Genesis 16
16
Si Hagar ug si Ismael
1Si Sarai nga asawa ni Abram wala manganak. Apan siya may babayeng ulipon nga Ehiptohanon nga ginganlag Hagar. 2Miingon si Sarai kang Abram, “Nakita mo nga ang Ginoo wala motugot nga manganak ako busa adtoa ang akong ulipon ug pakighilawas kaniya basin pag makabaton akog anak pinaagi kaniya.” Busa miuyon si Abram sa gisulti ni Sarai kaniya. 3Unya gihatag ni Sarai si Hagar kang Abram aron mahimong iyang asawa. Nahitabo kini sa nakapuyo na si Abram sa Canaan ug napulo ka tuig. 4Human si Abram makighilawas kang Hagar, nagmabdos si Hagar. Sa pagkasayod ni Hagar nga nagsabak siya, nagpagarbo siya ug gibiaybiay niya si Sarai.
5Unya miingon si Sarai kang Abram, “Ikaw ang angay basolon sa pagbiaybiay ni Hagar kanako. Gihatag ko siya kanimo apan sukad siya masayod nga nagsabak siya, gibiaybiay niya ako. Maghukom unta ang Ginoo kon kinsay sad-an kanato.”
6Si Abram mitubag, “Kon mao kana, imo siyang ulipon ug ilalom sa imong pagbuot; ikaw nay mag-igo kaniya.” Ug gidaugdaog pag-ayo ni Sarai si Hagar busa mikagiw si Hagar.
7Gitagbo si Hagar sa anghel sa Ginoo didto sa usa ka tubod sa kamingawan, sa dalan paingon sa yuta sa Shur. 8Ang anghel miingon, “Hagar, ulipon ni Sarai, diin ka man gikan ug asa ka man padulong?”
Si Hagar mitubag, “Mikagiw ako aron mahilayo sa akong agalon nga si Sarai.”
9Ang anghel miingon, “Balik kaniya ug tumana ang iyang isugo kanimo.” 10Ug ang anghel mipadayon sa pag-ingon,
“Padaghanon ko pag-ayo ang imong mga kaliwat
ug dili na sila maihap.
11Sa dili madugay manganak kag batang lalaki
nga imong nganlag Ismael#16:11 ISMAEL: Sa Hebreo kining ngalana nagkahulogan ug ang Dios naminaw.
kay gidungog man sa Ginoo ang imong pagpakitabang.
12Apan ang imong anak magpuyo sama sa usa ka ihalas nga asno;
makigbatok siya sa tanan ug ang tanan makigbatok kaniya.
Magpahilayo siya sa iyang mga paryenti.”
13Nakaingon si Hagar sa iyang kaugalingon, “Nakita ko ba gayod kaha dinhi ang Ginoo ug magpabiling buhi aron pagsugilon bahin niini?”#16:13 ug magpabiling…bahin niini: Sa Hebreo dili klaro. Busa ginganlan niya ang Ginoo nga nakigsulti kaniya, “Usa ka Dios nga makakita.” 14Tungod niini, ang atabay nga nahimutang tungatunga sa Cades ug sa Bered gitawag sa mga tawo ug Beerla-hai-roi.#16:14 BEERLA-HAI-ROI: Ang buot ipasabot Ang atabay niya nga buhi ug nakakita kanako.
15Unya#Gal. 4:22. nanganak si Hagar ug batang lalaki ug ginganlan ni Abram ang iyang anak ug Ismael. 16Niadtong panahona 86 na ang panuigon ni Abram.
Currently Selected:
Genesis 16: RCPV
Highlight
Share
Copy
Want to have your highlights saved across all your devices? Sign up or sign in
© 1999 Philippine Bible Society
