Marako 13

Yecu otito pi muko ot pa Lubaŋa woko

(Mat 24.1-2; Luka 21.5-6)

1Ka Yecu okato woko ki i ot pa Lubaŋa; ci ŋat acel mo ki i kin lupwonnyene owacce ni, “Lapwony, nen kit ma godi magi dito kwede ki kit ma gedone beco kwede!” 2Yecu ogamo ni, “Wuneno gedo magi madito twatwal-li? Godi ducu gibimukogi gireto woko piny, pe gibiweko got acel mo kany ma ododde i wi wadi.”

Acakki te can ma bipoto i lobo

(Mat 24.3-14; Luka 21.7-19)

3Yecu ka obedo piny i wi got Jeituni, kun otikke ki ot pa Lubaŋa, ci Petero ki Yakobo ki Jon ki Anderiya gucako penye i muŋ ni, 4“Tit botwa, lok man bitimme wa awene, dok kit gin aŋo ma binyuto ni lok meno doŋ cok cobbe kakare?” 5Yecu ocako wacogi ni, “Wugwokke, ŋatti mo owek rwenyowu. 6Pien jo mapol gibibino ki nyiŋa, ma giwacci, ‘An aye a en!’ ci gibimiyo jo mapol girwenyo woko. 7Dok ka wubiwinyo pi mony, ki lok ma yweko pi mony, pe tipo komwu oto woko lirut; myero koŋ meno otimme, ento noŋo nino me agik pud peke. 8Pien rok bilweny ki rok wadi, ki ker bene bilweny ki ker wadi, ki oyeŋyeŋ biyeŋo lobo i kabedo mapol, ki kec bene bipoto; meno gin aye acakki me te can ma bipoto i lobo.

9 # Mat 10.17-20; Luka 12.11, 12 “Ento wun aye myero wugwokke kenwu; pien gibiterowu i lukiko, dok gibigoyowu i kacokke-gu. Wubicuŋ i nyim luloc ki luker-gu pira, wubitito lok ma bedo caden botgi. 10Myero koŋ gikwoŋ tito lok me kwena maber bot rok ducu. 11Ento ka giterowu i lukiko wek giŋol kop i komwu, pe wubed ka tamo kit lok aŋo ma wubilokone, ento wulok ma gibimiyowu i cawa meno; pien pe wun aye wubilok, ento Cwiny Maleŋ aye bilok. 12Omego en aye bimiyo omegine i to, ki wego bimiyo litinogi i to, litino bitubbe i kom lunyodogi, miyo gineko lunyodogi woko. 13#Mat 10.22 Jo ducu gibikwerowu pi nyiŋa; ento ŋat ma diyo cwinye nio wa i agik, en aye bilarre.

Can madit atika

(Mat 24.15-28; Luka 21.20-24)

14 # Dan 9.27; 11.31; 12.11 “Ka wuneno gikelo gin mo me kwer, malik, giketo i kabedo ma myero pe giket iye (wek dano ma kwano oniaŋ) ci jo ma i Judaya myero guriŋ woko wa i godi; 15#Luka 17.31 dano ma onoŋo tye i wi ot pe dok olor piny, pe bene odony i ot ka kwanyo iye gin mo, 16ki dano ma tye wa i poto pe odok cen paco ka omo ginarukane. 17Dok mon ma giyac gibineno can i kare meno, ki mon ma gidoto litino bene! 18Wuleg wek pe obin otimme i cwir. 19#Dan 12.1; Yabo 7.14 Pien i kare meno bibedo iye twon can madit atika ma yam peya onen i lobo, nia wa i acakki lobo ma Lubaŋa oketo-ni, nio kwede wa onyoo, dok bene pe binen. 20Kono nene Rwot pe ojwiko nino-nu obedo manok mo, kono dano mo pe obwot; ento pi jo ma giyero, ma en oyerogi, omiyo en ojwiko wel nino obedo manok.

21“I kare meno ka ce dano mo owacciwu ni, ‘Nen, Kricito ma Lubaŋa oyero tye kany’, nyo ni, ‘Nen en tye kuca’, pe wuye. 22Kricito ma lugoba kacel ki lunebi-gu ma lugoba gibibino, gibinyutowu lanyut ki tiyo jami taŋo, wek girweny jo mapol ka gitwero, wek girweny wa ki jo ma giyero bene. 23Ento wun aye wugwokke, doŋ atyeko titowu gin ma bibedo i anyim con.

Kit ma Wod pa dano bidwogo kwede

(Mat 24.29-31; Luka 21.25-28)

24 # Ic 13.10; Joel 2.10, 31; 3.15; Yabo 6.12; Ic 13.10; Ejek 32.7 “Ento i kare meno ki i ŋe can madit-ti, bibedo kit macalo yam gicoyo ni.

‘Ceŋ bicido woko macol licuc,

ki dwe bene pe biryeny;

25 # Ic 34.4; Yabo 6.13; Joel 2.10 lakalatwe bia ki i polo, gipoto piny

ki twer ducu ma i polo bene biyeŋŋe.’

26 # Dan 7.13; Yabo 1.7 Ka doŋ gibineno Wod pa dano ka bino ki pol, ki twero madwoŋ, ki deyo. 27Ci en bioro lumalaikane ka coko jone ma en oyero, kun gicokogi ki i twok piny aŋwen ducu, nia kwede wa i agikki lobo nio kwede wa i agikki polo.

Pwony i kom yat oduro

(Mat 24.32-35; Luka 21.29-33)

28“Wupwony carolok i kom yat oduro. Ka ce jaŋe doŋ olot, ci pote luk, ci doŋ wuŋeyo ni oro doŋ cok. 29Ki wun bene ka ce wuneno gin magi gutimme, ci wuŋe ni en doŋ cok, tye wa i doggola. 30Adada awacciwu ni, yalwak me kare man pe gibitum, nio waŋ ma lok magi ducu bitimme. 31Polo ki lobo gibitum ento lokka pe bitum.

Ŋat mo pe ma ŋeyo nino kadi cawa meno

(Mat 24.36-44)

32 # Mat 24.36 “Ento nino meno ki cawa meno pe tye ŋat mo ma ŋeyo, kadi wa lumalaika ma i polo, kadi wa Wod, ento Lubaŋa Won kene aye ŋeyo gire. 33Wugwokke, waŋwu obed twolo ma nen, pien wun pe wuŋeyo nino ma kare biromo iye. 34#Luka 12.36-38 Bedo rom ki dano ma ocito welo. Ka yam a weko gaŋŋe, ci omiyo twero bot luticce, kun miyo ŋat acel acel ki ticce, kun ociko lagwok doggola ni obed ka kiyo piny. 35Mumiyo wun wubed ka kiyo piny, pien pe wuŋeyo kare ma won ot bidwogo kwede; gwok dwog wi otyeno, nyo cwiny dyewor, nyo okogweno, nyo odiko. 36Wugwokke, ka ce obino oyotoyot pe onoŋwu wunino woko. 37Lok ma awaco botwu-ni, awaco bot dano ducu ni, Wuki piny.”

Currently Selected:

Marako 13: Aco85

Highlight

Copy