Jo Roma 3

1Ka doŋ tye kit meno, ci Lajudaya kato jo mukene-gu ki ŋo? Nyo kony me lirre kono gin aŋo? 2Konyo matek i yo ducu. Mukwoŋo, Lujudaya yam gimiyo botgi lok pa Lubaŋa ma pire tek kun gigenogi ni gibigwoko. 3Lok man bedo niŋniŋ ka jo mogo i kingi onoŋo yam gin pe lugen? Kit macalo gin pe genne-ni, man bene twero miyo Lubaŋa doko ŋat ma pe genne? 4#Jab 51.4 (LXX) Pe kumeno! Waket Lubaŋa obed me ada, kadi bed dano ducu lugoba, kit macalo gicoyo ni,

“Wek gin ma iloko onyut ni kiti atir,

dok bene wek ilo lok ka giŋolo kop i komi.”

5Ento ka kitwa ma pe atir nyuto kit ma atir ma Lubaŋa tye kwede, ci wan dok wabiwaco lok aŋo? Wabiwaco ni Lubaŋa pe kite atir pi keto akemone i komwa? (Man atye ka lok i kit pa dano.) 6Pe kumeno! Ka tye kit meno, ci Lubaŋa twero ŋolo kop i kom dano ma gibedo i wi lobo niŋniŋ? 7Ka ce gobana-ni miyo ada pa Lubaŋa medde ameda kun bene kelo deyo bote, ci piŋo pud dok giŋolo kop i koma calo an labalo? 8Piŋo pe watimo gin marac wek gin maber oa iye? Pien tye jo mogo ma gicoko dogwa ki lok goba ma giwacci wan waloko kumeno. Ka giŋolo kop oloyo jo macalo meno noŋo giŋolo kakare.

Ŋat mo ma kite atir pe

9Gin aŋo doki? Wan Lujudaya watye maber makatogi woko? Pe wacel; pien doŋ anyuto woko i lokka me adot ni, Lujudaya ki jo Grik ducu bal doŋ oloyogi, 10#Jab 14.1-3; Jab 53.1-3 kit macalo yam gicoyo ni,

“Ŋat mo ma kite atir pe, pe kadi ki acel; 11ŋat mo ma niaŋ bene pe,

ŋat mo ma yenyo Lubaŋa bene pe. 12Gin ducu doŋ guŋak woko, gudoko

jo ma kitgi raco;

pe tye ŋat mo ma tiyo gin maber,

pe, kadi ki acel.” 13#Jab 5.9; Jab 140.3 “Guŋamo doggi calo lyel ma twolo,

kun giloko lok mamit me bwolo dano.”

“Lok ma giloko obedo calo kwir

pa ororo.” 14#Jab 10.7 “Lokgi ducu ma giloko obedo lok

makec ma giceno ki dano acena.” 15#Ic 59.7, 8 “Tyengi yot giriŋo kwede madwir

ka neko dano, 16balle me lobo ki cwercwiny keken

aye tye i yo gudogi ducu, 17pe giŋeyo yo me kuc.” 18#Jab 36.1 “Pe gineno gin ma miyo gilworo Lubaŋa.”

19Waŋeyo ni gin ma cik oloko, loko bot jo ma tye i te cik, wek dano ducu guliŋ woko pe guŋam doggi ka lok, ki wi lobo ducu myero obed i tye ŋolo kop pa Lubaŋa. 20#Jab 143.2; Gal 2.16 Pien pe gibikwano dano mo ni kite atir i nyim Lubaŋa pi cobo cik; cik ticce aye me niaŋo dano wek guŋe bal.

Lubaŋa kwano dano ni kite atir pi niye

21Ento kombeddi kit ma Lubaŋa kwano ki dano ni kite atir pe pi lubo cik doŋ onen woko ka maleŋ. Cik pa Moses ki pa lunebi bene yam otito pire; 22en kit ma Lubaŋa kwano ki dano ni kite atir pi niyene i kom Yecu Kricito, dok bene tye pi jo ducu ma ye en. Apokapoka mo pe iye; 23pien dano ducu gubalo, pe gio i kom deyo pa Lubaŋa. 24Lubaŋa kwanogi ni kitgi atir nono, miyogi macalo mot pi kicane pi kit ma Yecu okokogi kwede. 25Lubaŋa okete me bedo gin-kok me kwanyo bal ki remone, pi jo ma ye en, wek enyut kwede kite ma atir-ri, pien Lubaŋa yam ojukke kene, pe otimo gin mo i kom bal ma yam dano gutimo con, 26wek enyut kit ma atir i kare man, ni, en kikome kite atir, dok ekwano dano ni kite atir pi ye Yecu.

27Ka wakkewa kono doŋ tye kwene? Doŋ gigeŋo woko. Pi cik mene? Pi cik me tic? Pe kumeno gire, ento pi cik me niye. 28Mumiyo wamoko tamwa ni dano gikwano ni kite atir pi niyene, ento pe pi tic me cobo cik. 29Lubaŋa mono tye pi Lujudaya keken? Pe en bene Lubaŋa pa Lurok? Iyo, ada, en bene Lubaŋa pa Lurok, 30#Nwo 6.4; Gal 3.20 pien Lubaŋa tye acel, en bikwano dano ma gilirogi ni kitgi atir pi niyegi, dok bene bikwano jo ma pe gilirogi ni kitgi atir pi niyegi. 31Wan mono watye ka bolo cik pa Moses woko pi man? Pe kumeno wacel, wan giwa wamoko cik amoka.

Currently Selected:

Jo Roma 3: Aco85

Highlight

Copy