Luka 17

Gin ma miyo dano poto i bal

(Mat 18.6-7, 21-22; Mar 9.42)

1Yecu owaco bot lupwonnyene ni, “Gin ma miyo dano poto i bal pe bigeŋŋe; ento bineno can ŋat ma kelo gin ma miyo dano poto i bal! 2Kono obedo ber bot dano meno ka gitweyo kidi rego i ŋute, gibolo kwede i nam, kato ma en weko ŋat acel i kin litino matino magi poto i bal. 3#Mat 18.15 Wugwokke kenwu; ka omeru obalo, juke, ka oŋut, ci timme kica. 4#Mat 18.21-22 Ka otimo bal i komi tyen abiro i nino acel, ce olokke boti tyen abiro, kun legi ni, ‘Aŋut,’ time kica.”

Med niyewa

(Mat 17.20)

5Lukwena guwaco bot Rwot ni, “Med niyewa!” 6Rwot ogamo ni, “Kono yam wutye ki niye macalo nyig kodi dek karadali, kono wuwaco ki yat man ni, ‘Putte keni, ipitte i dye nam,’ kono owinyo dogwu.

Tic pa latic

7“Aŋa i kinwu ma tye ki laticce ma puro ki kweri dyaŋ nyo kwayo romi, ma ka odwogo ki i poto ci wacce ni, ‘Bin oyotoyot ibed piny ka cam’? 8Pe koŋ en biwacce ni, ‘Yubba cam me otyeno, itwe pyeri ikella cam, nio ka an acamo, amato, lacen in ibicamo ibimato’? 9En pwoyo latic-cu pien olubo lok ma gicike kwede? 10Pe gire. Wun bene kit meno, ka wutyeko tiyo gin ducu ma gicikowu, myero wuwac ni, ‘Wan lutic ma pe konyo gin mo; watiyo gin ma myero keken.’ ”

Yecu olonyo ludobo apar

11Ka onoŋo Yecu oecito Jerucalem, ci owok ki i waŋ apokki me Camaria ki Galilaya. 12Ka odonyo i paco mo, ci ludobo guromo kwede, kun gucuŋ ka mabor, 13gudaŋŋe ni, “Yecu, Ladit, timwa kica.” 14#Levi 14.1-32 Yecu onenogi, owaco botgi ni, “Wucit wunyutte kenwu bot ajwagi pa Lubaŋa.” Man pud gitye ka cito, komgi olony. 15Ŋat acel i kingi ka oneno ni ecaŋ woko, ci odwogo cen kun pako Lubaŋa ki dwan maloŋo; 16oryebbe piny ka tyen Yecu, kun pwoye. En onoŋo Lacamaria. 17Yecu openyo ni, “Yam pe gilonyo dano apar? Jo aboŋwen kono gitye kwene? 18Pe tye ŋat mo i kingi ma odwogo cen ka pako Lubaŋa, ento kono larok man keken?” 19Owacce ni, “A, icit giri, niyeni ocaŋi.”

Bino me ker pa Lubaŋa

(Mat 24.23-28, 36-41)

20Luparicayo gupenyo Yecu ni, “Ker pa Lubaŋa bibino awene?” En odok iye botgi ni, “Ker pe Lubaŋa pe bibino ki lanyut ma gineno. 21Pe gibiwaco botwu ni, ‘Nen, en ene!’ nyo ni, ‘En ca!’ pien nen, ker pa Lubaŋa doŋ tye i kinwu.”

22Owaco bot lupwonnyene ni, “Kare bibino ma wubiparo pi neno nino acel mo pa Wod pa dano, ento pe wubineno. 23Gibiwaco botwu ni, ‘Nen, en ene!’ nyo ni, ‘Nen, en ca!’ Pe wucit iye, pe wulubgi. 24Pien macalo lutkot wil, ci menyo but lobo tuŋcel nio tuŋcel, Wod pa dano bene bibedo kit meno i ninone. 25Ento myero koŋ okany can madwoŋ, kun yalwak me kare man gikwere. 26#Acak 6.5-8 Macalo yam otimme i kare pa Nua, bitimme kit meno bene i kare pa Wod pa dano. 27#Acak 7.6-24 Yam gicamo, gimato, awobegi ki anyira ginyomme, nio i nino ma Nua odonyo kwede i yeya, pii aluka ocorre otyekogi ducu. 28#Acak 18.20–19.25 Kit meno bene i kare pa Lot, onoŋo gicamo, gimato, giwilo jami, gicato jami, gipito ginapita, gigero odi; 29ento i nino ma Lot oa woko ki i Codom mac ki gweŋ calfa ma mac oliyo ocwer ki i polo, otyekogi ducu. 30Bibedo kit meno i kare ma gibinyuto iye Wod pa dano. 31#Mat 24.17, 18; Mar 13.15, 16 I nino-nu, ŋat ma tye i wi ot kun jamine tye i ot, pe myero olor piny ka cokogi; kit meno bene ŋat ma tye i poto pe myero odwog paco. 32#Acak 19.26 Wupo mono i kom dako pa Lot. 33#Mat 10.39; 16.25; Mar 8.35; Luka 9.24; Jon 12.25 Ŋat ma mito laro kwone birwenyone, ento ŋat ma rwenyo kwone, bigwoko. 34Atittiwu ni,, i dyewor meno co aryo bibuto wi kitanda acel, gibikwanyo ŋat acel, gibiweko ŋat acel doŋ. 35Mon aryo gibibedo ka rego kacel; gibikwanyo ŋat acel, gibiweko ŋat mukene doŋ. 36Co aryo bibedo i poto, gibikwanyo ŋat acel, gibiweko ŋat acel doŋ.” 37Gupenye ni, “Kwene, Rwot?” En owaco botgi ni, “Ka ma kom dano muto tye iye, acut bene gicokke kunnu.”

Currently Selected:

Luka 17: Aco85

Highlight

Copy