Marako 10
10
Lok ma Yecu opwonyo i kom keto nyom
(Mat 19.1-12; Luka 16.18)
1Yecu oa woko ki kunnu, ci obino wa i lobo Judaya ma loka Jordan, ci lwak dok gucokke bote; ocako pwonyogi doki, macalo kit pwonnye tye kwede.
2Luparicayo mogo gubino bote, ci gucako omo cwinye kun gupenye ni, “Cik miyo twero ni laco oryem dakone woko?” 3Yecu ocako gamo doggi ma kun penyogi ni, “Moses yam ocikowu niŋniŋ?” 4#Nwo 24.1-4; Mat 5.31 Gugamo ni, “Moses yam oye miyo twero ki laco ni myero omi waraga me laryem dakone woko, nyomgi oket woko.” 5Yecu owaco botgi ni, “Moses omiyowu cik meno pi cwinywu manwaŋ. 6#Acak 1.27; 5.2 Ento nia i acakki keto lobo ‘Lubaŋa oketo laco ki dako.’ 7#Acak 2.24 ‘Pienno dano twero weko wonne ki minne, moko i kom dakone matwal. 8Ci gin aryo-nu gicako doko kom acel.’ Gin pe dok gibedo kom aryo, doŋ gibedo kom acel keken. 9Gin ma Lubaŋa oribo kacel dano pe opok kingi.”
10Ka onoŋo gitye i ot, ci lupwonnyene gupenye i kom lok meno. 11#Mat 5.32; 1 Kor 7.10, 11 En owaco botgi ni, “Ka dano mo oryemo dakone woko, ce dok onyomo dako mukene, lanyom meno otimo abor, noŋo obalo i nyim dakone; 12ki dako bene kit meno, ka ce oa woko ki bot cware dok ogero laco mukene, ci dako-nu otimo abor.”
Yecu omiyo gum i kom litino
(Mat 19.13-15; Luka 18.15-17)
13Ka lwak gukelo litinogi bot Yecu ni wek en oboŋ komgi, ci lupwonnyene gujukogi. 14Ka Yecu oneno ci cwinye ocwer matek, ocako wacogi ni, “Wuwek litino gubin bota, pe wugeŋgi; pien ker pa Lubaŋa tye pi jo macalo gin. 15#Mat 18.3 Adada awacciwu ni, dano ma pe oye ker pa Lubaŋa macalo latin, pe bidonyo i kerre kadi matidi mo.” 16Ocako tiŋogi i kore omiyogi gum, kun keto ciŋe i komgi.
Awobi ma lalonyo
(Mat 19.16-30; Luka 18.18-30)
17Ka Yecu oa obino wa i yo, ci dano mo ocako riŋo i kore, ci orumo coŋe i nyime kun penye ni, “Lapwony maber, atim aŋo wek alim kwo ma pe tum?” 18Yecu owaco ni, “Piŋo ilwoŋa ni aber? Pe tye dano mo maber, Lubaŋa kene aye ber. 19#Nia 20.13; Nwo 5.17; Nia 20.14; Nwo 5.18; Nia 20.15; Nwo 5.19; Nia 20.16; Nwo 5.20; Nia 20.12; Nwo 5.16 In iŋeyo cik, ni, ‘Pe ineki, Pe itim abor, Pe ikwal gin mo, Pe ibed caden me goba, Pe ibed, Pe ibum dano mo, Wor woru ki meni.’ ” 20En ocako gamo ni, “Lapwony, atyeko mako cik magi ducu nia wa i ka tinona.” 21Yecu ociko waŋe onene ci cwinye omare, owacce ni, “Gin mo acel aye pud orem boti. Koŋ icit icat jamini ducu ma itye kwede ci imi limme ki lucan, ci ibibedo ki lwak lonyo ma gikano piri i polo. Ka doŋ ibin icak lubo kora.” 22Awobinu ka owinyo Yecu oloko bote kit meno, ci waŋe oballe woko, ocako dok cen ki cwercwiny, pien onoŋo en tye ki lwak limme madwoŋ.
23Yecu olworo waŋe ci owaco bot lupwonnyene ni, “Bibedo tek mada bot jo ma lulonyo me donyo i ker pa Lubaŋa!” 24Lupwonnyene guuro lokkenu matek. Yecu dok ocako wacogi ni, “Litino, donyo i ker pa Lubaŋa tek marac! 25Kinaga twero donyo i waŋ libira oyot, makato lalonyo me donyo i ker pa Lubaŋa!” 26Ci omiyo lwak guuro matek, ci gupenyo ni, “Ka kumeno, ci aŋa dok ma larre?” 27Yecu ocako nenogi, ci owacci, “Ki bot dano pe twerre, ento ki bot Lubaŋa twerre, pien gin ducu twerre ki bot Lubaŋa.” 28Petero ocako wacce ni, “Ce wan kono ma waweko jamiwa ducu, ci walubi-ni?” 29Yecu owacce ni, “Adada awacciwu ni, pe tye ŋatti mo ma oweko ode, nyo omege, nyo nyimege, nyo minne, nyo wonne, nyo litino, nyo pottine, pira ki pi lok me kwena maber, 30ma en pe bilimo lwak jami makato meno tyen miya i kare man, gin aye odi, omego, lamego, mego, litino, ki potti, kacel ki libo; ka dok wa i kare me anyim en binoŋo kwo ma pe tum. 31#Mat 20.16; Luka 13.30 Lwak jo mapol ma gubedo jo mukwoŋo yo gin aye gibidoŋ cen, ki jo ma gudoŋ cen, gin aye dok bitelo yo.”.
