Jo Roma 10
10
1Utmegina, gin ma amito ki cwinya ducu ma alego Lubaŋa pire, en aye ni myero jo Icrael gularre. 2An abedo cadengi kun aŋeyo ni gumoko matek i kom Lubaŋa, ento kadi bed gumoko, ci pe gucuŋo i ŋec kikome. 3Onoŋo pe giŋeyo kit ma Lubaŋa kwano kwede dano ni kite atir, ento gubedo ka yenyo ni gitwero noŋo kit ma atir pigi kengi, pe gumine kengi i kit ma atir ma Lubaŋa miyo. 4Pien cik doŋ ogik woko i Kricito, wek omi jo ma ye en gikwangi ni kitgi atir.
5 #
Levi 18.5
Moses yam owaco ni dano ma tiyo tic ma atir ma cik mito, bikwo pire. 6#Nwo 30.12-14 Ento kit ma atir ma ginoŋo pi niye loko kit man ni, “Pe ilok kekeni ni, ‘Aŋa ma biito malo i polo? (ni, me kelo Kricito piny), 7nyo ni, ‘Aŋa ma bidonyo i bur ma tere pe gik?’ (ni, me kelo Kricito woko ki i kin jo muto). 8Ento waco gin aŋo? Waco ni, “Lok man doŋ tye cok kwedi, tye i dogi ki i cwinyi bene,” ma en aye lok i kom niye ma watito pire-ni. 9Pien ka ituco ki dogi ni, “Kricito aye Rwot,” ma kun iye bene ki i cwinyi ni Lubaŋa yam ocere woko ki i kin jo muto, ci ibilarre. 10Pien dano ye ki cwinye, en aye miyo gikwane ni kite atir, ka dok tuco ki doge, ka doŋ miyo Lubaŋa lare. 11#Ic 28.16 Pien coc ma yam gicoyo i ginacoya wacci, “Lewic pe bimako ŋat ma ye en.” 12Apokapoka mo pe i kin Lujudaya ki jo Grik; gin ducu Rwotgi acel, en bene poko lonyone bot jo ducu ma kok bote. 13#Joel 2.32 Yam gicoyo ni, “Jo ducu ma gilwoŋo nyiŋ Rwot gibilarogi.”
14Ento dano gibikok bote niŋniŋ, ma peya guye en? Gitwero ye en kono niŋniŋ ka pe guwinyo lok ma gitito i kome? Gitwero winyo lok i kome niŋniŋ ka ŋat mo pe ma tito lokke botgi? 15#Ic 52.7 Dano gitwero tito lok niŋniŋ ka pe giorogi? Kit macalo yam gicoyo ni, “Neno tyengi ber rom mene jo ma kelo lok me kwena maber!” 16Ento pe gin ducu yam guye lok me kwena maber; pien Icaya yam oloko ni, “Rwot, aŋa ma yam oye lok ma wan watito?” 17Adada, niye bino pi winyo lok ma gitito, lok ma giwinyo a i lok ma gitito i kom Kricito.
18 #
Jab 19.4 Ento koŋ amito apeny ni, “Onoŋo yam pe guwinyo?” Guwinyo, kit macalo yam gicoyo i Jabuli ni,
“Dwangi winnye teretere i wi lobo ducu,
ki lok ma giloko oo wa i agikki piny.”
19Dok apenyo ni, “Jo Icrael mono yam pe guniaŋ?” Moses aye ma okwoŋo waco ni,
“Abimiyo nyeko makowu i kom
jo ma pe gin rok kikome,
abimiyo kiniga makowu i kom
rok mamiŋ.” 20#Ic 65.1 Icaya doki cwinye obedo tek me
waco ni,
“Jo ma yam pe giyenya doŋ gunoŋa,
doŋ bene atyeko nyutte woko ka
maleŋ bot jo ma onoŋo pe gipenyo pira.”
21 #
Ic 65.2
Ento i kom jo Icrael owaco ni, “Yam abedo ka ryeyo ciŋa dyeceŋ jwi bot jo ma pe giwinyo doga, jo ma ŋipyem kweda.”
Currently Selected:
Jo Roma 10: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.
