Jo Ibru 4

1Pi meno cikke me donyo i yweyo pa Lubaŋa pud tye, ento myero wabedu ma lwor, wek ŋat mo i kinwu pe ginoŋ ni opoto woko me o iye. 2Wan doŋ wawinyo lok me kwena maber bene calo gin, ento lok me kwena ma gin guwinyo pe okonyogi, pien pe orwatte ki niyegi. 3#Jab 95.11 Wan jo ma waye aye wabidonyo i yweyo meno ma yam en oloko pire ni,

“Macalo yam akwoŋo ki kiniga,

‘Gin pe bidonyo i yweyo bota,’” kadi bed ticce onoŋo yam otum woko cakke i acakki piny. 4#Acak 2.2 Pien tye ka mo ka ma yam en oloko i kom nino me abiro ni meno, “Lubaŋa oywe i nino me abiro ki i kom ticce ducu.” 5#Jab 95.11 Ka dok kany en bene oloko ni,

“Gin pe bidonyo i yweyo bota.” 6Kit meno yo pud tye twolo wek jo mogo gudony iye. Jo ma yam gikwoŋo tito botgi lok me kwena maber pe gudonyo, pien gin gukwero bedo ki winy. 7#Jab 95.7, 8 En dok oketo nino mukene ma gilwoŋo ni, “Tin,” kun olok lacen ki i dog Daudi ma doŋ onoŋo okato kare malac ata, i lok ma nene waloko pire, ni,

“Ka wuwinyo dwane tin,

pe wumi cwinywu obed nwaŋ.”

8 # Nwo 31.7; Yoc 22.4 Pien ka kono yam Yocwa omiyogi yweyo, kono Lubaŋa pe oloko lacen pi nino mukene. 9Pi meno, yweyo me cabit pud tye pi jo pa Lubaŋa; 10#Acak 2.2 pien ŋat ma doŋ odonyo i yweyo bot Lubaŋa noŋo doŋ oywe woko ki i ticce, calo Lubaŋa ma yam oywe woko ki i ticce-ni.

11Doŋ pi man, myero wayelle me donyo i yweyo meno, wek omi ŋat mo pe dok opot woko pi kwero bedo ki winy calo gin. 12Pien lok pa Lubaŋa obedo gin makwo, dok tiyo matek, bit bene kato pala lucwan ma lebe bit ryoryo woko. Lok meno tuco iwa pil, tuc tuŋcel ka ma tipo ki cwiny gurwatte iye, nyo ka ma waŋ mwot orwatte iye ki moo ma i i cogo, kun poko par ki tam mabecone ki maracone ma tye i i dano. 13Pe tye gin mo mukanne ki bot Lubaŋa ma en pe neno, jami ducu ma en oketo odurre woko ka maleŋ i waŋe, en aye ŋat ma biŋiyo kwowa.

Yecu en ajwaka madit

14Kit macalo doŋ watye ki ajwaka madit twatwal ma doŋ otyeko donyo i polo, en Yecu, Wod pa Lubaŋa, pi meno myero wamok matek i niye ma watuco. 15Pien ajwaka madit ma watye kwede pe obedo ŋat ma pe winyo arem kacel kwedwa pi gorowa, pien en bene Catan yam obite i yo ducu calo wan, ento en pe omedo ki timo bal mo. 16Iyo, wan myero doŋ wanyiku cok i nyim komker pa Lubaŋa ki tekcwiny, ka ma kica tye iye, wek otimwa kica, wanoŋ bene kica ma konyowa i kare ma mitte.

Currently Selected:

Jo Ibru 4: Aco85

Highlight

Copy