Pilemon 1

1Waraga man oa ki bot Paulo ma lamabuc pi Kricito Yecu, ki bot ominwa Temceo.

Bot Pilemon latic wadiwa ma wamaro 2#Kol 4.17 gin ki laminwa Apia, ki Arkipo askari wadiwa, ki jo muye Kricito ma gicokke i odi:

3Lubaŋa Wonwa ki Rwotwa Yecu Kricito omiwu kica ki kuc.

Mar pa Pilemon ki niyene

4Apwoyo Lubaŋa kare ducu ka alwoŋo nyiŋi i legana, 5pien abedo ka winyo pi marri ki pi niyeni ma itye kwede i kom Rwotwa Yecu ki bot jo pa Lubaŋa ducu. 6Man omiyo alego ni, kit ribbe ma waribbe wan kwedi i kom niye odok matek ma romo niaŋowa matut i kom gin maber ducu ma watye kwede i Kricito. 7Pien marri okella yomcwiny, dok ojiŋo cwinya, omera, pien ikweyo cwiny jo pa Lubaŋa.

Pido pa Paulo pi Onesimo

8Pi meno, kadi bed atye ki tekcwiny i Kricito ma miyo aciki acika me tiyo gin mo ma mitte, 9ento pi marri-ni aneno ni ber alegi alega, an Paulo ma acuŋ ma ka Kricito Yecu, ma kombeddi bene doŋ adoko lamabuc pire. 10#Kol 4.9 Alegi pi latinna Onesimo, ma doŋ adoko wonne ki i buc kany. 11I kare mukato onoŋo konnye koŋ obedo pe boti, ento kombeddi doŋ konnye dit boti ki bota bene. 12Doŋ acwalo en me dwogo boti enno, en doŋ odoko macalo dul koma kikome. 13Onoŋo amito ni koŋ agwok en bota kany, wek omiya kony ma kakari ma kun pud atye i buc pi tito lok me kwena maber; 14ento pe amito ni atim gin mo ma kun noŋo in pe iye, wek berri pe obed macalo gin ma gidiyi iye adiya, ento obed pi yeyoni in kikomi.

15Gwok nyo man en gin mumiyo en yam opokke woko kwedi pi kare manok, ni wek doŋ igame matwal, 16pe dok macalo opii, ento makato opii woko, macalo ominwa ma wamaro. Makatone adada en pire tekka, ento ki tuŋ boti pire doŋ tek twatwal, macalo lakonnyi dok omeru bene i Rwotwa.

17Kit meno, ka iŋeyo ni an abedo lawoti, myero igame i kit ma kono igama kwede. 18Ka ce yam otimo gin mo marac i komi, nyo tye ki banyani mo, kwan magi ducu i wiya. 19An paulo kikoma aye acoyo lok man ki ciŋa, abiculi. Pe awaco ni in bene itye ki banyana, en kwoni kikome. 20Iyo, omera, amito kony mo ki boti i Rwotwa. Kwe cwinya i Kricito.

21Atye ki gen matek i komi ni ibiworo doga, oweko atye ka coyo boti lok man kun aŋeyo ni ibitimo makato ma awacci-ni. 22Medo ki meno, yubba kicika me buto pa welo, pien atye ki gen ni legawu biweko gimiya botwu.

Mot me agikki

23 # Kol 1.7; 4.12 Epapira mabuc wadiwa i Kricito Yecu omoti, 24#Tic 12.12, 25; 13.13; 15.37-39; 19.19; Kol 4.10, 14; Tic 19.29; 27.2; Kol 4.10; Kol 4.14; 2 Tem 4.10; Kol 4.14; 2 Tem 4.11 kadi Marako, Aristako, Dema ki Luka lutic wadiwa bene gumoti.

25Kica pa Rwotwa Yecu Kricito obed kwedwu.

Currently Selected:

Pilemon 1: Aco85

Highlight

Copy