Matayo 5

Acakki lok ma Yecu otito i wi got

1Yecu ka oneno lwak, ci oito woko malo i wi got, ka doŋ obedo piny, ci lupwonnyene gucito bote. 2Ocako pwonyogi kun wacci,

Jo ma tye ki gum

(Luka 6.20-23)

3“Gitye ki gum jo ma giŋeyo ni gin lucan i lok me cwiny, pien ker me polo megi.

4 # Ic 61.2 “Gitye ki gum jo ma kumo, pien gibikweyo cwinygi.

5 # Jab 37.11 “Gitye ki gum jo ma mwol, pien gibileyo lobo doko megi.

6 # Ic 55.1, 2 “Gitye ki gum jo ma kec ki orwo pii nekogi pi bedo jo ma kitgi atir, pien gibimiyo giyeŋ.

7“Gitye ki gum lukica, pien gin bene gibitimo kica botgi.

8 # Jab 24.3, 4 “Gitye ki gum jo ma cwinygi leŋ, pien gin aye gibineno Lubaŋa.

9“Gitye ki gum jo ma kelo kuc, pien gin aye gibilwoŋogi ni litino pa Lubaŋa.

10 # 1 Pet 3.14 “Gitye ki gum jo ma giketo ayelayela i komgi pi bedo jo ma kitgi atir, pien ker me polo megi.

11 # 1 Pet 4.14 “Wutye ki gum ka dano ŋalowu, kun giyelowu ma giwaco kit lok ducu maraco gobagoba i komwu pira. 12#2 Tek 36.16; Tic 7.52 Wupwo, cwinywu obed yom atika, pien bakacic ma gibimiyowu me pwoc dit, tye i polo, pien lunebi ma yam gukwoŋo nyimwu dano guketo ayelayela i komgi kit meno.”

Lok i kom kado ki ceŋ

(Mar 9.50; 14.34-35)

13 # Mar 9.50; Luka 14.34, 35 “Wun wukado me lobo; ento kado ka doŋ odoko bot, ci gibitimo niŋniŋ wek dok odok mit? Konnye doŋ noŋo pe, myero giony woko dano onyon.

14 # Jon 8.12; 9.5 “Wun wuceŋ me lobo. Gaŋ ma gigero i wi got pe twero kanne. 15#Mar 4.21; Luka 8.16; 11.33 Dok pe gicwinyo tara me auma ki aduku, ento gicibo i wi okar, ci lyel caro piny bot jo ducu ma tye i ot. 16#1 Pet 2.12 Wun bene wubed jo ma menyo piny calo tara bot dano, wek gunen tic mabeco ma wutiyo ci gumi deyo bot Wonwu ma tye i polo.

Lok ma Yecu opwonyo i kom cik

17“Pe wutam ni an abino ka geŋo dano ni guwek lubo cik ki lok pa lunebi woko; pe abino ka geŋo dano lubogi, ento me cobogi acoba. 18#Luka 16.17 Ada awaco botwu ni, nio waŋ ma polo ki lobo bitum woko, latin ton mo acel, kadi ki nukuta mo acel me cik pe birwenyo, nio ka lok ducu ocobbe kakare. 19Pi meno, dano mo ma bimiyo cik mo acel ki i kom cik magi doko yogoyogo, kun pwonyo ki dano kit meno, gibilwoŋo ni en dano matidi i ker me polo; ento ŋat ma gwoko cik magi, kun pwonyo ki dano, gibilwoŋe ni en dano madit i ker me polo. 20Pien awacciwu ni, ka pe kitwu obedo atir makato kit lupwonycik ki pa Luparicayo, ci pe wubidonyo i ker me polo.

Lok ma Yecu opwonyo i kom kiniga

(Luka 12.57-59)

21 # Nia 20.13; Nwo 5.17 “Doŋ wuwinyo lok ma yam giwaco bot jo macon ni, ‘Pe ineki; ŋat ma oneko dano gibiŋolo kop i kome.’ 22Ento an awaco botwu ni ŋat mo ka kiniga omako i kom ominne gibiŋolo kop i kome; dano ma yeto ominne gibitero i Lukiko, ki ŋat ma biwaco ni, ‘In lamiŋ’ gibibolo woko i mac me Geena. 23Pi meno, ka ikelo motti bot Lubaŋa, ma itye ka tyerone i kom keno tyer, ka ce ipo ni omeru onoŋo tye ki lok mo i komi, 24ci myero iwek motti kunnu i nyim keno tyer, ci idok cen; mukwoŋo koŋ wumer wuribbe ki omeru, ka lacen doŋ idwogi ityer motti. 25Mak larem woko oyotoyot ki ŋat mudoti, i kare ma pud wutye ka wot kwede i yo wucito i lukiko, wek dano mudoti-ni pe oteri i nyim laŋolkop, ci laŋolkop bimiyi bot lakur-piny, ci teri tweyi woko i mabuc. 26Ada awacci ni, pe ibikatti woko ki kunnu, nio ka iculo ducu, ma wi cente mo pe orem

