Jabuli 16
16
Lega me gen
1Gwoka, ai Lubaŋa, pien ariŋo alaro boti.
2Awaco bot Rwot ni. “In i rwoda;
gin maber mo ma atye kwede pe, laboŋo in.”
3Jo maleŋ ma i lobo gin jo me awora, ma giyomo cwinya mada.
4Jo ma giyero lubaŋa mukene ginyayo cwercwinygi gimedo ameda;
pe abionyo gityergi me remo,
dok bene pe abilwoŋo nyiŋ jogigi ki doga.
5Rwot aye dulla ma gipokka, en kikopo ma abimato;
kwona ducu tye i ciŋi.
6Waŋ apokki me potona opoto i kabedo ma yo mo cwinya;
iyo, doŋ anoŋo ginaleya maber ma romma,
7Apwoyo Rwot ma omiya ryeko;
cwinya bene pwonya kadi ki i dyewor,
8 #
Tic 2.25-28
Kare ducu aŋeyo ni Rwot tye kweda:
pe gibidira woko cen, pien en tye yo tuŋ ciŋa ma lacuc.
9Pi meno omiyo abedo ki yomcwiny madwoŋ,
nino ducu abedo maber ki kuc;
10 #
Tic 13.35
pien in pe ibitenya ata i lobo pa jo muto,
pe ibiweko danoni ma geni donyo i bur lyel.
11In doŋ ibinyutta yo ma tera i kwo;
bedoni kweda miyo abedo ki yomcwiny madwoŋ mada,
i tuŋ ciŋi lacuc tye iye gin ma yomo cwiny dano nakanaka.
Currently Selected:
Jabuli 16: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.
