Marako 8

Yecu omiyo cam ki jo alip aŋwen

(Mat 15.32-39)

1I kare meno, ka lwak dok gucokke mapol, kun pe gitye ki camgi, ci Yecu olwoŋo lupwonnyene bote, ocako waco botgi ni, 2“Kica maka i kom lwak man, pien gutyeko bedo kweda kany pi nino adek ma kun pe gitye ki camgi mo. 3Ka acwalogi ni gudok wa tugi ki kec, ci kec bibwoyogi woko i yo, pien jo mukene i kingi gua ki ka mabor.” 4Lupwonnyene gudok iye ni, “Kara man, dano twero miyo mugati ma romo dano-ni i tim kany niŋniŋ?” 5Yecu openyogi ni, “Wutye ki mugati adi?” Gugamo ni, “Abiro.” 6Ociko lwak ni gubed piny i ŋom, ci omako mugati abiro-nu, opwoyo, ka obaro igi, ocako miyo bot lupwonnyene guket i nyimgi, ci guketo i nyim lwak. 7Onoŋo gitye ki rec matino manok bene; ka doŋ olego iye gum, ociko ni magi bene myero giket i nyimgi. 8Lwak gucamo nio ka guyeŋ; gucako coko ŋide cam ma oloyogi-ni, oromo adita abiro mupoŋ. 9Jo ma onoŋo gitye kunnu welgi romo jo alip aŋwen. 10Ka ociko lwak, ci odonyo i yeya cutcut kacel ki lupwonnyene, ocito wa i lobo Dalmanuta.

Luparicayo gulego lanyut

(Mat 16.1-4)

11 # Mat 12.38; Luka 11.16 Luparicayo gubino bot Yecu ci gucako pyem kwede, kun gimito lanyut ma a ki bot Lubaŋa, me laom iye. 12#Mat 12.39; Luka 11.29 Yecu ocur ki i cwinye matek kun wacci, “Piŋo yalwak me kare man gimito lanyut? Adada, awacciwu ni, pe gibimiyo lanyut mo bot yalwak me kare man.” 13Yecu oa woko ki botgi, ci odonyo i yeya, oŋolo nam okato wa loka ca.

Tobi pa Luparicayo ki tobi pa Kerode

(Mat 16.5-12)

14Lupwonnyene wigi onoŋo owil woko ka tero mugati, onoŋo gitye kimugati acel keken i yeya. 15#Luka 12.1 Yecu ocikogi matek twatwal kun wacci, “Wugwokke i kom tobi pa Luparicayo ki tobi pa Luparicayo ki tobi pa Kerode.” 16Lupwonnye gubedo ka laro lok kekengi kun giwacci, “Pe watye ki mugati.” 17Ka Yecu oŋeyo ci openyogi ni, “Piŋo wubedo ka laro lok ni pe wutye ki mugati? Peya wuniaŋ ce? Pe wumako maber? Cwinywu pud nwaŋ? 18#Jer 5.21; Ejek 12.2; Mar 4.12 Wutye ki waŋwu, ci pe wuneno kwede? Wutye ki itwu, pe wuwinyo kwede? Wun pe wupo ce? 19Ka yam abaro i mugati abic pi jo alip abic-ci, ci wucoko ŋide aduku adi?” Gugamo ni, “Apar wiye aryo.” 20“Ka yam abaro i mugati abiro pi jo alip aŋwen-ni, onoŋo wucoko ŋide opoŋo adita adi?” Dok gugamo ni, “Abiro.” 21En openyogi ni, “Peya wuniaŋ aye?”

Yecu ocaŋo latowaŋ i Betecaida

22Gin gucako bino i Betecaida, ci jo mogo gukelo bote dano ma waŋe oto woko, gubako doggi ni oboŋ kome. 23Yecu ocako mako ciŋ lawaŋe-oto, ci otere woko wa i ŋe gaŋ; ci oŋulo laa i waŋe, ka dok oketo ciŋe i kome, openye ni, “Ineno gin mo doŋ?” 24Laco meno otiŋo waŋe malo, ocako waco ni, “Aneno kom dano; ento pud ginen macalo yadi ma woto.” 25Yecu dok onwoyo keto ciŋe i waŋ lawaŋe-oto; ci ociko waŋe matek, waŋe odok kakare ma neno piny maber. 26Yecu ocwalo en wa i paco tugi, kun cike ni, “Pe idony i gaŋ kunnu.”

Petero otuco lok i kom Yecu

(Mat 16.13-20; Luka 9.18-21)

27Yecu ki lupwonnyene gucito i kin gaŋi me Cecaria Pilipi. I kare ma gitye i yo, openyo lupwonnye mere ni, “Dano mono giwacci an aŋa kaa?” 28#Mar 6.14, 15; Luka 9.7, 8 Guwacce ni, “Jon Lubatija; jo mogo giwacci, ‘Elia’, ki jo mukene ni in ŋat acel i kin lunebi.” 29#Jon 6.68, 69 Dok openyogi ni, “Ento wun kono wulwoŋa mono ni an aŋa?” Petero ogamo ni, “In i Kricito ma Lubaŋa oyero.” 30Yecu ociko matek ni pe gitit pire ki dano mo.

Yecu otito pi tone

(Mat 16.21-28; Luka 9.22-27)

31Yecu ocako pwonyo lupwonnye mere ni, “Wod pa dano myero olim can madwoŋ, dok ludoŋo ki ajwagi madito pa Lubaŋa ki lupwony-cik myero gukwere woko, ci guneke, ento en cako cer woko i ŋe nino adek.” 32Yecu oloko lok meno atyer ka maleŋ. Petero otero en cen, ocako juke matek. 33En olokke bot lupwonnyene ci oloko ki Petero matek, kun wacci, “Dok cen i ŋeya, in Catan! Pien tammi pe lubo pa Lubaŋa, ento pa dano.”

34 # Mat 10.38; Luka 14.27 Yecu olwoŋo lwak bote kacel ki lupwonnyene, ci otito botgi ni, “Ka ce dano mo mito lubo kora, myero okwoŋ kwerre kekene, ka ocak tiŋo yatariyane, olub ki kora. 35#Mat 10.39; Luka 17.33; Jon 12.25 Pien dano ma mito laro kwone birwenyone arwenya, ento ka dano mo orwenyo kwone pira ki pi lok me kwena maber, en aye bilaro kwone. 36Konyo dano ma olimo lobo ducu ki gin aŋo mono, ka ce kwone gikwanyo woko? 37Dano dok bimiyo kit gin aŋo ma ka kwone? 38Ka ce dano mo lewic omake i koma ki i lokka i kare man me bal ki weko Lubaŋa, Wod pa dano bene lewic bimake i kome i kare ma en bidwogo ki deyo pa Wonne kacel ki lumalaika maleŋ.”

Currently Selected:

Marako 8: Aco85

Highlight

Copy