Lok ma Yecu opwonyo i kom timo abor

27 # Nia 20.14; Nwo 5.18 “Doŋ wuwinyo ka yam giwaco ni, ‘Pe itim abor.’ 28Ento an awaco botwu ni, dano mo ma neno dako ce paro ni ebed kwede, meno noŋo doŋ otimo abor woko kwede ki i cwinye. 29#Mat 18.9; Mar 9.47 Ka ce waŋi tuŋ lacuc aye ma miyo ipoto i bal, kol ci ibol woko ka mabor; pien bedo ber ka dul komi mo acel orwenyo, kato ma kono gibolo komi woko kulu i Geena. 30#Mat 18.8; Mar 9.43 Ka ce ciŋi ma lacuc aye miyo ipoto i bal, toŋ iŋun ibol woko; pien bedo ber ka dul komi mo acel orwenyo, kato ma kono gibolo komi woko kulu i Geena.

Lok ma Yecu opwonyo i kom keto nyom

(Mat 19.9; Mar 10.11-12; Luka 16.18)

31 # Nwo 24.1-4; Mat 19.7; Mar 10.4 “Yam giwaco ni, ‘Dano mo ma ryemo dakone, myero omiye waraga me keto nyom.’ 32#Mat 19.9; Mar 10.11, 12; Luka 16.18; 1 Kor 7.10, 11 Ento an awaco botwu ni, dano mo ma ryemo dakone, kono pi lok me tim me tarwaŋ keken, noŋo doŋ omiyo dako-nu odoko latim abor; dok dano ma onyomo dako ma cware oryemo noŋo otimo abor.

Lok ma Yecu opwonyo i kom kwoŋo kwoŋ

33 # Levi 19.12; Wel 30.2; Nwo 23.21 “Dok bene yam wuwinyo lok ma onoŋo giwaco bot jo macon ni, Pe ikwoŋ kwoŋ goba, ento cob kwoŋŋi ducu bot Rwot. 34#Yak 5.12; Ic 66.1; Mat 23.22 Ento an awaco botwu ni, Pe myero wukwoŋ kwoŋ mo kadi ki acel, kadi ki nyiŋ polo, pien meno komker pa Lubaŋa, 35#Ic 66.1; Jab 48.2 nyo ki nyiŋ lobo, pien meno kom me teno tyene, nyo kadi ki nyiŋ Jerucalem, pien meno gaŋ pa Kabaka madit. 36Dok bene pe ikwoŋ kwoŋ ki wii, pien in pe itwero loko yer wii mo acel doko matar nyo macol. 37Ento wuwek lokwu obed ni ‘Iyo’ nyo ‘Pe’; gin mukene makato lok man noŋo oa ki bot Larac.

Lok ma Yecu opwonyo i kom culo kwor

(Luka 6.29-30)

38 # Nia 21.24; Levi 24.20; Nwo 19.21 “Doŋ wuwinyo yam ka giwaco ni, ‘Waŋ giculo ki waŋ, lak giculo ki lak.’ 39Ento an awaco botwu ni, Pe icul kwor i kom dano mo ma otimo gin marac i komi. Ka ce ŋat mo odoŋo lemi tuŋ lacuc, lok bote lemi tuŋ lacam wek odoŋ bene; 40dok ka ce ŋat mo mito pido kwedi ni wek eter kotini, ci miye kanyini bene. 41Ka ce dano mo odiyi tektek ni itiŋ yecce icit kwede i wot me mairo acel, wot kwede wot me mairo aryo. 42Ka dano mo olegi gin mo ci myero imiye, dok bene pe myero ikwer pi den bot ŋat ma mito deno jami ki boti.

Maro lukworwa

(Luka 6.27-28, 32-36)

43 # Levi 19.18 “Dok wuwinyo bene ka yam giwaco ni, ‘Mar lawoti ento ikwer lakworri.’ 44Ento an awaco botwu ni, Wumar lukworwu, dok bene wuleg Lubaŋa pi jo ma keto ayelayela i komwu, 45wek wudok litino pa Wonwu ma tye i polo. Pien en miyo ceŋŋe tuc bot jo maraco ki jo mabeco bene, dok miyo kot cwer bot dano ma kitgi atir, ki bot jo ma pe kitgi atir bene. 46Pien ka wumaro jo ma marowu keken, ci wubinoŋo iye kit pwoc aŋo? Lujog-mucoro kono pe gitimo kit meno? 47Ka ce imoto utmegini keken, ci noŋo itimo gin aŋo maber makato jo mukene? Lurok ma pe giŋeyo Lubaŋa-ni bene pe gitimo kit meno? 48#Levi 19.2; Nwo 18.13 Wubed jo ma bal mo pe i komwu, kit macalo Wonwu ma tye i polo bal mo pe i kome-ni.

Currently Selected:

Matayo 5: Aco85

Highlight

Copy