'choma agattosi Jacob aindeccuja setenta a'ive nepi, José tayo Egiptoni can'jen'choi'ccu.
6José, tise aindeccu toya'caen poiyi'cco tisia'caen fae'ngae coenzandeccu tsu pa'fa. 7Tsa'ma israendeccuja tsain'bio dushundeccuve an'biamba ñoa'me ti'tsse tsain'bitsse atapapa ti'tsse joccapitssia've da'fa. Nane tsa Egipto ande on'batsse tsu atapa'fa.
8Bo'tsse #1.8 cuatrociento canqque'fa can'jensi omboe faesu cuna egipto'su na'su, tayopi'su Joséma atesumbi'choa, na'suve dapa tise aindeccunga su: 9“Que can'faja, va Israel aindeccuja tsain'bitssipa ingima ti'tsse osha'choma oshacho'fa. 10Tsa'cansi tsu injienge osha'ta tise'pama se'piye cuintsu ti'tsse atapambe'yi can'faye. In'jamba'qque gera jisi ingima iyiccayesundeccui'ccu fae'ngae pipa ingi'ccu iyiccopa va ande'ye sombopa ja'fasa'ne.”
11Tsa'caen in'jamba egiptondeccuja mandasundeccuve ccutsiamba manda'fa cuintsu israendeccuma aiye'pa semambanga ca'nia'faye. Tsa'caen ca'niamba manda'fa cuintsu Pitón canqque toya'caen Ramsés canqqueve ñoña'faye. Nane egipto'su na'su faraónda tsu tsa canqqueve ñoña'faye manda tise an'bian'cho trigoma tseni boñañe. 12Tsa'ma tsa'caen vanae'fa'ni'qque ti'tsse atapaji'fa. Atapaji'fasi poiyi'cco egiptondeccuja ñoa'me dyo'fa.
13Tsa'caen dyopa egiptondeccuja israendeccuma ñoa'me aiye'pa sema'banga ca'nia'fa. 14Tsa'caen tsu tson'fa cuintsu ñombi'ye'sui'ccu semamba apichama tssipoemba tsanga tsu'tsu chapiamba ladriyove ñoña'faye. Toya'caen pa'cco nasipa'su sema'banga'qque tsu manda'fa. Tsa'caen tsu israendeccuma quian'me semoemba ñoa'me vanae'fa. 15Toya'caen tsu egipto'su na'suja hebreo'su du'shuma isiansundeccu, Sifra toya'caen Fúanga, qquen afa:
16—Maqui a'ta hebreo'su pushesu, du'shuma isu'jesi ja'ta ñotsse in'janjan. Pushesuve isu'ninda antteja cuintsu canseye. Tsa'ma tsandieve isu'ninda fi'ttija.
17Tsa'caen mandasi paña'an'qque du'shuma isiansundeccuja Chigama dyoe'sui'ccu in'jamba egipto'su na'su mandaqquia'caen tsombipa dushundeccuma fi'ttimbe'yi antte'fa cuintsu canse'faye. 18Tsa'caen antte'je'fasi egipto'su na'suja tsendeccuma ttu'sepa qquen su:
—¿Jongoesie qui tsandie du'shuma'qque fi'ttimbe antte'je'fa?
19Tsonsi tsendeccuja qquen su'fa:
—Hebreo'su pushesuja egipto'su pushesua'can'fambi. Nane ñoa'me quiñamba ingi toya nepimbi'te ai'yembe isu'je'fa.
20-21Tsa'caen antte'je'fasi israendeccuja ti'tsse atapa'ñaccapa ti'tsse osha'choma oshacho'fa. Toya'caen isiansundeccu dyoe'sui'ccu Chiga Quitsama in'jansi Chigaja tise'pama ñotsse tsoñe in'jamba antte cuintsu tise'pa'qque tsain'bio du'shuve atapa'faye. 22Tsa'caen tson'jen'fasi faraónjan manda poiyi'cco tise aindeccuma qquen supa: “Hebreosundeccu tsandie du'shuve isu'ninda na'enga ttova cati'faja. Tsa'ma pushesu du'shuve isu'ninda antte'faja cuintsu canseye.”
Currently Selected:
Éxodo 1: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
