Luka 4

Catan obito Yecu

(Mat 4.1-11; Mar 1.12-13)

1Yecu odwogo ki i Jordan kun opoŋ ki Cwiny Maleŋ, cutcut Cwiny Maleŋ otere wa i tim. 2Ci ori i tim pi nino pyeraŋwen, kun Catan obedo ka bite. Pe ocamo gin mo i kare meno ducu; ka otum, ci kec oneke. 3Catan owacce ni, “Ka in i Wod pa Lubaŋa, wac ki got man olokke odok kwon.” 4#Nwo 8.3 Ento Yecu odok iye ni, “Yam gicoyo ni, ‘Dano pe bibedo kwo ki kwon keken.’ ” 5Catan dok otere malo, onyutte ker ducu ma i wi lobo i kine me kare matidi mo, 6owacce ni, “Abimiyi twer man ducu ki deyo man ducu, pien gityeko miyo bota, atwero miyo bot ŋat ma an amito. 7Pi meno, ka iwora, ci jami magi ducu bibedo meri.” 8#Nwo 6.13 Yecu odokke iye ni, “Yam gicoyo ni,

‘Wor Rwot Lubaŋani,

dok bene iti pire keken.’ ”

9Dok otere i Jerucalem, ci ocibe ocuŋ i wi labila ot pa Lubaŋa, ci owacce ni, “Ka in i wod pa Lubaŋa, a ki malo kany ipot piny, 10#Jab 91.11, 12 pien yam bene gicoyo ni,

‘En biciko lumalaikane piri, wek gugwoki,’

11dok bene ni,

‘Gibijoli ki ciŋgi,

wek pe iyok tyeni i kom got.’ ”

12 # Nwo 6.16 Yecu dok ogamo doge owacce ni, “Yam giwaco ni, ‘Pe item i Rwot Lubaŋani.’ ” 13Ka Catan doŋ otyeko bite, ci oweke kun kuro kare maber.

Yecu ocako ticce i Galilaya

(Mat 4.12-17; Mar 1.14-15)

14Yecu odwogo i Galilaya pi tek pa Cwiny Maleŋ; pire oywek i lobo ducu ma orumo kunnu. 15Opwonyo i kacokkegi, dano ducu guketo deyo i kome.

Gikwero Yecu i Najaret

(Mat 13.53-58; Mar 6.1-6)

16Obino i Najaret ka ma yam odoŋo iye, odonyo i kacokke i ceŋ cabit, kit macalo kite onoŋo tye. Oa malo ka kwan; 17gimiye buk pa lanebi Icaya. Oyabo buk, oyenyo ka ma gicoyo ni.

18 # Ic 61.1, 2 “Cwiny pa Rwot tye i koma,

pien doŋ owira woko ki moo wek

atit lok me kwena maber bot lucan.

Oora me tito bot jo ma tye i opii ni gibigonyogi,

ki bot jo ma waŋgi oto ni gibiyabo waŋgi,

ki me gonyo jo ma giunogi wek gucit ki kuc,

19dok pi tito pi mwaka ma Rwot binyuto iye berre bot dano.”

20Ci odolo buk, odwoko bot latic, obedo piny ka tito lok; dano ducu ma i kacokke guciko waŋgi i kome. 21Ocako tito botgi ni, “Tin ginacoya man ocobo kakare kun wuwinyo ki itwu.” 22Dano ducu guloko lok maber i kome, kun giuro lok me kica ma oa ki i doge. Gupenyo ni, “Man pe wod pa Yucepu” 23En ogamo doggi ni, “Aŋeyo atir ni wubibolo carolok man i koma, ni, ‘Daktar, caŋŋe keni, tic ma yam wawinyo itiyo i Kapernaum, ti kany bene i pacowa kikome.’ ” 24#Jon 4.44 Dok omedde kwede ni, “Ada awacciwu ni, lanebi mo pe ma gijole i lobo tugi. 25#1 Luker 17.1 Ento atito botwu atir ni, i lobo Icrael i kare pa Elia yam tye iye mon mapol ma coggi oto, ka kot okwero cwer pi mwaka adek ki dwe abicel, ci kec laparanat opoto i lobo meno ducu; 26#1 Luker 17.8-16 ento Lubaŋa pe ocwalo Elia bot ŋat mo i kingi, kono bot da to mo ma i Carepat i lobo Cidon. 27#2 Luker 5.1-14 Dok i lobo Icrael i kare pa lanebi Elica onoŋo yam tye iye ludobo mapol; ento pe gilonyo mo i kingi, kono Naaman Laciria keken.” 28Ka dano ducu ma i kacokke guwinyo lok man, kiniga omakogi matek. 29Gutwarre malo, gutere woko ki i gaŋ, gukele i wi got ma gigero gaŋgi i wiye wek gicore piny. 30Ento Yecu opucce woko ki i dyegi, ci ocito gire.

Dano ma tye ki cen marac

(Mar 1.21-28)

31Yecu ocito i Kapernaum ma en gaŋ ma i Galilaya. Obedo ka pwonyogi i ceŋ cabit; 32#Mat 7.28, 29 guuro pwonnye, pien oloko ki twero. 33I kacokke onoŋo tye iye dano ma tye ki cen marac; odaŋŋe ki dwan maloŋo ni, 34“Ilaro gin aŋo kwedwa kaa, in Yecu Lanajaret? Doŋ ibino ka tyekowa bo? An aŋeyi, in i Ŋat Maleŋ pa Lubaŋa.” 35Ento Yecu ojuke kun wacce ni, “Liŋ mot, a woko ki i kome!” Cen orete piny i nyimgi, ci oa woko ki i kome kun pe otime marac. 36Dano ducu guuro, kun gipenye kekengi ni, “Man lok aŋo? Pien en ciko cen maraco ki twero ki tek, ci gia woko.” 37Pire oywek i kabedo ducu ma orumo kunnu.

Yecu ocaŋo maro Cimon Petero

(Mat 8.14-15; Mar 1.29-31)

38Yecu oa okato woko ki i kacokke, odonyo i ot pa Cimon. Maro Cimon onoŋo tye ki two lyeto ma obwoye matek; gubako doggi bote pire. 39Yecu ocuŋ ka ŋete, ojuko lyeto, ci two ocaŋ woko ki i kome; cutcut oa malo, ocako gwokogi.

Yecu ocaŋo jo mapol otyeno

(Mat 8.16-17; Mar 1.32-34)

40Ka ceŋ doŋ mito poto, dano ducu ma tye ki lutwo, ma twogi patpat, gukelogi bote. Oketo ciŋe i kom ŋat acel acel ki i kingi ocaŋogi. 41Cen maraco bene oa ki i kom jo mapol, kun gidaŋŋe ni, “In i Wod pa Lubaŋa!” Ento Yecu ojukogi, pe oye cen mo oloko, pien giŋeye, ni en Kricito ma Lubaŋa oyero.

42Ka piny oru, Yecu ocito i kabedo mo ma dano pe iye. Ento lwak gubedo ka yenye, ci gubino bote, gutemo juke wek pe oa ki botgi. 43Ento en owaco botgi ni, “Myero atit lok me kwena maber me ker pa Lubaŋa i gaŋ mukene bene, pien giora pi lok man.” 44En obedo ka tito lok i kacokke me Judaya.

Currently Selected:

Luka 4: Aco85

Highlight

Copy