Yecu dok omwoyo tito pi tone tyen me adekke
(Mat 20.17-19; Luka 18.31-34)
32I kare ma gicito i yo ma cito Jerucalem, ma kun Yecu aye tye ka telogi yo, guuro matek, dok lupwonnyene gubedo ki lworo. En dok ocako tero lupwonnyene apar wiye aryo, ci otito botgi kit ma bitimme i kome, 33kun wacci. “Nen ba, wan doŋ watye ka ito malo i yo Jerucalem. Wod pa dano doŋ gibimiye i ciŋ ajwagi madito pa Lubaŋa ki lupwony-cik, gibiŋolle kop me to, ci gibimiye i ciŋ Lurok; 34giŋale, giŋulo laa i kome dok gibipwode ki del, ci gibineke; ento en bicer woko i ŋe nino adek.”
Lega pa Yakobo ki Jon
(Mat 20.20-28)
35Yakobo ki Jon gin litino pa Jebedayo, gubino i nyim Yecu, ci guwacce ni, “Lapwony, wamito in itim ki wan gin ma walegi pire-ni.” 36En ocako penyogi ni, “Wun wumito ni atimmiwu kit gin aŋo?” 37Gugamo, ni, “Ye wek ŋat acel obed i kom badi tuŋ lacuc ki acel bene obed i kom badi tuŋ lacam i kare me deyoni.” 38#Luka 12.50 Yecu owaco botgi ni, “Wun pe wuŋeyo gin ma wulego. Wun wutwero mato ki kikopo ma abimato kwede-ni; nyo wutwero limo batija kit ma gibatija kwede an-ni?” 39Gugamo ni, “Watwero.” Yecu dok owaco botgi ni, “Kikopo ma an abimato kwede-ni, wun bene wubimato kwede, ki kit batija ma an abibatija kwede-ni, wun bene gibibatijawu kwede; 40ento lok me bedo i kom bada ma lacuc nyo me lacam pe an aye apoko. Meno bibedo pa jo ma yam doŋ giyubo pigi wa con.”
41Ka jo mukene apar-ri guwinyo lokke, ci cwinygi ocako cwer i kom Yakobo ki Jon. 42#Luka 22.25, 26 Yecu ocako lwoŋogi bote, ci owaco botgi ni, “Wun wuŋeyo ni, jo ma gilwoŋogi ni gin lulo Lurok giloyo dano ki tek, dok luditogi bene gibedo ki twero i komgi. 43#Mat 23.11; Mar 9.35; Luka 22.26 Pe myero wun wubed kit meno; ento ŋat ma mito bedo ladit i kinwu en aye myero obed laticwu,. 44ki ŋati ma mito bedo mukwoŋo i kinwu, en aye myero obed opiiwu ducu. 45Kadi wa Wod pa dano bene pe obino ni gutine, ento en aye eti ki dano; en obino pi miyo kwone me lakok lwak dano mapol.”
Yecu ocaŋo latowaŋ ma nyiŋe Bartimayo
(Mat 20.29-34; Luka 18.35-43)
46Ka gubino i Jeriko, ci i kare ma en doŋ obea woko ki i Jeriko, kacel ki lupwonnyene ki lwak madwoŋ, ci latowaŋ ma nyiŋe Bartimayo, wod pa Timayo, onoŋo obedo piny i ŋet yo. 47Ka owinyo ni meno aye Yecu me Najaret, ocako daŋŋe ni, “Yecu Lakwar Daudi, timma kica ba!” 48Lwak gujuke matek ni oliŋ, ento en omedde ameda ki daŋŋe ni, “Lakwar Daudi, timma kica ba!” 49Ka Yecu ocuŋ, ci owacci, “Wulwoŋe obin.” Gucako lwoŋo lawaŋe-oto ni, “Doŋ idi cwinyi, a malo, olwoŋi.” 50En otugi bolo ginarukane woko, ci oa malo, obino bot Yecu. 51Yecu ocako penye ni, “Imito atimmi gin aŋo?” Ci latowaŋ ogamo ni, “Lapwony, amito waŋa onen piny do.” 52Yecu ocako wacce ni “Doŋ iciti, niyeni ocaŋi.” Ocako neno piny cut, ci olubo kor Yecu kun woto kwede i yo.
Currently Selected:
Marako 10: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.
